Protein deficiency: உங்கள் உடலில் புரதச்சத்து குறைவாக உள்ளது என்பதை காட்டும் 5 முக்கிய அறிகுறிகள்!

நமது உடல் வளர்ச்சிக்கும், தசை மற்றும் திசுக்களின் ஆரோக்கியத்திற்கும் புரதச்சத்து (Protein) மிகவும் அவசியம். ஆனால், பலர் இதை உணவில் போதிய அளவு சேர்ப்பதில்லை. உடலில் புரதச்சத்து குறையும் போது ஏற்படும் முக்கிய எச்சரிக்கை அறிகுறிகளை இனி பார்ப்போம்.

சாப்பிட்ட உடனேயே மீண்டும் பசி எடுத்தல் :

வழக்கமாக நாம் சாப்பிடும் உணவு, பல மணி நேரங்களுக்கு நமக்குத் தேவையான ஆற்றலைத் தந்து பசியைத் தாங்க வேண்டும். ஆனால், சாப்பிட்டு முடித்த சில நிமிடங்களிலேயே அல்லது மிக விரைவாகவே உங்களுக்கு மீண்டும் பசி எடுத்தால், நீங்கள் சாப்பிட்ட உணவில் போதிய புரதச்சத்து இல்லை என்று அர்த்தம். புரதம் நிறைந்த உணவுகள் பசியைக் கட்டுப்படுத்தும் ஹார்மோன்களைத் தூண்டி, வயிறு நிறைந்த உணர்வை நீண்ட நேரம் தக்கவைக்க உதவும். புரதம் குறையும் போது இந்த சமிக்ஞை சீக்கிரம் மறைந்து, அடிக்கடி பசி எடுக்கிறது.

தசை வலிமை மற்றும் எடை குறைதல் :

நமது தசைகளை உருவாக்கவும், அவற்றைப் பராமரிக்கவும் புரதம் இன்றியமையாதது. தசை திசுக்கள் தொடர்ந்து அழியும், மீண்டும் உருவாகும் சுழற்சியைக் கொண்டவை. உணவில் போதிய புரதம் இல்லாதபோது, புதிய தசைகள் உருவாவது தடைபட்டு, தசை இழப்பு (Muscle loss) ஏற்படும். இதனால் உடலின் பலம் குறைந்து, சோர்வு அதிகமாகும்.

முடி மெலிந்து கொட்டுதல் :

தலைமுடி உதிர்வதற்குப் பல காரணங்கள் இருந்தாலும், அதில் முக்கியமானது புரதச்சத்துக் குறைபாடாகும். நமது தலைமுடி 'கெரட்டின்' (Keratin) என்ற புரதத்தால் ஆனது. உடலில் புரதத்தின் அளவு குறையும் போது, உடல் தனக்குக் கிடைக்கும் குறைந்த அளவு புரதத்தை முக்கியமான உள் உறுப்புகளுக்குப் பயன்படுத்திக் கொள்ளும். இதனால் தலைமுடிக்குச் செல்லும் புரதம் தடைபட்டு, முடி மெலிதாகி உதிரத் தொடங்கும்.

காயங்கள் ஆற நீண்ட காலம் ஆகுதல் :

உடலில் ஏற்படும் வெட்டுக் காயங்கள், சிராய்ப்புகள் போன்றவை குணமடைவதற்குக் கொலாஜன் மற்றும் புதிய திசுக்கள் தேவை. இவற்றை உருவாக்குவதில் புரதத்தில் உள்ள அமினோ அமிலங்கள் முக்கியப் பங்கு வகிக்கின்றன. உடலில் புரதச்சத்து போதிய அளவில் இல்லை என்றால், திசுக்களைப் புதுப்பிக்கும் வேகம் குறைந்து, காயங்கள் ஆறுவதற்கு வழக்கத்தை விட அதிக நாட்கள் எடுக்கும்.

நன்றாகத் தூங்கிய பிறகும் சோர்வாக இருத்தல் :

இரவு முழுவதும் நன்றாக உறங்கிய பிறகும், பகலில் கடுமையான சோர்வையும் பலவீனத்தையும் உணர்கிறீர்களா? அப்படியென்றால் உங்கள் உடலில் புரதம் குறைவாக இருக்கலாம். தசை வலிமை, உடலின் வளர்சிதை மாற்றம் (Metabolism) மற்றும் ஆற்றல் உற்பத்திக்குத் தேவையான என்சைம்கள் சுரக்கப் புரதம் தேவைப்படுகிறது. இதன் குறைபாடு உடலின் ஒட்டுமொத்த சுறுசுறுப்பைக் குறைத்து, எந்நேரமும் சோர்வாக வைத்திருக்கக்கூடும்.