Homemade Biryani Masala : ஹோட்டல் சுவையில் பிரியாணி வீட்டிலேயே செய்ய வேண்டுமா? பட்டை, கிராம்பு, ஏலக்காய் உள்ளிட்ட நறுமண மசாலா பொருட்களை வைத்து பிரியாணி மசாலா பொடி தயாரிப்பது எப்படி? தேவையான பொருட்கள், செய்முறை, சேமிப்பு குறிப்புகள் இதோ.
ஹோட்டலில் கிடைக்கும் பிரியாணியின் வாசனை வீட்டுக்குள்ளேயே கமகமக்க வேண்டுமா? நீங்கள் செய்யும் சிக்கன் பிரியாணி, மட்டன் பிரியாணி அல்லது காய்கறி பிரியாணி என எதுவாக இருந்தாலும், அதன் சுவையை அடுத்த லெவலுக்கு கொண்டு செல்ல ஒரு ரகசியம் இருக்கிறது. அதுதான் வீட்டிலேயே தயாரிக்கும் மணமணக்கும் பிரியாணி மசாலா பொடி.
கடைகளில் வாங்கும் மசாலா பொடிகளை விட, நமக்குப் பிடித்த மசாலா பொருட்களை சரியான அளவில் சேர்த்து வீட்டிலேயே தயாரித்தால், அதன் நறுமணமும் சுவையும் தனித்துவமாக இருக்கும். ஒருமுறை இந்த மசாலா பொடியை தயார் செய்து வைத்துவிட்டால், பிரியாணி செய்யும்போது கொஞ்சம் சேர்த்தாலே போதும்; சமையலறையே பிரியாணி வாசனையில் மிதக்கும்.
வாங்க, சுவையான பிரியாணியின் ரகசியமான இந்த ஹோம்மேட் பிரியாணி மசாலா பொடியை எளிமையாக எப்படி தயாரிப்பது என்று பார்க்கலாம்.
29
தேவையான பொருள்கள்
இந்த அளவுகளில் தயாரித்தால் சுமார் 100 - 120 கிராம் பிரியாணி மசாலா பொடி கிடைக்கும்.
பட்டை - 4–5 சிறிய துண்டுகள் (10 கிராம்)
கிராம்பு - 2 தேக்கரண்டி
ஏலக்காய் - 2 தேக்கரண்டி
மிளகு- 2 தேக்கரண்டி
சீரகம் - 2 தேக்கரண்டி
சோம்பு - 2 தேக்கரண்டி
தனியா - 4 தேக்கரண்டி
அன்னாசிப்பூ - 2
மராத்தி மொக்கு - 3
கல்பாசி - 2 சிறிய துண்டுகள்
ஜாதிப்பத்திரி - 2 சிறிய துண்டுகள்
பிரியாணி இலை - 2
ஜாதிக்காய் - 2
காய்ந்த மிள்காய் - 2
39
பிரியாணி மசாலா பொடி செய்முறை - படி 1
மசாலா பொருட்களை தயார் செய்தல்
முதலில் பட்டை, கிராம்பு, ஏலக்காய், மிளகு, சீரகம், சோம்பு, தனியா, அன்னாசிப்பூ, மராத்தி மொக்கு, கல்பாசி, ஜாதிப்பத்திரி மற்றும் பிரியாணி இலை ஆகியவற்றை எடுத்துக்கொள்ளவும். மசாலா பொருட்களில் ஈரப்பதம் இல்லாமல் இருக்க வேண்டும். தேவையெனில் சுத்தமான துணியில் பரப்பி சிறிது நேரம் உலர்த்திக் கொள்ளலாம்.
முதலில் ஒரு வாணலியை அடுப்பில் வைத்து மிதமான தீயில் சூடாக்கவும்.
அதில் தனியா, சீரகம், சோம்பு ஆகியவற்றை சேர்த்து வாசனை வரும் வரை வறுக்கவும்.
பின்னர் பட்டை, கிராம்பு, ஏலக்காய், மிளகு ஆகியவற்றை சேர்த்து வறுக்கவும்.
