வருமான வரி செலுத்துவோர் 2025-26 மதிப்பீட்டு ஆண்டிற்கான திருத்தப்பட்ட ரிட்டர்னை டிசம்பர் 31, 2025க்குள் தாக்கல் செய்ய வேண்டும். அதன் பிறகு ITR செயலாக்கத்தில் தாமதம் ஏற்பட்டு பிழைகள் கண்டறியப்பட்டால், ரீஃபண்ட் கோரிக்கைகள் பாதிக்கப்படலாம்.
வருமான வரி செலுத்துவோர் கண்டிப்பாக கவனிக்க வேண்டிய கடைசி எச்சரிக்கை
வருமான வரி தாக்கல் செய்தவர்களுக்கு டிசம்பர் 31, 2025 என்பது மிக முக்கியமான நாளாக மாறியுள்ளது. குறிப்பாக ரீஃபண்ட் எதிர்பார்த்து காத்திருக்கும் வரி செலுத்துவோருக்கு, இந்த காலக்கெடு பெரிய பாதிப்புகளை ஏற்படுத்தக்கூடியதாக உள்ளது. வருமான வரித் துறையில் ITR செயலாக்கம் தாமதமாகுவது வழக்கமான ஒன்றாக இருந்தாலும், இந்த ஆண்டு அந்தத் தாமதம் பலருக்கு உரிமை இழப்பை ஏற்படுத்தும் அபாயம் உள்ளது என்று வரி நிபுணர்கள் எச்சரிக்கின்றனர்.
பிழைகளை சரிசெய்ய வாய்ப்பு
2025–26 மதிப்பீட்டு ஆண்டிற்கான (AY 2025-26) திருத்தப்பட்ட வருமான வரி அறிக்கை தாக்கல் செய்ய கடைசி தேதி டிசம்பர் 31, 2025 ஆகும். இந்த திருத்தப்பட்ட ITR மூலம், வரி செலுத்துவோர் தங்கள் அசல் தாக்கலில் இடம்பெற்ற தவறான வருமான விவரங்கள், விடுபட்ட கழிவுகள், தவறான வரி கணக்கீடுகள் போன்ற பிழைகளை சரிசெய்ய முடியும். ஆனால் இந்தத் தேதியைத் தாண்டிய பிறகு, மத்திய செயலாக்க மையம் (CPC) ரிட்டர்னை இன்னும் செயலாக்கவில்லை என்றாலும் கூட, திருத்தம் செய்யும் உரிமை முழுமையாக முடிவடைகிறது.
Related Articles
விளைவுகளை சந்திக்க வேண்டி இருக்கும்
வருமான வரித் துறை ரிட்டர்ன் செயலாக்கத்தில் தாமதம் செய்தால், அதன் விளைவுகளை வரி செலுத்துவோர்களே சந்திக்க வேண்டிய நிலை உருவாகிறது. குறிப்பாக ரீஃபண்ட் பெற தகுதியுடையவர்களுக்கு இது பெரும் சிக்கலாக மாறலாம். செலுத்திய மொத்த வரி உண்மையான வரிப் பொறுப்பை விட அதிகமாக இருந்தால், பொதுவாக ரீஃபண்ட் கிடைக்கும். ஆனால், செயலாக்கம் தாமதமாகி, பின்னர் பிழைகள் கண்டறியப்பட்டால், திருத்தப்பட்ட ITR தாக்கல் செய்ய முடியாத காரணத்தால் ரீஃபண்ட் கோரிக்கை பாதிக்கப்பட வாய்ப்பு உள்ளது.
பட்டயக் கணக்காளர்கள் இந்த நிலை குறித்து தொடர்ந்து எச்சரிக்கை விடுத்து வருகின்றனர். டிசம்பர் 31, 2025க்கு பிறகு CPC அறிவிப்பில் பிழை அல்லது விடுபடல் கண்டறியப்பட்டால், ஒரே வழியாக ITR-U (Updated Return) தாக்கல் செய்வதே மீதமிருக்கும். ஆனால் ITR-U மூலம் வரிப் பொறுப்பை குறைக்கவும், ரீஃபண்ட் கோரவும், வரி செலுத்துவோருக்கு சாதகமான மாற்றங்களைச் செய்யவும் அனுமதி இல்லை என்பதே கவலையளிக்கும் உண்மை.
இதெல்லாம் கட்டாயம்
அதிகாரப்பூர்வ தரவுகளின்படி, கோடிக்கணக்கான ITR-கள் இன்னும் செயலாக்கத்திற்காகக் காத்திருக்கின்றன. இதனால், காலக்கெடு முடிவதற்கு முன்பே வரி செலுத்துவோர் தங்கள் ரிட்டர்ன் நிலையை கவனமாக கண்காணிக்க வேண்டிய கட்டாயம் ஏற்பட்டுள்ளது. திருத்தம் தேவைப்படும் சந்தர்ப்பங்களில், கடைசி நாளுக்காக காத்திருக்காமல் உடனடியாக நடவடிக்கை எடுப்பதே பாதுகாப்பான வழியாகும்.
டிசம்பர் 31, 2025க்கு அப்பாலும் ரிட்டர்ன் செயலாக்கப்படாமல் இருந்தால், வரி செலுத்துவோர் அமைதியாக காத்திருப்பதைவிட, இ-நிவாரன், CPGRAMS அல்லது வருமான வரி இ-ஃபைலிங் போர்ட்டல் மூலம் புகார் பதிவு செய்வது போன்ற நடவடிக்கைகளை மேற்கொள்ள வேண்டும் என்று நிபுணர்கள் அறிவுறுத்துகின்றனர். செயலாக்க தாமதம் சிறிய விஷயமாக தோன்றினாலும், அது ரீஃபண்ட் இழப்பாக மாறக்கூடியதால், இந்த விஷயத்தில் அலட்சியம் கூடாது.
மொத்தத்தில், டிசம்பர் 31, 2025 என்பது ஒரு சாதாரண காலக்கெடு அல்ல; அது வரி செலுத்துவோரின் உரிமைகளை தீர்மானிக்கும் முக்கியமான நாள். இந்த தேதிக்குள் தங்கள் ITR விவரங்களை முழுமையாக சரிபார்த்து, தேவையான திருத்தங்களைச் செய்து முடிப்பதே, எதிர்கால சிக்கல்களைத் தவிர்க்கும் ஒரே வழியாகும்.
