போக்குவரத்து ஊழியர்களுக்கு தமிழக அரசின் பொங்கல் பரிசு.. அக்கவுண்டுக்கு வரும் பல்க் அமௌன்ட்!

பொங்கல் பண்டிகையையொட்டி போக்குவரத்து ஊழியர்களுக்கு தமிழக அரசு சாதனை ஊக்கத்தொகை அறிவித்துள்ளது. போக்குவரத்து ஊழியர்களுக்கு எவ்வளவு கிடைக்கும்? என்பது குறித்து பார்க்கலாம்.

போக்குவரத்து ஊழியர்களுக்கு பொங்கல் பரிசு

பொங்கல் பண்டிகையை முன்னிட்டு அனைத்து அரசு போக்குவரத்து கழகங்களில் பணிபுரியும் 1,03.123 போக்குவரத்துக் கழகப் பணியாளர்களுக்கு ரூ.6,14,92,000 சாதனை ஊக்கத்தொகை வழங்கப்படும் என்று தமிழக அரசு தித்திப்பான அறிவிப்பை வெளியிட்டுள்ளது.

சிறந்து விளங்கும் போக்குவரத்துக் கழகம்

இது தொடர்பாக தமிழக அரசு வெளியிட்ட அறிவிப்பில், 'தமிழ்நாட்டில் சிறப்பான மற்றும் திறமையான போக்குவரத்து சேவையை பொதுமக்களுக்கு அளிப்பதில் தமிழ்நாடு அரசு போக்குவரத்துக் கழகங்கள் முக்கிய பங்காற்றுகின்றன. இந்தியாவிலேயே தமிழகத்தில் இயங்கும் தமிழ்நாடு அரசு போக்குவரத்துக் கழகங்கள் தான் பயணிகள் அடர்வு. பேருந்து பயன்பாடு, எரிபொருள் செயல்திறன் ஆகியவற்றில் உயர்ந்து விளங்குகின்றன.

குக்கிராமம் முதல் மாநகரங்கள் உட்பட மக்கள் குடியிருக்கும் அனைத்துப் பகுதிகளுக்கும் தங்குதடையின்றி, போக்குவரத்து சேவை அளிக்கப்பட்டு வருகிறது. தமிழ்நாடு அரசுப் போக்குவரத்துக் கழகங்கள். தமிழ்நாடு போக்குவரத்து வளர்ச்சி நிதி நிறுவனம், பல்லவன் போக்குவரத்து அறிவுரைப் பணிக்குழு ஆகிய அனைத்து நிறுவனங்களிலும் தற்போது சுமார் ஒரு இலட்சம் பணியாளர்கள் பணிபுரிந்து வருகிறார்கள்.

போக்குவரத்து ஊழியர்களுக்கு சாதனை ஊக்கத்தொகை

பொங்கல் திருநாளை முன்னிட்டு தமிழ்நாடு அரசுப் போக்குவரத்துக் கழகங்கள், தமிழ்நாடு போக்குவரத்து வளர்ச்சி நிதி நிறுவனம், பல்லவன் போக்குவரத்து அறிவுரைப் பணிக்குழு ஆகியவற்றில் பணிபுரியும், போக்குவரத்து கழகங்களின் பணியாளர்களில், 2025-ஆம் ஆண்டில் 91 நாட்கள் மற்றும் அதற்கு மேலும், ஆனால் 151 நாட்களுக்கும் குறைவாக பணிபுரிந்த ஊழியர்களுக்கு 85 ரூபாய் வீதமும்;

151 நாட்கள் மற்றும் அதற்கு மேலும் ஆனால் 200 நாட்களுக்கும் குறைவாக பணிபுரிந்த ஊழியர்களுக்கு 195 ரூபாய் வீதமும், 200 நாட்கள் மற்றும் அதற்கு மேலும் பணிபுரிந்த ஊழியர்களுக்கு 625 ரூபாய் வீதமும் பொங்கல் சாதனை ஊக்கத் தொகை வழங்கப்படும்.

இந்த உத்தரவின்படி அனைத்து அரசு போக்குவரத்துக் கழகங்களில் பணிபுரியும் 1,03.123 போக்குவரத்துக் கழகப் பணியாளர்களுக்கு ரூ.6,14,92,000 சாதனை ஊக்கத்தொகையாக வழங்கப்படும்' என்று கூறப்பட்டுள்ளது.