'ஆக்ரோஷத்தை பேட்டில் காட்டுங்க கிங்'; இளம் வீரரிடம் வம்பிழுத்த கோலி; வலுக்கும் எதிர்ப்பு; நடந்தது என்ன?

ஆஸ்திரேலிய இளம் வீரர் சாம் கான்ஸ்டாஸ் உடன் மோதலில் ஈடுபட்ட கோலிக்கு எதிர்ப்புகள் குவிந்து வருகின்றன. ஆக்ரோஷத்தை பேட்டில் காட்டும்படி பலரும் அவருக்கு அறிவுரை கூறி வருகின்றனர்.

Virat Kohli vs Sam Konstas

திரும்பி பார்க்க வைத்த சாம் கான்ஸ்டாஸ்

இந்தியா ஆஸ்திரேலியா இடையிலான 'பாக்சிங் டே டெஸ்ட்' எனப்படும் 4வது டெஸ்ட் போட்டி மெல்போர்னில் இன்று தொடங்கியது. இதில் முதலில் பேட்டிங் செய்த ஆஸ்திரேலிய அணி முதல் நாள் ஆட்ட நேர முடிவில் 6 விக்கெட் இழந்து 311 ரன்கள் குவித்துள்ளது. ஆஸ்திரேலிய அனியின் பேட்ஸ்மேன்கள் சாம் கான்ஸ்டாஸ் (60 ரன்கள்), மார்னஸ் லபுஸ்சேன் (72 ரன்), உஸ்மான் கவாஜா (57 ரன்) மற்றும் ஸ்டீவ் ஸ்மித் (62 ரன் நாட் அவுட்) ஆகிய 4 பேர் அரைசதம் அடித்தனர். பும்ரா 3 விக்கெடுகள் சாய்த்தார்.

இது ஒருபக்கம் இருக்க, முதல் நாளில் ஆஸ்திரேலிய இளம் வீரர் 19 வயதான சாம் கான்ஸ்டாஸ்க்கும், விராட் கோலிக்கும் இடையிலான மோதல் தான் இப்போது ஹாட் டாபிக் ஆக உள்ளது. முதன் முறையாக சர்வதேச கிரிக்கெட்டில் களம் கண்ட சாம் கான்ஸ்டாஸ் துளியும் பயமின்றி பும்ரா, சிராஜ் பந்துகளை விளாசித் தள்ளினார். அதுவும் உலகின் மிகச்சிறந்த வீரரான பும்ராவின் பந்தை அவர் ஸ்கூப் ஷாட்கள் மூலம் சிக்சர்களுக்கு பறக்க விட்டது இந்திய ரசிகர்கள் மட்டுமின்றி இந்திய வீரர்களையும் வாய்பிளக்க வைத்துள்ளது.

Sam Konstas Batting

சாம் கான்ஸ்டாஸ் விராட் கோலி மோதல் 

முதல் நாளில் அதிரடியாக ஆடி ரன்களை சேகரித்த சாம் கான்ஸ்டாஸ் ஒரு ஓவர் முடிவில் மறுமுனைக்கு சென்றார். அப்போது அவருக்கு நேராக நடந்து வந்த விராட் கோலி சாம் கான்ஸ்டாஸின் தோளின் மீது இடித்தபடி சென்றார். இதனால் அதிர்ச்சி அடைந்த சாம் கான்ஸ்டாஸ் கோலியிடம் சில வார்தைகளை பேசினார். தொடர்ந்து இருவருக்கும் இடையே மோதல் உருவாகும் சூழ்நிலை உருவான நிலையில், நடுவர்கள், சக வீரர்கள் தலையிட்டு பிரச்சனையை முடித்து வைத்தனர்.

Virat Kohli and Sam Konstas Clash

சாம் கான்ஸ்டாஸ் மீது விராட் கோலி மோதும் வீடியோ வைரலாக பரவி வரும் நிலையில், ''இந்த விஷயத்தில் கோலி மீது தான் தவறு. அவர் தான் வேண்டுமென்றே சாம் கான்ஸ்டாஸ் மீது மோதுகிறார்'' என்று ஆஸ்திரேலிய ரசிகர்கள் மட்டுமின்றி இந்திய ரசிகர்கள் சிலரும் குற்றம்சாட்டுகின்றனர். அதாவது சாம் கான்ஸ்டாஸ் அவர் வழியில் நடந்து செல்ல, கோலி வேண்டுமென்றே அவருக்கு நேராக நடந்து வந்து தோளின் மீது மோதி வம்பிழுப்பதுபோல் வீடியோவில் பதிவாகி உள்ளதாக தெரிவித்துள்ளனர்.

கோலிக்கு வலுக்கும் எதிர்ப்பு 

விராட் கோலி இந்த தொடர் முழுவதும் ஒரு சதத்தை தவிர, பெரிதாக ரன்கள் அடிக்காத நிலையில், ''உங்களின் ஆக்ரோஷத்தை எதிரணி வீரர்களை வம்பிழுத்து காட்டுவதை விட, பேட்டின் மூலம் ரன்கள் குவித்து காட்டுங்கள் கிங் கோலி'' என்று பலரும் கோலிக்கு அறிவுரை கூறி வருகின்றனர். இந்த விவகாரம் தொடர்பாக முன்னாள் வீரர்கள் ரிக்கி பாண்டிங், மைக்கேல் வாகன் கோலியை குற்றம்சாட்டியுள்ளனர்.

Virat Kohli Battting

ஐசிசி அபராதம்

''விராட் கோலி மீதுதான் முழு தவறு உள்ளது. இதில் எந்த சந்தேகமும் இல்லை. அவர் வேண்டுமென்றே சாம் கான்ஸ்டாஸ் திசை நோக்கி நடந்து வந்து மோதுகிறார்'' என்று ரிக்கி பாண்டிங் தெரிவித்துள்ளார். ''கான்ஸ்டாஸ் அவர் வழியே சென்று கொண்டிருக்கும்போது, கோலி வேண்டுமேன்றே அவர் மீது மோதுகிறேன். கோலி உலகின் மிகச்சிறந்த அனுபமிக்க வீரர்; ஏன் எப்படி செய்தோம்? என்று போட்டி முடிந்தவுடன் அவர் கண்டிப்பாக சிந்திப்பார்'' என்று மைக்கேல் வாகன் கூறியுள்ளார். இந்நிலையில், இளம் வீரரிடம் மோதலில் ஈடுபட்ட கோலிக்கு ஐசிசி போட்டி சம்பளத்தில் இருந்து 20% அபராதம் விதித்துள்ளது குறிப்பிடத்தக்கது.