பவர்ஃபுல் டர்போ எஞ்சின், 160 எச்.பி பவர்: இந்திய சந்தையைக் கலக்க வரும் ரெனோ பிக்ஸ்டர்!
ரெனோ நிறுவனம் 4.6 மீட்டர் நீளம் மற்றும் 7 சீட்டர் வசதியுடன் கூடிய தனது புதிய 'பிக்ஸ்டர்' எஸ்யூவி காரை இந்தியாவில் அறிமுகப்படுத்த திட்டமிட்டுள்ளது.
ரெனோ பிக்ஸ்டர் 7 சீட்டர் எஸ்யூவி
இந்தியாவில் எஸ்யூவி (SUV) கார்களுக்கான வரவேற்பு தொடர்ந்து அதிகரித்து வரும் நிலையில், தனது புதிய கார்களின் வரிசையை விரிவுபடுத்த ரெனோ நிறுவனம் திட்டமிட்டுள்ளது. இதன் ஒரு பகுதியாக, 3 வரிசை இருக்கைகள் கொண்ட புதிய பிக்ஸ்டர் (Bigster) எஸ்யூவி அடுத்த ஆண்டு இந்தியாவில் அறிமுகமாகும் என எதிர்பார்க்கப்படுகிறது.
வெளிநாடுகளில் டேஸியா (Dacia) பிராண்டின் கீழ் விற்பனை செய்யப்படும் இந்தக் கார், இந்தியாவில் ரெனோ பிராண்டில் விற்பனைக்கு வர இருக்கிறது. புதிய டஸ்ட்டரை விடப் பெரியதாக உருவாக்கப்படும் இந்த எஸ்யூவி, குடும்பத்துடன் பயணிப்பவர்களைக் கவரும் வகையில் ஆறு மற்றும் ஏழு இருக்கைகள் கொண்ட தேர்வுகளுடன் வரும்.
வடிவமைப்பு & இடவசதி
பெயருக்கு ஏற்றாற்போல் புதிய ரெனோ பிக்ஸ்டர் சுமார் 4.6 மீட்டர் நீளம் கொண்ட எஸ்யூவியாக இருக்கும். இதன் வடிவமைப்பில் எல்இடி விளக்குகள், அகலமான முன்பக்க பம்பர், உயர்த்தப்பட்ட தோற்றம், சதுர வடிவ சக்கர வளைவுகள் மற்றும் உறுதியான ரூஃப்ரெயில்கள் இடம்பெற்றுள்ளன. இந்த கார் 210 மிமீ கிரவுண்ட் கிளியரன்ஸ் கொண்டிருக்கும் என்று எதிர்பார்க்கப்படுகிறது.
குடும்பப் பயன்பாட்டுக்கு ஏற்ற வகையில் ஆறு இருக்கைகள் கொண்ட மாடலில் 2-வது வரிசையில் தனித்தனி கேப்டன் இருக்கைகள் வழங்கப்படும். 7 சீட்கள் கொண்ட மாடலில் 2-வது வரிசையில் பென்ச் இருக்கை அமைப்பு இடம்பெறும். 3-வது வரிசையில் அமர்பவர்களுக்கான குளிர்சாதன வசதியும், மின்னணு சாதனங்களைச் சார்ஜ் செய்வதற்கான இணைப்புகளும் வழங்கப்படலாம்.
2 விதமான எஞ்சின்கள்
ரெனால்ட் பிக்ஸ்டர் காரின் முக்கிய சிறப்பம்சமாக 2 விதமான எஞ்சின் தேர்வுகள் எதிர்பார்க்கப்படுகின்றன. முதலாவதாக, 1.8 லிட்டர் பெட்ரோல் எஞ்சினுடன் மின்மோட்டார்கள் இணைக்கப்பட்ட ஹைபிரிட் (Strong Hybrid) தொழில்நுட்பம் வழங்கப்பட்டிருக்கும். இதில், 1.4 கிலோவாட் ஹவர் திறன் கொண்ட பேட்டரியுடன் செயல்படும் இந்த அமைப்பு, அதிகபட்சமாக 160 எச்பி ஆற்றலையும் 172 என்எம் டார்க்கையும் வழங்கும் என எதிர்பார்க்கப்படுகிறது.
2-வது தேர்வாக 1.3 லிட்டர் டர்போ பெட்ரோல் எஞ்சின் இடம்பெறும். இது 160 எச்பி ஆற்றலையும் 270 என்எம் டார்க்கையும் வழங்கும் எனத் தகவல்கள் தெரிவிக்கின்றன. இந்த எஞ்சினுடன் 6 ஸ்பீடு மேனுவல் மற்றும் 6 ஸ்பீடு டிசிடி ஆட்டோமேட்டிக் கியர்பாக்ஸ் தேர்வுகள் வழங்கப்படும் வாய்ப்புள்ளது.
வசதிகள் & பாதுகாப்பு
பிக்ஸ்டர் காரில் 10.1 அங்குல தொடுதிரை தகவல் மற்றும் பொழுதுபோக்கு அமைப்பு, 10.25 அங்குல டிஜிட்டல் இன்ஸ்ட்ரூமென்ட் திரை, பனோரமிக் சன்ரூஃப், 2 ஸோன் தானியங்கி குளிர்சாதன வசதி மற்றும் வயர்லெஸ் சார்ஜிங் போன்ற அம்சங்கள் இடம்பெற்றிருக்கும். முன்பக்க இருக்கைகளுக்கு வென்டிலேட்டட் வசதியும் மற்றும் எலெக்ட்ரிக் அட்ஜெஸ்ட் வசதியும் வழங்கப்படும்.
பாதுகாப்பைப் பொறுத்தவரை, 6 ஏர்பேக்குகள், மின்னணு நிலைத்தன்மைக் கட்டுப்பாடு, 360 டிகிரி கேமரா மற்றும் லெவல் 2 மேம்பட்ட ஓட்டுநர் உதவி அமைப்பு (ADAS) ஆகியவை எதிர்பார்க்கப்படும் அம்சங்களாக உள்ளன. ரெனோ பிக்ஸ்டர் எஸ்யூவி வரும் ஆண்டு முதல் பாதியில் இந்தியாவில் அறிமுகமாகலாம் என எதிர்பார்க்கப்படுகிறது.
இதன் ஆரம்ப விலை ரூ.15 லட்சம் முதல் ரூ.25 லட்சம் வரை இருக்க வாய்ப்புள்ளது. டாடா சஃபாரி, ஹூண்டாய் அல்கசார் மற்றும் மஹிந்திரா எக்ஸ்யூவி 7XO போன்ற மூன்று வரிசை இருக்கைகள் கொண்ட எஸ்யூவிகளுக்குப் போட்டியாக பிக்ஸ்டர் அமையும். குறிப்பாக, டீசல் எஞ்சின் இல்லாமல் ஹைபிரிட் மற்றும் டர்போ பெட்ரோல் தேர்வுகளை விரும்பும் வாடிக்கையாளர்களுக்கு இது புதிய மாற்றாக இருக்கலாம்.
