இந்தியா vs இங்கிலாந்து.. டி20 உலகக்கோப்பையில் கெத்து காட்டியது யார்? முழு ரிப்போர்ட்!

டி20 உலகக்கோப்பை அரையிறுதி போட்டியில் இந்தியாவும், இங்கிலாந்து அணிகளும் மோதுகின்றன. டி20 உலகக்கோப்பைகளில் இந்த இரு அணிகளின் செயல்பாடு என்ன? என்பது குறித்து விரிவாக பார்க்கலாம்.

இந்தியா vs இங்கிலாந்து

டி20 உலகக்கோப்பை இறுதிக்கட்டத்தை எட்டியுள்ளது. முதல் அரையிறுதி போட்டியில் மார்ச் 4ம் தேதி நியூசிலாந்தும், தென்னாப்பிரிக்காவும் மோதுகின்றன. டி20 உலகக்கோப்பை இரண்டாவது அரையிறுதி போட்டியில் மார்ச் 5 அன்று மும்பை வான்கடே மைதானத்தில் இந்தியாவும் இங்கிலாந்தும் மோதுகின்றன. இந்திய அணி சூப்பர்-8 சுற்றை தோல்வியுடன் தொடங்கியது. தென்னாப்பிரிக்காவிடம் படுதோல்வி அடைந்தது. ஆனால், ஜிம்பாப்வே, வெஸ்ட் இண்டீஸ் அணிகளை வீழ்த்தி மீண்டு வந்து அரையிறுதிக்கு தகுதி பெற்றது.

யாருக்கு அதிக வெற்றி?

அதே வேளையில் இங்கிலாந்து அணி சூப்பர்-8ல் அனைத்து போட்டிகளிலும் வென்று அரையிறுதிக்கு வந்துள்ளது. டி20 உலககோப்பையில் இந்த இரு அணிகளின் சாதனைகள் எப்படி உள்ளன? இந்த போட்டியின் முடிவை மாற்றக்கூடிய வீரர்கள் யார்? என்பது குறித்து பார்ப்போம். டி20 உலகக்கோப்பை அரையிறுதியில் இந்தியா-இங்கிலாந்து மோதுவது இது 3வது முறை. 2022ல் இங்கிலாந்தும், 2024ல் இந்தியாவும் வென்றன. இதுவரை ஒட்டுமொத்த உலகக்கோப்பைகளில் 5 முறை மோதியதில், இங்கிலாந்து 3, இந்தியா 2 முறை வென்றுள்ளன.

இங்கிலாந்துக்கு எதிராக ஹர்திக் பாண்ட்யா கலக்கல்

இங்கிலாந்துக்கு எதிரான அரையிறுதிகளில் ஹர்திக் பாண்ட்யா 86 ரன்களுடன் முதலிடத்தில் உள்ளார். ரோஹித் (84), சூர்யகுமார் (61), கோலி (59) அடுத்தடுத்த இடங்களில் உள்ளனர். இங்கிலாந்து கேப்டன் பட்லர் 103 ரன்கள் எடுத்துள்ளார். பந்துவீச்சில், குல்தீப் யாதவ் மற்றும் அக்சர் படேல் தலா 3 விக்கெட்டுகளுடன் முன்னிலையில் உள்ளனர். இங்கிலாந்தின் கிறிஸ் ஜோர்டான் 6 விக்கெட்டுகளை வீழ்த்தியுள்ளார். வான்கடே பிட்ச் சுழற்பந்து வீச்சுக்கு சாதகமாக இருக்கும் என்பது குறிப்பிடத்தக்கது.

அபிஷேக் சர்மாவின் பார்ம் கவலை

இதற்கிடையே நடப்பு டி20 உலகக்கோப்பையில் படுமோசமாக விளையாடி வரும் அபிஷேக் சர்மா தனது பேட்டிங் நுட்பத்தில் கவனம் செலுத்த வேண்டும் என்று முன்னாள் வீரர் இர்பான் பதான் தெரிவித்துள்ளார். இது தொடர்பாக பேசிய அவர், ''நடப்பு டி20 உலகக்கோப்பையில் மீண்டும் அபிஷேக் ஷர்மாவின் ஃபார்ம் ஒரு கவலையாக உள்ளது. அந்த அரைசதத்திற்குப் பிறகு, அவர் தொடர்ந்து ரன்கள் குவிப்பார் என்று தோன்றியது. 

ஆனால், அவர் அந்த ஷாட்டை ஆடியபோது, அவரது பின்னங்கால் முட்டி அதிகமாக வளைந்து, உடல் எடை பின்னோக்கிச் சென்றது. உண்மையில், அதிக எடை முன்னங்காலில் இருந்திருக்க வேண்டும், அதுதான் அவருக்குப் பொருத்தமானது. இதில் அவர் கவனம் செலுத்த வேண்டும்'' என்றார்.