அவரை மாதிரி டேலண்ட் தேடினாலும் கிடைக்காது.. ஒதுக்காமல் டீம்ல எடுங்க.! டிராவிட்டுக்கு கம்பீர் அறிவுரை

பிரித்வி ஷா மாதிரியான திறமையான வீரரை இழந்துவிட்டு, பின்னர் தேடக்கூடாது. எனவே அவருக்கு சரியான வழிகாட்டி முறைப்படுத்தி அணியில் எடுக்க வேண்டும் என்று பயிற்சியாளர் ராகுல் டிராவிட் மற்றும் இந்திய அணி நிர்வாகத்திற்கு கௌதம் கம்பீர் அறிவுறுத்தியுள்ளர்.  

இந்திய கிரிக்கெட்டின் எதிர்காலமாக திகழும் ஏகப்பட்ட இளம் வீரர்களில் பிரித்வி ஷா முக்கியமான வீரர். இந்திய டெஸ்ட் அணியில் 2018ம் ஆண்டே இடம்பிடித்த பிரித்வி ஷா, காயம் காரணமாக இந்திய அணியில் தனக்கான நிரந்தர இடம்பிடிக்க முடியாமல் திணறிவருகிறார். 

மற்ற இளம் வீரர்களைவிட விரைவில் இந்திய அணியில் தனக்கான இடத்தை பிடித்துவிடுவார் என்று எதிர்பார்க்கப்பட்ட வீரர் பிரித்வி ஷா. அறிமுக டெஸ்ட்டிலேயே சதம் அடித்து சாதனை படைத்த வீரர் பிரித்வி ஷா. அப்போதைய பயிற்சியாளர் ரவி சாஸ்திரி, இவரை சச்சின், லாரா, சேவாக் ஆகியோர் கலந்த கவலை என்று புகழாரம் சூட்டியிருந்தார். ஆனால் அவரது ஃபிட்னெஸ் பிரச்னையால் தனக்கான வாய்ப்பை இழந்தார். அந்த காலக்கட்டத்தில், ஷுப்மன் கில், ருதுராஜ் கெய்க்வாட் ஆகிய டாப் ஆர்டர் வீரர்கள் இந்திய அணியில் இடம்பிடித்துவிட்டனர்.

ஆனால் பிரித்வி ஷாவின் பேட்டிங் திறமை அனைவரும் அறிந்ததுதான். இயல்பாகவே மிகச்சிறந்த பேட்டிங் திறமையை கொண்ட அசாத்திய வீரர். அசாதாரணமான இன்னிங்ஸ்களை அவ்வப்போது ஆடி அசத்திவிடுவார். மிகத்திறமையான வீரராக இருந்தும் கூட, இந்திய அணியிலிருந்து ஓரங்கட்டப்பட்ட பிரித்வி ஷாவுக்கு மீண்டும் இடம் கிடைக்கவில்லை. அதன்பின்னர் எத்தனையோ இளம் வீரர்களுக்கு இந்திய அணியில் இடம் கிடைத்தபோதிலும், பிரித்வி ஷாவுக்கு இடம் கிடைக்கவில்லை.

இலங்கைக்கு எதிரான டி20 மற்றும் ஒருநாள் தொடர்களுக்கான இந்திய அணியிலும் பிரித்வி ஷாவுக்கு இடம் கிடைக்கவில்லை. பிரித்வி ஷாவுக்கு பின்னர் அணியில் இடம்பிடித்த வீரர்களுக்கு தொடர் வாய்ப்பளிக்கப்படும் நிலையில், பிரித்வி ஷாவுக்கு கம்பேக் சான்ஸ் வழங்கப்படவில்லை. அவருக்கு ஒழுக்க ரீதியான சில பிரச்னைகள் இருக்கிறதென்றாலும், அதை சரி செய்வதுதானே பயிற்சியாளர்களின் பணி என்பதென்னவோ உண்மைதான்.

அதைத்தான் கௌதம் கம்பீரும் தெரிவித்துள்ளார். இதுகுறித்து பேசிய கௌதம் கம்பீர்,  பயிற்சியாளர்கள் எதற்கு இருக்கிறார்கள்? அணிக்கு பயிற்சியளித்து போட்டிக்கு தயார் செய்வது மட்டும் பயிற்சியாளர்களின் பணியல்ல. பிரித்வி ஷா மாதிரியான வீரருக்கு பயிற்சியாளர்களும் தேர்வாளர்களும் உதவவேண்டும்.

பிரித்வி ஷா எப்பேர்ப்பட்ட திறமைசாலி என்று நமக்கு தெரியும். அவரை மீண்டும் அணியில் எடுத்து சரியான பாதையில் வழிநடத்த வேண்டும். பிரித்வி ஷா அபார திறமைசாலி. அவரை ஒதுக்கிவிட்டால், பின்னர் அவர் மாதிரியான திறமையான வீரர் தேடினாலும் கிடைக்கமாட்டார் என்று கம்பீர் கூறியுள்ளார்.