Crispy Spicy Thattai : மொறு மொறு கார தட்டை..கடைகளில் வாங்க வேண்டாம்! வீட்டிலேயே ஈஸியா செய்யலாம்

Crispy Spicy Thattai : தீபாவளிக்கு வீட்டிலேயே மொறு மொறுப்பான கார தட்டை செய்வது எப்படி? பச்சரிசி மாவு, வேர்க்கடலை, கடலைப்பருப்பு, பூண்டு சேர்த்து சுவையான தட்டை தயாரிக்கும் எளிய செய்முறை, தேவையான பொருட்கள் மற்றும் முக்கிய சமையல் டிப்ஸ் இதோ.

மொறு மொறு கார தட்டை

தீபாவளி என்றாலே வீட்டில் பலகார வாசனை கமகமக்க வேண்டும். இனிப்புகளுக்கு நடுவே காரசாரமாக, ஒவ்வொரு கடியிலும் மொறு மொறு சத்தத்துடன் சாப்பிட ஒரு சூப்பரான பலகாரம் இருந்தால் எப்படி இருக்கும்? கடைகளில் வாங்கும் ஸ்நாக்ஸை மறக்கடிக்கும் அளவுக்கு ருசியான மொறு மொறு கார தட்டை வீட்டிலேயே எளிதாகத் தயாரிக்கலாம்.

பச்சரிசி மாவு, உளுத்தம் பருப்பு மாவு, வறுத்த வேர்க்கடலை, பூண்டு, கறிவேப்பிலை என மணமணக்கும் பொருட்கள் சேர்த்து செய்யப்படும் இந்த கார தட்டை, தீபாவளி பலகாரத் தட்டில் கட்டாயம் இடம்பெற வேண்டிய ஒரு ஸ்பெஷல்.

மாலை நேர டீ, காபியுடன் சாப்பிடவும், உறவினர்களுக்கு தீபாவளி பலகாரமாகக் கொடுக்கவும் ஏற்றது. சரியான பக்குவத்தில் மாவு பிசைந்து, மிதமான தீயில் பொரித்தால் நீண்ட நேரம் மொறு மொறுப்பாக இருக்கும்.

தேவையான பொருட்கள்

• பச்சரிசி மாவு - 2 கப்
• உளுத்தம் பருப்பு மாவு - 2 டேபிள் ஸ்பூன்
• வறுத்த வேர்க்கடலை - 1\4 கப்
• கடலைப்பருப்பு - 2 டேபிள் ஸ்பூன்
• கறிவேப்பிலை - சிறிதளவு
• பூண்டு - 4-5 பல்
• மிளகாய்த்தூள் - 1 - 1 1\2 டீஸ்பூன்
• பெருங்காயத்தூள் - ¼ டீஸ்பூன்
• உப்பு - தேவையான அளவு
• சூடான எண்ணெய் - 2 டேபிள் ஸ்பூன்
• பொரிக்க எண்ணெய் - தேவையான அளவு
• தண்ணீர் - தேவையான அளவு

மொறு மொறு கார தட்டை செய்முறை - படி 1

மாவு தயாரித்தல்

முதலில் ஒரு கடாயில் உளுந்தைச் சேர்த்து மிதமான தீயில் நன்கு வாசனை வரும் வரை வறுத்து எடுத்துக்கொள்ளவும். பின்னர் ஆறவைத்து மிக்ஸியில் பொடியாக அரைத்து உளுத்தம் பருப்பு மாவாகத் தயாரித்துக் கொள்ளவும்.

படி 2

• அடுத்தது ஒரு அகலமான பாத்திரத்தில் பச்சரிசி மாவு மற்றும் அரைத்த உளுத்தம் பருப்பு மாவைச் சேர்த்து நன்றாகக் கலக்கவும்.
• வறுத்த வேர்க்கடலையை இடித்து ஒன்றும் பாதியுமா சேர்க்கவும்.
• கடலைப்பருப்பை 20 -30 நிமிடங்கள் தண்ணீரில் ஊறவைத்து வடிகட்டி சேர்க்கவும்.

படி 3

காரத்திற்கான பொருட்களைச் சேர்த்தல்

கறிவேப்பிலையை பொடியாக நறுக்கிச் சேர்க்கவும். பூண்டை தோலுடன் இடித்து சேர்க்கவும். அதனுடன் மிளகாய்த்தூள், உப்பு, பெருங்காயத்தூள் ஆகியவற்றையும் சேர்த்து நன்றாகக் கலக்கவும்.

படி 4

மாவை பிசைதல்

இந்த மாவுக் கலவையில் 2 டேபிள் ஸ்பூன் சூடான எண்ணெயை ஊற்றி நன்றாகக் கலந்து கொள்ளவும். பின்னர் சிறிது சிறிதாகத் தண்ணீர் தெளித்து, கையில் ஒட்டாத அதே நேரத்தில் மென்மையாகவும், விரிசல் இல்லாமலும் இருக்கும் பதத்தில் மாவைப் பிசையவும்.

