IPL Mini Auction 2023: ஐபிஎல் ஏலத்தில் பங்கேற்கும் டாப் 5 ஆல்ரவுண்டர்கள்..! அடித்துக்கொள்ளும் அணிகள்

ஐபிஎல் 16வது சீசனுக்கான மினி ஏலம் நாளை(டிசம்பர் 23) கொச்சியில் நடக்கிறது. இந்த ஏலத்தில் 405 வீரர்கள் ஏலம் விடப்படவுள்ளனர். கேன் வில்லியம்சன், பென் ஸ்டோக்ஸ், சாம் கரன் ஆகிய பெரிய வீரர்கள் ஏலத்தில் இடம்பெற்றிருப்பதால் ஏலம் மிக பரபரப்பாக இருக்கும். மேலும் பல திறமையான இளம் வீரர்களும் ஏலத்தில் பங்கேற்பதால் இந்த ஏலத்தின் மீது எதிர்பார்ப்பு நிலவுகிறது. இந்த ஏலத்தில் அதிக தொகைக்கு விலைபோக வாய்ப்புள்ள டாப் 5 ஆல்ரவுண்டர்கள் யார் யார் என்று பார்ப்போம்.  

1. பென் ஸ்டோக்ஸ் - அடிப்படை விலை ரூ.2 கோடி

இங்கிலாந்து அணியின் மிகச்சிறந்த ஆல்ரவுண்டர் பென் ஸ்டோக்ஸ். சமகாலத்தின் தலைசிறந்த ஆல்ரவுண்டர்களில் ஒருவர் ஸ்டோக்ஸ். 2018 ஐபிஎல் ஏலத்தில் அதிக தொகைக்கு (ரூ.12.5 கோடி) விலைபோன வீரர் ஸ்டோக்ஸ். டெஸ்ட், ஒருநாள், டி20 ஆகிய 3 ஃபார்மட்டிலும் அசத்தும் வெகுசில வீரர்களில், அதுவும் ஆல்ரவுண்டர்களில் முதன்மையானவர் ஸ்டோக்ஸ். நெருக்கடியான சூழலில் பேட்டிங், பவுலிங் என அனைத்துவகையிலும் சிறப்பாக செயல்பட்டு தனது அணிக்கு வெற்றியை தேடிக்கொடுக்கும் மேட்ச் வின்னர் ஸ்டோக்ஸ். கேப்டன்சிக்கும் தகுதியான வீரர். ராஜஸ்தான் ராயல்ஸ் அணியில் ஆடிவந்த ஸ்டோக்ஸ் கடந்த சீசனில் ஆடவில்லை. ஆஸ்திரேலியாவில் அண்மையில் நடந்த டி20 உலக கோப்பை ஃபைனலில் பாகிஸ்தானுக்கு எதிராக பொறுப்புடன் பேட்டிங்  ஆடி இங்கிலாந்து கோப்பையை வெல்ல உதவியாக இருந்தார். எனவே பென் ஸ்டோக்ஸுக்கு அதிக கிராக்கி இருக்கும்.

2. சாம் கரன் - அடிப்படை விலை ரூ.2 கோடி

இங்கிலாந்தை சேர்ந்த சிறந்த ஆல்ரவுண்டரான சாம் கரன், பேட்டிங், பவுலிங், ஃபீல்டிங் என அனைத்துவகையிலும் சிறப்பான பங்களிப்பை செய்து, 2021ல் சிஎஸ்கே அணி ஐபிஎல் கோப்பையை வென்றபோது அந்த அணியில் முக்கிய அங்கம் வகித்தார். ஐபிஎல்லில் கிங்ஸ் லெவன் பஞ்சாப் மற்றும் சிஎஸ்கே அணிகளுக்கு சாம் கரன் ஆடியிருக்கிறார். 

