காரில் மைலேஜ் எகிறணுமா? இந்த 5 தவறுகளை மட்டும் செய்யாதீங்க.. பெட்ரோல் செலவு குறையும்!
Car Mileage Tips: கார் வைத்திருப்பவர்கள் அவற்றுக்கு பெட்ரோல் போட்டே ஓய்ந்து விடுவார்கள். கார் மைலேஜை அதிகரித்து பெட்ரோல் செலவை பாதியாக குறைக்கும் டிப்ஸ் குறித்து இந்த செய்தியில் விரிவாக பார்க்கலாம்.
காரில் மைலேஜ் அதிகரிக்க சூப்பர் டிப்ஸ்
நாளுக்கு நாள் விண்ணை முட்டும் விலையில் ஏறிவரும் பெட்ரோல் மற்றும் டீசல் விலை, நடுத்தர மக்களின் மாதாந்திர பட்ஜெட்டைத் தலைகீழாக மாற்றி வருகிறது. எரிபொருள் செலவைக் கட்டுப்படுத்த வேண்டும் என்பதே வாகன ஓட்டிகள் பலரின் நீண்ட நாள் கவலையாக உள்ளது. கார் பழையதாகிவிட்டால் இயல்பாகவே மைலேஜ் குறைந்துவிடும் என்று பெரும்பாலானோர் நினைக்கிறார்கள். ஆனால் அது முற்றிலும் தவறான கருத்து. நமக்குத் தெரியாமல் நாம் செய்யும் சில சிறு சிறு தவறுகள்தான் காரின் எரிபொருளைக் காலி செய்கின்றன.
உங்கள் காரும் கணிசமான அளவில் பெட்ரோல் அல்லது டீசலைக் குடிக்கிறதா? கவலை வேண்டாம்! உங்களது அன்றாட டிரைவிங் பழக்கவழக்கங்களில் சில எளிய மாற்றங்களைச் செய்தாலே போதும், காரின் மைலேஜை உங்களால் கணிசமாக உயர்த்த முடியும். கார் உரிமையாளர்களின் பாக்கெட்டை ஓட்டையிடும் அந்த 5 முக்கியத் தவறுகள் என்னென்ன, அவற்றை எவ்வாறு சரிசெய்வது என்பதை இங்கே விரிவாகப் பார்ப்போம்.
1. டயர் பிரஷர் ரொம்ப முக்கியம்
காரின் மைலேஜ் கணக்கில் டயர்கள் மிக முக்கியப் பங்காற்றுகின்றன. டயர்களில் காற்று குறைந்திருந்தால், சாலைக்கும் டயருக்குமான உராய்வு அதிகரித்து இன்ஜின் மீது கடுமையான அழுத்தம் உண்டாகும். காரை முன்னோக்கி நகர்த்த இன்ஜின் கூடுதல் பலம் செலுத்த வேண்டியிருப்பதால் எரிபொருள் பெருமளவு வீணாகும். எனவே, குறைந்தது வாரத்திற்கு ஒரு முறையாவது டயர் பிரஷரைச் சரிபார்க்கும் பழக்கத்தை வைத்துக்கொள்ளுங்கள். கார் தயாரிப்பு நிறுவனம் (OEM) பரிந்துரைத்த அளவில் காற்றை நிரப்புவது மைலேஜை அதிகரிப்பதோடு, டயர்களின் ஆயுளையும் நீட்டிக்கச் செய்யும்.
2. சரியான நேரத்தில் சர்வீஸ் செய்வது அவசியம்
வாகனம் புதியதா அல்லது பல ஆண்டுகள் ஓடியதா என்பது முக்கியமல்ல; சரியான கால இடைவெளியில் சர்வீஸ் செய்வது கட்டாயமாகும். இன்ஜின் ஆயில் மற்றும் ஏர் ஃபில்டரை உரிய நேரத்தில் மாற்றத் தவறினால், இன்ஜினின் ஒட்டுமொத்த செயல்திறனும் மந்தமாகிவிடும். குறிப்பாக, ஏர் ஃபில்டரில் அழுக்கு சேர்ந்துவிட்டால் இன்ஜினுக்குத் தேவையான சுத்தமான காற்று கிடைக்காது, இது எரிபொருள் விரயத்திற்கு வழிவகுக்கும். எனவே, இன்ஜின் ஆயில், ஏர் ஃபில்டர் மற்றும் ஆயில் ஃபில்டர் ஆகியவற்றைத் தவறாமல் மாற்றிப் பராமரியுங்கள்.
3. கியர் மாற்றும் முறையும் 'ஹாஃப்-கிளட்ச்' பழக்கமும்
பலரும் வண்டி ஓட்டும்போது தேவையில்லாமல் கிளட்ச் மீது காலை வைத்துக் கொண்டே இருப்பார்கள். இதனை 'ஹாஃப்-கிளட்ச் டிரைவிங்' என்று அழைப்பார்கள். இந்தத் தீய பழக்கம் காரின் உதிரிப்பாகங்களைப் பழுதுபடுத்துவதோடு, மைலேஜையும் பெருமளவில் குறைக்கும். அதேபோல், சரியான வேகத்திற்குத் தகுந்தபடி கியர் மாற்றுவதும் மிக முக்கியம். குறைந்த வேகத்தில் அதிக கியரிலும், அதிக வேகத்தில் குறைந்த கியரிலும் ஓட்டுவது இன்ஜினுக்குச் சுமையைத் தரும். இன்ஜின் எந்த அளவுக்கு ஸ்மூத்தாக இயங்குகிறதோ, அந்த அளவுக்கு உங்களது எரிபொருள் மிச்சமாகும்.
4. சிக்னலில் இன்ஜினை ஆஃப் செய்யுங்கள்
நெரிசல் மிகுந்த சாலைகளில் அல்லது சிக்னல்களில் 30 வினாடிகளுக்கு மேல் காத்திருக்க நேரிட்டால், காரின் இன்ஜினை ஆஃப் செய்துவிடுவது மிகச் சிறந்த புத்திசாலித்தனம். கார் நகராமல் ஒரே இடத்தில் நின்றுகொண்டிருக்கும்போதும் இன்ஜின் இயங்கிக் கொண்டிருந்தால், தேவையில்லாமல் பெட்ரோல்/டீசல் எரிந்து தீர்ந்துவிடும். இந்தச் சிறிய மாற்றத்தைச் செய்வதன் மூலம் கணிசமான அளவு எரிபொருளைச் சேமிக்க முடியும்.
5. டிக்கியை 'ஸ்டோர் ரூம்' போல மாற்றாதீர்கள்
நிறைய பேருக்குக் காரின் டிக்கியை ஒரு கிடங்கு போலப் பயன்படுத்தும் பழக்கம் உண்டு. தேவையில்லாத கனமான பொருட்கள் மற்றும் உபகரணங்களை டிக்கியிலேயே நிரப்பி வைப்பதால் காரின் மொத்த எடையும் அதிகரித்துவிடும். வாகனத்தின் எடை எவ்வளவுக்கு எவ்வளவு அதிகமாகிறதோ, அதைச் சுமந்து செல்ல இன்ஜின் அவ்வளவு அதிக சக்தியைப் பயன்படுத்த வேண்டும்; இது எரிபொருள் செலவை பலமடங்கு கூட்டும். எனவே, காரில் எப்போதுமே அத்தியாவசியமான பொருட்களை மட்டும் வைத்துக்கொண்டு, தேவையற்ற எடையைக் குறைப்பது மைலேஜை உயர்த்தும் சிறந்த வழியாகும்.
