விஜய் குறித்து விமர்சிக்க அதிமுகவினருக்கு தடை போட்ட இபிஎஸ்? பரபரக்கும் தமிழக அரசியல் களம்!

தமிழக சட்டமன்ற தேர்தலுக்கு தயாராகும் அதிமுக, மாவட்ட செயலாளர்களுடன் ஆலோசனை நடத்தியது. பூத் கமிட்டிகளை வலுப்படுத்துவது, திமுக அரசின் குறைகளை மக்களிடம் எடுத்துச் செல்வது குறித்து விவாதிக்கப்பட்டது. 

தமிழக சட்டமன்ற தேர்தலுக்கு இன்னும் 10 மாதங்களே உள்ள நிலையில் பிரதான கட்சிகளாக திமுக, அதிமுக உள்ளிட்ட அரசியல் கட்சிகள் தயாராகி வருகின்றனர். அதிமுக பாஜகவுடன் உள்ளிட்ட பல்வேறு கட்சிகளுடன் கூட்டணி அமைத்து போட்டியிட உள்ளது. அதேபோல் ஆளும் திமுக கடந்த உள்ளாட்சி, நாடாளுமன்ற மற்றும் சட்டமன்ற தேர்தலில் போட்டியிட்ட அதிக கூட்டணி கட்சிகளுடன் போட்டியிட உள்ளது. புதியதாக கட்சி தொடங்கியுள்ள தமிழக வெற்றிக் கழகம் யாருடன் கூட்டணி அமைத்து போட்டியிட போகிறது என்ற எதிர்பார்ப்பு எழுந்துள்ளது.

இந்நிலையில் சென்னை ராயப்பேட்டையில் உள்ள அதிமுக தலைமை அலுவலகத்தில் பொதுச்செயலாளர் எடப்பாடி பழனிசாமி தலைமையில் அதிமுக மாவட்டப் பொறுப்பாளர்கள் மற்றும் மாவட்டச் செயலாளர்களின் ஆலோசனைக் கூட்டம் நடைபெற்று வருகிறது. நேற்று காலை புதுக்கோட்டை, மதுரை, தேனி, திண்டுக்கல், விருதுநகர், சிவகங்கை உள்ளிட்ட 22 மாவட்ட செயலாளர்களுடன் காலை, மாலை என இரண்டு வேளைகளிலும் எடப்பாடி பழனிசாமி ஆலோசனை மேற்கொண்டார். அப்போது பூத் கமிட்டியை வலுப்படுத்துவது, தேர்தலுக்கான வியூகங்களை வகுப்பது குறித்து அறிவுறுத்தல்களை வழங்கினார்.

இந்நிலையில் இரண்டாவது நாளான இன்று காலை 9.30 மணிக்கு திருப்பூர், கோவை, நீலகிரி, திருச்சி, பெரம்பலூர், அரியலூர், கரூர், தஞ்சாவூர், நாகப்பட்டினம், மயிலாடுதுறை, திருவாரூர் நிர்வாகிகளுடன் ஆலோசனை மேற்கொண்டார். அப்போது அடுத்த மாத இறுதிக்குள் பூத் கமிட்டி அமைக்கும் பணிகளை முழுமையாக முடிக்க வேண்டும், திண்ணை பிரச்சாரங்கள் மூலம் அதிமுக செய்த சாதனைகளையும் திமுக அரசின் தவறுகளையும் பொதுமக்களிடையே கொண்டு செல்ல வேண்டும். மேலும், மாநிலங்களவை பதவிக்கான தேர்தலில் அதிமுக சார்பில் இரண்டு வேட்பாளர்களை தேர்ந்தெடுப்பது பற்றியும் விவாதிக்கப்பட்டதாக கூறப்படுகிறது.

குறிப்பாக தமிழக வெற்றிக் கழகத்தின் தலைவர் விஜய் குறித்து பேசியதாக தகவல் வெளியாகியுள்ளது. அதாவது பொதுச்செயலாளர் எடப்பாடி பழனிசாமி தவெக தலைவர் விஜய் குறித்து பேச அதிமுகவினருக்கு தடை விதித்துள்ளதாக தகவல் வெளியாகியுள்ளது. முதல்வர் ஸ்டாலின் உதயநிதி மற்றும் திமுக மீதான விமர்சனங்களை தீவிரப்படுத்த உத்தரவிட்டுள்ளதாகவும் கூறப்படுகிறது. விஜய் குறித்து அதிமுகவினர் பேச தடை விதித்துள்ள நிலையில் அதிமுகவில் தவெக இணையுமா என்ற எதிர்பார்ப்பு தொண்டர்கள் மத்தியில் எழுந்துள்ளது.