ஆஸ்திரேலியாவில் நடந்த டி20 உலக கோப்பையை இங்கிலாந்து வெல்ல சாம் கரன் முக்கிய காரணமாக திகழ்ந்தார். டி20 உலக கோப்பையின் தொடர் நாயகன் விருதையும் வென்றார் சாம் கரன். இந்த ஆண்டில் சாம் கரன் ஆடிய 36 டி20 போட்டிகளி 46 விக்கெட்டுகளை வீழ்த்தியுள்ளார். 495 ரன்களும் அடித்துள்ளார். அபாரமான டெத் பவுலிங், அதிரடி பேட்டிங் என டி20 கிரிக்கெட்டில் மிகப்பெரிய மேட்ச் வின்னராக திகழும் சாம் கரனை ஏலத்தில் எடுக்க அணிகள் கடுமையாக போட்டியிடும் என்பதால் அவருக்கும் கிராக்கி அதிகமாக உள்ளது.

3. ஷகிப்  அல் ஹசன் - அடிப்படை விலை ரூ.1.5 கோடி

சமகாலத்தின் தலைசிறந்த ஆல்ரவுண்டர்களில் ஒருவர் ஷகிப் அல் ஹசன். ஐசிசி டி20 ஆல்ரவுண்டர் தரவரிசையில் முதலிடத்தில் இருக்கும் வீரர் ஷகிப் அல் ஹசன். சிறப்பான பேட்டிங், தரமான பவுலிங் என அனைத்துவகையிலும் ஆட்டத்தில் பங்களிப்பு செய்யக்கூடியவர். ஐபிஎல்லில் 71 போட்டிகளில் ஆடி 793 ரன்கள் அடித்துள்ளார்; 63 விக்கெட்டுகளையும் வீழ்த்தியுள்ளார். ஐபிஎல்லில் கேகேஆர், சன்ரைசர்ஸ் ஹைதராபாத் ஆகிய அணிகளில் ஆடியுள்ள ஷகிப் அல் ஹசனுக்கு இந்த மினி ஏலத்தில் கிராக்கி இருக்கும் என்று எதிர்பார்க்கப்படுகிறது.

4. கேமரூன் க்ரீன் - அடிப்படை விலை ரூ.2 கோடி

ஆஸ்திரேலியாவை சேர்ந்த ஆல்ரவுண்டர் கேமரூன் க்ரீன், பென் ஸ்டோக்ஸ் தரத்திற்கான ஆல்ரவுண்டர். டி20 உலக கோப்பைக்கு முன்பாக நடந்த டி20 தொடர்களில் அபாரமாக பேட்டிங் ஆடி அசத்தினார் கேமரூன் க்ரீன். ஓபனிங், மிடில் ஆர்டர் என எந்த பேட்டிங் ஆர்டராக இருந்தாலும், அதிரடியாக பேட்டிங் ஆடி அனைவரையும் கவர்ந்துள்ளார் கேமரூன் க்ரீன். ஃபாஸ்ட் பவுலிங்கும் வீசக்கூடிய வீரர் கேமரூன் க்ரீன். எனவே கேமரூன் க்ரீனை எடுக்க ஐபிஎல் அணிகள் ஆர்வம் காட்டும்.

5. ஜேசன் ஹோல்டர் - அடிப்படை விலை ரூ.2 கோடி

வெஸ்ட் இண்டீஸ் ஆல்ரவுண்டர் ஜேசன் ஹோல்டர். ஐபிஎல்லில் ஏற்கனவே சிஎஸ்கே, சன்ரைசர்ஸ் ஹைதராபாத், கேகேஆர் அணிகளில் ஆடியிருக்கும் அவரை, கடந்த சீசனுக்கான மெகா ஏலத்தில் எடுத்த லக்னோ சூப்பர் ஜெயிண்ட்ஸ் அணி, அந்த அணியில் அதிகமான ஆல்ரவுண்டர்கள் இருந்ததால் ஜேசன் ஹோல்டரை விடுவித்தது. ஃபாஸ்ட் பவுலிங் ஆல்ரவுண்டரான ஹோல்டரை ஏலத்தில் எடுக்கவும் அணிகள் ஆர்வம் காட்டும்.