கே.எல். ராகுல் சாதனை சதம் (152*), நிதிஷ் ராணாவின் 91 ரன்கள் உதவியுடன், டெல்லி கேப்பிட்டல்ஸ் அணி பஞ்சாப் கிங்ஸ் அணிக்கு எதிராக 264/2 ரன்கள் குவித்தது. ராகுலின் இந்த ஸ்கோர், ஐபிஎல்-லில் ஒரு இந்திய வீரரின் அதிகபட்ச ஸ்கோர் என்பது குறிப்பிடத்தக்கது.
டெல்லியில் உள்ள அருண் ஜெட்லி ஸ்டேடியத்தில் சனிக்கிழமை நடந்த ஐபிஎல் 2026 தொடரின் 35வது போட்டியில், பஞ்சாப் கிங்ஸ் அணிக்கு எதிராக டெல்லி கேப்பிட்டல்ஸ் அணி 2 விக்கெட் இழப்புக்கு 264 ரன்கள் குவித்தது. இரண்டாவது விக்கெட்டுக்கு ஜோடி சேர்ந்த நிதிஷ் ராணா மற்றும் கே.எல். ராகுல் இருவரும் சேர்ந்து 220 ரன்கள் விளாசினர். பஞ்சாப் கிங்ஸ் அணியின் பந்துவீச்சை நாலாபுறமும் சிதறடித்தனர்.
24
கே.எல். ராகுலின் வரலாற்று சாதனை
கே.எல். ராகுல் வெறும் 67 பந்துகளில் 152 ரன்கள் எடுத்து கடைசி வரை ஆட்டமிழக்காமல் இருந்தார். இது ஒரு அற்புதமான இன்னிங்ஸ். வெறும் 47 பந்துகளில் சதம் அடித்து, டெல்லி கேப்பிட்டல்ஸ் அணிக்காக அதிவேக சதம் அடித்த வீரர் என்ற சாதனையையும் படைத்தார். ராகுலின் இந்த 152* ரன்கள், ஐபிஎல் வரலாற்றில் ஒரு இந்திய வீரர் அடித்த அதிகபட்ச தனிநபர் ஸ்கோராகும். கடந்த ஆண்டு பஞ்சாப் கிங்ஸ் அணிக்கு எதிராக அபிஷேக் ஷர்மா அடித்த 141 ரன்கள் சாதனையை இவர் முறியடித்தார். ஐபிஎல் தொடரில் 150 ரன்களுக்கு மேல் அடித்த மூன்றாவது வீரர் என்ற பெருமையையும் ராகுல் பெற்றார். இதற்கு முன், 2013-ல் புனே வாரியர்ஸ் அணிக்கு எதிராக ஆர்சிபி வீரர் கிறிஸ் கெயில் (175*), 2008-ல் ஆர்சிபி அணிக்கு எதிராக கேகேஆர் வீரர் பிரண்டன் மெக்கல்லம் (158*) ஆகியோர் இந்த சாதனையை செய்துள்ளனர்.
34
சாதனை பார்ட்னர்ஷிப்
இருப்பினும், நிதிஷ் ராணா தனது முதல் ஐபிஎல் சதத்தை அடிக்கும் வாய்ப்பை நூலிழையில் தவறவிட்டார். அவர் 91 ரன்களில் ஆட்டமிழந்தார். இது ஐபிஎல்-லில் அவரின் அதிகபட்ச ஸ்கோர் ஆகும். ராகுல் - ராணா ஜோடியின் 220 ரன் பார்ட்னர்ஷிப், ஐபிஎல் வரலாற்றில் இரண்டாவது அதிகபட்ச பார்ட்னர்ஷிப் ஆகும். இன்னும் 9 ரன்கள் எடுத்திருந்தால், ஐபிஎல்-லின் அதிகபட்ச பார்ட்னர்ஷிப் சாதனையை முறியடித்திருப்பார்கள். அந்த சாதனை, 2016-ல் குஜராத் லயன்ஸ் அணிக்கு எதிராக ஆர்சிபி-யின் விராட் கோலி மற்றும் ஏபி டி வில்லியர்ஸ் பெயரில் உள்ளது. மூன்றாவது அதிகபட்ச பார்ட்னர்ஷிப் சாதனையும் (215 ரன்கள்) கோலி மற்றும் டி வில்லியர்ஸ் ஜோடி வசமே உள்ளது. 2015-ல் மும்பை இந்தியன்ஸ் அணிக்கு எதிராக அவர்கள் இந்த சாதனையை படைத்தனர்.
டாஸ் வென்று முதலில் பேட்டிங்கைத் தேர்ந்தெடுத்த டெல்லி கேப்பிட்டல்ஸ் அணிக்கு ஆரம்பம் நன்றாக இருந்தாலும், மூன்றாவது ஓவரில் தொடக்க ஆட்டக்காரர் பதும் நிசாங்காவின் விக்கெட்டை இழந்தது. அதன்பிறகு ராகுலுடன் ராணா ஜோடி சேர்ந்து அணியின் ஸ்கோரை வேகமாக உயர்த்தினர். இந்த தொடரில் இதுவரை தோல்வியே சந்திக்காத பஞ்சாப் கிங்ஸ் அணிக்கு, டெல்லி அணி 265 ரன்கள் என்ற இமாலய இலக்கை நிர்ணயித்துள்ளது.
புள்ளிப் பட்டியலில் டெல்லி அணி 6 போட்டிகளில் 3 வெற்றிகளுடன் ஆறாவது இடத்திலும், பஞ்சாப் அணி 6 போட்டிகளில் 5 வெற்றிகளுடன் முதலிடத்திலும் உள்ளன.
