ChatGPT-ல் வருகிறது விளம்பரம்! இலவச பயனர்களுக்கு மட்டுமா? உங்கள் பிரைவசிக்கு ஆபத்தா?

ChatGPT ChatGPT பயன்படுத்துபரா நீங்கள்? விரைவில் அதில் விளம்பரங்களைப் பார்க்க நேரிடும். OpenAI நிறுவனம் இலவச பயனர்களுக்காக விளம்பரங்களைச் சோதிக்கத் தொடங்கியுள்ளது. இது பதில்களைப் பாதிக்குமா? பிரைவசி நிலை என்ன? முழு விவரம் உள்ளே.

ChatGPT

இலவசமாக சேவையை வழங்கி வந்த OpenAI நிறுவனம், வருவாயைப் பெருக்க புதிய உத்தியைக் கையில் எடுத்துள்ளது. இது உங்கள் சாட்டிங் அனுபவத்தைக் கெடுக்குமா?

இணைய உலகில் தேடுவதற்கு கூகுள் (Google) என்றால், சிந்தித்து பதில் சொல்வதற்கு 'சாட்ஜிபிடி' (ChatGPT) என்றாகிவிட்டது. பள்ளி மாணவர்கள் முதல் சாஃப்ட்வேர் இன்ஜினியர்கள் வரை பலரும் நம்பியிருக்கும் இந்தத் தளத்தில், விரைவில் ஒரு பெரிய மாற்றம் வரப்போகிறது. ஆம், இனி ChatGPT பயன்படுத்தும்போது இடையில் விளம்பரங்களைப் பார்க்கத் தயாராகுங்கள்!

OpenAI நிறுவனம் இந்தத் தகவலை அதிகாரப்பூர்வமாக உறுதி செய்துள்ளது. அமெரிக்காவில் இதற்கான சோதனைகள் தொடங்கப்பட உள்ளன.

யாருக்கெல்லாம் விளம்பரம் வரும்?

எல்லாருக்கும் விளம்பரம் வருமா என்றால், இல்லை.

• இலவச பயனர்கள் (Free & Go Users): நீங்கள் பணம் கட்டாமல் ChatGPT-ஐப் பயன்படுத்துபவர் என்றால், உங்களுக்கு விரைவில் விளம்பரங்கள் காட்டப்படும்.

• கட்டணப் பயனர்கள் (Paid Users): Plus, Pro, Enterprise மற்றும் Business சந்தாதாரர்களுக்குத் தொடர்ந்து விளம்பரமில்லா சேவை (Ad-free experience) வழங்கப்படும்.

AI பதில்கள் மாறுமா? (முக்கியமான கேள்வி)

விளம்பரதாரர்கள் பணம் கொடுப்பதால், AI சொல்லும் பதில்களில் அவர்களின் ஆதிக்கம் இருக்குமோ என்ற அச்சம் பயனர்களுக்கு வருவது இயல்பு. ஆனால், இதற்கு OpenAI நான்கு முக்கிய உறுதிமொழிகளை அளித்துள்ளது:

1. தலையீடு இல்லை: விளம்பரதாரர்களால் ChatGPT சொல்லும் பதில்களிலோ அல்லது கருத்துகளிலோ எந்தத் தாக்கத்தையும் ஏற்படுத்த முடியாது.

2. தனித் தோற்றம்: AI தரும் பதில்களுக்கும், காட்டப்படும் விளம்பரங்களுக்கும் வித்தியாசம் இருக்கும். விளம்பரங்கள் தெளிவாகத் தெரியும் வகையில் தனியாகக் குறிக்கப்படும்.

3. பிரைவசி (Privacy): நீங்கள் ChatGPT-உடன் பேசும் தனிப்பட்ட உரையாடல்கள் (Chats) விளம்பரதாரர்களுக்குப் பகிரப்படாது.

4. கட்டுப்பாடு உங்கள் கையில்: விளம்பரங்களைக் காட்ட உங்கள் தரவுகளைப் பயன்படுத்தலாமா வேண்டாமா என்பதை 'Settings' பகுதியில் நீங்களே முடிவு செய்யலாம்.

ஏன் இந்த முடிவு?

OpenAI தலைமைச் செயல் அதிகாரி சாம் ஆல்ட்மேன் (Sam Altman), நிறுவனத்தின் முக்கியத் திட்டங்களில் முழுக் கவனம் செலுத்தச் சொல்லியிருந்த நிலையில் இந்த அறிவிப்பு வந்துள்ளது. AI தொழில்நுட்பத்தை இயக்குவதற்கான செலவு மிக அதிகம் என்பதால், இலவச சேவையைத் தொடர்ந்து வழங்க விளம்பர வருவாய் அவசியம் என்று நிறுவனம் கருதுகிறது.

சிறு வணிகர்களுக்கு வாய்ப்பு

வெறும் பேனர்களைக் காட்டுவதோடு நிற்காமல், சிறு தொழில் முனைவோர்கள் தங்கள் வாடிக்கையாளர்களுடன் AI மூலம் உரையாடும் வகையில் புதிய விளம்பர வடிவங்களையும் OpenAI திட்டமிட்டு வருகிறது.

சுருக்கமாகச் சொன்னால், யூடியூப் மற்றும் கூகுளைப் போலவே, இனி ChatGPT-யும் "இலவசம் என்றால் விளம்பரம், பணம் கட்டினால் ப்ரீமியம்" என்ற பாதைக்கு மாறிவிட்டது.