'இனி இதை செய்தால் தான் இந்திய அணியில் இடம்'; ரோகித், கோலிக்கு 'செக்' வைத்த கம்பீர்!

ரஞ்சி கிரிக்கெட்டில் விளையாடும்படி கோலி, ரோகித் சர்மாவிடம் கம்பீர் அறிவுறுத்தியுள்ளார். இது தொடர்பான முழு விவரங்களை இந்த செய்தியில் பார்க்கலாம். 

India vs Australia Test

இந்தியா படுதோல்வி 

இந்திய அணி ஆஸ்திரேலியாவில் சுற்றுப்பயணம் செய்து 5 போட்டிகள் கொண்ட டெஸ்ட் தொடரில் விளையாடியது. இதில் பெர்த்தில் நடந்த முதல் போட்டியில் மட்டும் இந்திய அணி 295 ரன்கள் வித்தியாசத்தில் வெற்றி பெற்றது. ஆனால் அதன்பிறகு மிக மோசமாக செயல்பட்டது. அடிலெய்டில் நடந்த 2வது டெஸ்ட்டில் 10 விக்கெட் வித்தியாசத்தில் படுதோல்வி அடைந்தது. 

3வது டெஸ்ட் டிராவில் முடிந்தது. மெல்போர்னில் நடந்த 4வது டெஸ்ட்டில் 184 ரன்கள் வித்தியாசத்திலும் சிட்னியில் நடந்த 5வது டெஸ்ட்டில் 6 விக்கெட் வித்தியாசத்திலும் இந்திய அணி படுதோல்வி அடைந்தது. ஆஸ்திரேலிய தொடரில் இந்திய அணி படுதோல்விகள் அடைய முக்கிய காரணம் ரோகித் சர்மா, விராட் கோலியின் படுமோசமான பேட்டிங் தான். 

Rohit Sharma

கோலி, ரோகித் மோசமான பேட்டிங் 

அணிக்கு முன்மாதிரியாக இருக்க வேண்டிய கேப்டன் ரோகித் சர்மா வெறும் 6 சரசாரியுடன் 31 ரன்கள் மட்டுமே எடுத்தார். கேப்டன்சியிலும் சரியான முடிவுகள் எடுக்க முடியாமல் தடுமாறினார். இதேபோல் முதல் டெஸ்ட்டில் மட்டும் சதம் அடித்த விராட் கோலி, அதன்பிறகு ஒரு அரைசதம் கூட அடிக்கவில்லை. அதுவும் அவுட் சைட் ஆப் ஸ்டெம்ப் பந்தில் அவர் தொடர்ந்து அவுட் ஆனது அதிர்ச்சியை உண்டாக்கியது.

தொடர்ந்து மோசமாக விளையாடி வரும் ரோகித் சர்மா, விராட் கோலி ஓய்வு பெற வேண்டும் என பல்வேறு தரப்பினரும் வலியுறுத்தி வருகின்றனர். மறுபுறம் இந்திய சீனியர் வீரர்கள் ரஞ்சி கோப்பை போன்ற முதல் தர போட்டிகளில் விளையாட வேண்டும் என்ற கருத்துகளும் முன்வைக்கப்படுகின்றன. 

Virat Kohli

உள்ளூர் போட்டிகளில் விளையாட வேண்டும் 

இதே கருத்தை வலியுறுத்திய இந்திய முன்னாள் வீரர் சுனில் கவாஸ்கர், ''இந்திய அணியின் மூத்த வீரர்கள் கண்டிப்பாக ரஞ்சி கிரிக்கெட்டில் விளையாட வேண்டும். அப்படி விளையாடினால் தான் சர்வதேச டெஸ்ட் போட்டிகளில் எளிதாக ரன்கள் உதவியாக இருக்கும். மூத்த வீரர்கள் கண்டிப்பாக ரஞ்சி கிரிக்கெட்டில் விளையாட வேண்டும் என்று பயிற்சியாளர் கவுதம் கம்பீர் சொல்ல வேண்டும்'' என்று தெரிவித்தார்.

இந்நிலையில், சிட்னி டெஸ்ட்டில் தோல்விக்கு பிறகு பயிற்சியாளர் கவுதம் கம்பீர் செய்தியாளர்களை சந்தித்தார். அப்போது சாம்பியன்ஸ் டிராபி தொடருக்கு முன்னதாக இந்திய அணி வீரர்கள் ரஞ்சி கோப்பை போன்ற உள்நாட்டு கிரிக்கெட் தொடர்களில் விளையாடுவார்களா? என்ற கேள்வி அவரிடம் எழுப்பப்பட்டது. இதற்கு பதில் அளித்த கம்பீர், ''எல்லோரும் உள்நாட்டு கிரிக்கெட்டில் விளையாட வேண்டும் என்று நான் எப்போதும் விரும்புகிறேன். 

goutham gambhir

வெளிப்படையாக பேசிய கம்பீர் 

இப்போது உள்நாட்டு கிரிக்கெட்டுக்கு அதிக முக்கியத்துவம் கொடுக்க வேண்டும். அதிகமாக விளையாடக்கூடிய மற்றும் சிவப்பு பந்து கிரிக்கெட்டில் அர்ப்பணிப்பு உள்ள அனைவரும் அதிகமாக உள்நாட்டு கிரிக்கெடில் விளையாட வேண்டும். உள்ளூர் போட்டிகளுக்கு முக்கியத்துவம் கொடுக்காவிட்டால், டெஸ்ட் கிரிக்கெட்டில் விளையாடக்கூடிய வீரர்களை தேர்வு செய்வது கடினமாகும். பெரிய போட்டிகளை எதிர்கொள்ள உள்ளூர் போட்டிகள் பயிற்சியாக இருக்கும்'' என்றார். 

இந்திய அணியில் ஸ்ரேயாஸ் ஐயர், இஷான் கிஷன், சூர்யகுமார் யாதவ், ஹர்திக் பாண்டியா ஆகியோர் தொடர்ந்து உள்நாட்டு கிரிக்கெட்டில் விளையாடி வருவது குறிப்பிடத்தக்கது.