குறிப்பு: மாவை மிகவும் கெட்டியாகப் பிசைந்தால் தட்டை கடினமாகிவிடும். அதிக தண்ணீர் சேர்த்தால் எண்ணெயில் பொரிக்கும்போது அதிக எண்ணெய் குடிக்கலாம்.

படி 5

தட்டை வடிவம் செய்தல்

பிசைந்த மாவிலிருந்து சிறிய உருண்டைகளை எடுத்துக்கொள்ளவும். ஒரு பிளாஸ்டிக் கவர் அல்லது வாழை இலையில் சிறிது எண்ணெய் தடவி, மாவு உருண்டையை வைத்து விரல்களால் மெல்லிய வட்டமாகத் தட்டவும். தட்டை மிகவும் தடிமனாக இல்லாமல், ஒரே சீரான அளவில் தட்டுவது முக்கியம்.

படி 6

எண்ணெயில் பொரித்தல்

ஒரு கடாயில் எண்ணெயை ஊற்றி மிதமான சூட்டில் காயவைக்கவும். எண்ணெய் சூடானதும் தட்டைகளை மெதுவாகப் போட்டு, மிதமான தீயில் பொரிக்கவும். தட்டை மேலே மிதந்து வந்ததும் திருப்பிப் போட்டு இருபுறமும் பொன்னிறமாகவும், மொறு மொறுப்பாகவும் வரும் வரை பொரிக்கவும்.

பொரிக்கும்போது தீயை அதிகமாக வைக்க வேண்டாம். அப்படி வைத்தால் வெளிப்புறம் மட்டும் சிவந்து உள்ளே வேகாமல் போகலாம். பொரித்த தட்டைகளை எண்ணெய் வடிகட்டியில் அல்லது பேப்பர் டவலில் எடுத்து வைக்கவும்.

படி 7

ஆறவைத்து பரிமாறுதல்

தட்டைகள் முழுமையாக ஆறியதும் மொறு மொறுப்பான பதத்திற்கு வரும். சுவையான கார தட்டையை சூடான டீ அல்லது காபியுடன் பரிமாறலாம். தீபாவளி பலகாரமாகத் தயாரித்தால் முழுமையாக ஆறிய பிறகு காற்றுப்புகாத டப்பாவில் சேமிக்கவும்.

கார தட்டை மொறு மொறுப்பாக வர சில முக்கிய டிப்ஸ்

• பச்சரிசி மாவை நன்றாகச் சலித்துப் பயன்படுத்தினால் தட்டை மென்மையாகவும் ஒரே சீராகவும் வரும்.
• வேர்க்கடலையை முழுவதுமாகச் சேர்க்காமல் கொரகொரப்பாகப் பொடித்துச் சேர்த்தால் தட்டை தட்டும்போது உடையாது.
• கடலைப்பருப்பை ஊறவைத்துச் சேர்ப்பதால் பொரித்த தட்டையில் கடலைப்பருப்பு கடிக்கும் சுவை கிடைக்கும்.
• மாவைத் தட்டும்போது மிகவும் தடிமனாகத் தட்ட வேண்டாம்.
• எண்ணெய் அதிக சூடாக இருந்தால் தட்டை கருகிவிடும்; குறைந்த சூட்டில் பொரித்தால் எண்ணெய் அதிகம் குடிக்கும்.
• ஒரே நேரத்தில் அதிக தட்டைகளைப் போடாமல், சிறிது சிறிதாகப் பொரிக்கவும்.
• தட்டை முழுமையாக ஆறிய பிறகே டப்பாவில் அடைக்கவும்.

தீபாவளிக்கு முன்கூட்டியே செய்து வைக்கலாமா?

கார தட்டையை தீபாவளிக்கு ஒரு நாள் அல்லது இரண்டு நாட்களுக்கு முன்பே தயாரித்து வைக்கலாம். முழுமையாக ஆறிய பிறகு காற்றுப்புகாத டப்பாவில் சேமிக்கவும். ஈரப்பதம் படாமல் பார்த்துக்கொண்டால் மொறு மொறுப்பான தன்மை நீடிக்கும்.

சூப்பரான தீபாவளி பலகாரம் ரெடி

வீட்டிலேயே எளிமையாகச் செய்த இந்த கார தட்டை, இனிப்புகளுக்கு நடுவே காரசாரமான சுவையைத் தருவதோடு, குடும்பத்தினர் அனைவரும் விரும்பிச் சாப்பிடும் ஸ்நாக்ஸாகவும் இருக்கும். வெறும் அரிசி மாவில் இத்தனை ருசியா என்று கேட்கும் அளவுக்கு ஒருமுறை செய்து பாருங்கள்.