பஞ்சாயத்து ஓவர்.. திமுக - காங்கிரஸ் டீல் முடிந்தது.. ஸ்டாலின் கொடுத்த இன்ப அதிர்ச்சி.. இத்தனை இடங்களா?

திமுக, காங்கிரஸ் கூட்டணி தொகுதி பங்கீடு இன்று கையெழுத்துதாகியுள்ளது. சட்டப்பேரவை தேர்தலில் திமுக காங்கிரசுக்கு எத்தனை இடங்கள் கொடுத்துள்ளது? என்பது குறித்து விரிவாக பார்க்கலாம்.

திமுக - காங்கிரஸ் தொகுதி பங்கீடு கையெழுத்து

தமிழக சட்டப்பேரவை தேர்தல் நெருங்கி வரும் நிலையில், நீண்ட காலம் இழுபறியாக இருந்து வந்த திமுக, காங்கிரஸ் கூட்டணி தொகுதி பங்கீடு இன்று (மார்ச் 4) ஒருவழியாக முடிவுக்கு வந்துள்ளது. அதாவது கூட்டணியில் இடம்பெற்ற காங்கிரசுக்கு வரும் சட்டப்பேரவை தேர்தலில் 28 தொகுதிகளையும், 1 ராஜ்யசபா சீட்டையும் திமுக ஒதுக்கியுள்ளது. கடந்த 2021 சட்டப்பேரவை தேர்தலில் காங்கிரசுக்கு 25 இடங்கள் ஒதுக்கப்பட்ட நிலையில், இந்த முறை கூடுதலாக 3 சீட்டுகள் கூடுதலாக ஒதுக்கப்பட்டுள்ளது.

இரண்டாம் கட்ட பேச்சுவார்த்தை

திமுக தலைமையகமான அண்ணா அறிவாலயத்தில் நடைபெற்ற இரண்டாம் கட்ட தொகுதிப் பங்கீடு பேச்சுவார்த்தைக்குப் பிறகு இந்த அறிவிப்பு வந்துள்ளது. அகில இந்திய காங்கிரஸ் கமிட்டியின் தேர்தல் பொறுப்பாளர் கிரிஷ் சோடங்கர் தலைமையிலான தமிழ்நாடு காங்கிரஸ் கமிட்டியின் தொகுதிப் பங்கீட்டுக் குழு, காங்கிரஸ் சட்டமன்றக் கட்சித் தலைவர் ராஜேஷ் குமார் மற்றும் அகில இந்திய காங்கிரஸ் கமிட்டி செயலாளர் நிவேதித் ஆல்வா ஆகியோர் முதல்வர் ஸ்டாலினை சந்தித்து பேசினார்கள். இந்த பேச்சுவார்த்தையின் போது திமுக துணைப் பொதுச்செயலாளர் கனிமொழி உள்பட பலர் உடன் இருந்தனர்.

அதிகாரப்பூர்வ அறிவிப்பு வெளியீடு

பின்னர் இது தொடர்பாக திமுக தலைவரும், முதல்வருமான மு.க.ஸ்டாலின், தமிழக காங்கிரஸ் தலைவர் செல்வபெருந்தகை ஆகியோர் கையெழுத்திட்ட ஒப்பந்த அறிக்கையில், ''நடைபெற உள்ள 2026 சட்டமன்ற பொதுத் தேர்தலில், திராவிட முன்னேற்றக் கழகத் தலைவர் மாண்புமிகு முதலமைச்சர் மு.க.ஸ்டாலின் அவர்களும் -தமிழ்நாடு காங்கிரஸ் கட்சியின் தலைவர் கு.செல்வப்பெருந்தகை அவர்களும் இன்று (04-03-2026) தொகுதி உடன்பாடுகள் குறித்து கலந்து பேசியதில், மதச்சார்பற்ற முற்போக்கு கூட்டணியில் இடம் பெற்றுள்ள காங்கிரஸ் கட்சி, தமிழ்நாட்டில் 28 சட்டமன்றத் தொகுதிகளில் நடைபெற உள்ள மாநிலங்களவை தேர்தலில் போட்டியிடுவதெனவும் காங்கிரஸ் கட்சிக்கு ஒரு இடம் ஒதுக்கீடு செய்வதெனவும் செய்யப்பட்டது'' என்று கூறப்பட்டுள்ளது.