Sri Lanka vs Pakistan 2nd Test: இலங்கையை ஒயிட்வாஷ் செய்து பாகிஸ்தான் நம்பர் 1; இந்தியாவுக்கு 2ஆவது இடம்!

இலங்கைக்கு எதிரான 2ஆவது டெஸ்ட் போட்டியில் பாகிஸ்தான் இன்னிங்ஸ் மற்றும் 222 ரன்கள் வித்தியாசத்தில் வெற்றி பெற்று உலக டெஸ்ச் சாம்பியன்ஷிப் ஸ்டாண்டிங் பட்டியலில் நம்பர் 1 இடம் பிடித்துள்ளது.

இலங்கையில் சுற்றுப்பயணம் மேற்கொண்ட பாகிஸ்தான் 2 டெஸ்ட் போட்டிகள் கொண்ட தொடரில் பங்கேற்றது. இதில் முதல் டெஸ்ட் போட்டியில் பாகிஸ்தான் 4 விக்கெட் வித்தியாசத்தில் வெற்றி பெற்றது. இதையடுத்து இலங்கை மற்றும் பாகிஸ்தான் அணிகளுக்கு இடையிலான 2ஆவது டெஸ்ட் போட்டி கடந்த 24 ஆம் தேதி தொடங்கியது. இதில், இலங்கை அணி டாஸ் வென்று முதலில் பேட்டிங் ஆடியது.

இதில், முதல் இன்னிங்ஸில் 166 ரன்களுக்கு எல்லா விக்கெட்டுகளையும் இழந்தது. அதிகபட்சமாக தனஞ்சயா டி சில்வா 57 ரன்கள் எடுத்தார். பந்து வீச்சைப் பொறுத்த வரையில் பாகிஸ்தான் அணியில் அப்ரார் அகமது 4 விக்கெட்டுகள் கைப்பற்றினார். நசீம் ஷா 3 விக்கெட்டுகள் கைப்பற்றினார். பின்னர் பாகிஸ்தான் தனது முதல் இன்னிங்ஸை ஆடியது. இதில், தொடக்க வீரர் அப்துல்லா ஷபீக் 201 ரன்கள் குவித்தார். ஆகா சல்மான் 132 ரன்களும், முகமது ரிஸ்வான் 50 ரன்களும் எடுத்து ஆட்டமிழக்காமல் இருந்தனர்.

இறுதியாக பாகிஸ்தான் 5 விக்கெட் இழப்பிற்கு 576 ரன்கள் எடுத்து டிக்ளேர் செய்தது. பின்னர் இலங்கை 2ஆவது இன்னிங்ஸை ஆடியது. இதில், எல்லா விக்கெட்டுகளையும் இழந்து 188 ரன்கள் மட்டுமே எடுத்து, இன்னிங்ஸ் மற்றும் 222 ரன்கள் வித்தியாசத்தில் தோல்வியை தழுவியது. பந்து வீச்சில் பாகிஸ்தானின் நோமன் அலி 7 விக்கெட்டுகள் கைப்பற்றினார்.

இந்தப் போட்டியில் வெற்றி பெற்றதன் மூலமாக 2 போட்டிகள் கொண்ட டெஸ்ட் தொடரை பாகிஸ்தான் 2-0 என்ற கணக்கில் கைப்பற்றியுள்ளது. அதுமட்டுமின்றி 2023-2025 ஆம் ஆண்டுக்கான உலக டெஸ்ட் சாம்பியன்ஷிப் ஸ்டாண்டிங் பட்டியலில் பாகிஸ்தான் நம்பர் 1 இடத்திலேயே நீடிக்கிறது. இந்த 2023-2025 ஆம் ஆண்டுக்கான உலக டெஸ்ட் சாம்பியன்ஷிப் தொடரை வெற்றியுடன் பாகிஸ்தான் தொடங்கியுள்ளது.

மேலும், 24 புள்ளிகளுடன் உலக டெஸ்ட் சாம்பியன்ஷிப் ஸ்டாண்டிங் பட்டியலில் பாகிஸ்தான் நம்பர் ஒன் இடம் பிடித்துள்ளது. இந்தியா 16 புள்ளிகள் பெற்று 2ஆவது இடத்தில் உள்ளது. நடப்பு சாம்பியனான ஆஸ்திரேலியா 26 புள்ளிகளுடன் 3ஆவது இடத்திலும், இங்கிலாந்து 14 புள்ளிகளுடன் 4ஆவது இடத்திலும், வெஸ்ட் இண்டீஸ் அணி 4 புள்ளிகளுடன் 5ஆவது இடத்திலும் உள்ளன.

இந்தப் பட்டியலில் டாப் 2 இடங்களை பிடிக்கும் அணிகள் வரும் 2025 ஆம் ஆண்டு லார்ட்ஸ் மைதானத்தில் நடக்கும் உலக டெஸ்ட் சாம்பியன்ஷிப் இறுதிப் போட்டியில் மோதும் என்பது குறிப்பிடத்தக்கது.