அன்னாசிப்பூ, மராத்தி மொக்கு, கல்பாசி, ஜாதிப்பத்திரி மற்றும் பிரியாணி இலை, காய்ந்த மிள்காய் ஆகியவற்றையும் சேர்த்து குறைந்த தீயில் வறுக்கவும்.
ஜாதிக்காய் சேர்ப்பதாக இருந்தால், அதை சிறிய துண்டுகளாக உடைத்து லேசாக வறுக்கவும்.
முக்கிய குறிப்பு: மசாலா பொருட்கள் கருகிவிடக் கூடாது. குறைந்த தீயில் தொடர்ந்து கிளறி, நல்ல மணம் வரும் வரை மட்டும் வறுக்க வேண்டும்.
59
படி 3
மசாலாவை ஆறவைத்தல்
வறுத்த மசாலா பொருட்களை ஒரு தட்டில் கொட்டி முழுமையாக ஆறவிடவும். சூடாக இருக்கும்போதே அரைத்தால், மசாலாவில் ஈரப்பதம் உருவாகி பொடியின் தரம் பாதிக்கப்படலாம்.
69
படி 4
மசாலா பொடியாக அரைத்தல்
ஆறிய மசாலா பொருட்களை மிக்ஸி ஜாரில் போட்டு நைசாக அரைத்துக் கொள்ளவும். மிக்ஸியை தொடர்ந்து இயக்காமல், இடையிடையே நிறுத்தி அரைத்தால் மசாலா அதிகமாக சூடாகாமல் இருக்கும். தேவைப்பட்டால் சல்லடையில் சலித்து, பெரிய துண்டுகளை மீண்டும் அரைத்துக் கொள்ளலாம்.
79
படி 5
சேமித்து வைத்தல்
தயாரான பிரியாணி மசாலா பொடியை முழுமையாக ஆறிய பிறகு, சுத்தமான காற்றுப்புகாத கண்ணாடி ஜாடியில் சேமிக்கவும். ஈரமான கரண்டியை பயன்படுத்த வேண்டாம். நேரடி வெயில் மற்றும் அடுப்பின் வெப்பம் படாத இடத்தில் வைத்திருக்கவும்.
89
இந்த மசாலா பொடியை எந்த உணவுகளில் பயன்படுத்தலாம்?
இந்த மசாலா பொடியை,
சிக்கன் பிரியாணி
மட்டன் பிரியாணி
காய்கறி பிரியாணி
காளான் பிரியாணி
முட்டை பிரியாணி
தம் பிரியாணிக்கு பயன்படுத்தலாம்.
சுவையான பிரியாணியின் ரகசியம்: தரமான அரிசி, சரியான மசாலா அளவு, பொறுமையான சமையல் ஆகியவற்றுடன் வீட்டில் தயாரித்த இந்த மசாலா பொடியையும் சேர்த்தால், பிரியாணியின் மணமும் சுவையும் நிச்சயம் தனித்துவமாக இருக்கும்.
பிரியாணிக்கு இந்த மசாலா பொடியை எவ்வளவு சேர்க்க வேண்டும்?
பிரியாணி வகையும், மசாலா பொடியின் அளவும்
1\2 கிலோ சிக்கன் பிரியாணி - 1 1\2 –2 தேக்கரண்டி
1\2 கிலோ மட்டன் பிரியாணி - 2 - 2 1\2 தேக்கரண்டி
1\2 கிலோ காய்கறி பிரியாணி- 1 - 1 1\2 தேக்கரண்டி
1 கிலோ பிரியாணி - 3 - 4 தேக்கரண்டி
இவை பொதுவான அளவுகள். உங்கள் சுவைக்கு ஏற்ப மசாலா அளவை மாற்றிக் கொள்ளலாம்.
99
சுவையான பிரியாணி தயாரிக்க சில ரகசிய குறிப்புகள்
மசாலா பொருட்களை தனித்தனியாக வறுத்தால் ஒவ்வொன்றின் மணத்தையும் சரியாக வெளிக்கொண்டு வரலாம்.
கல்பாசி, மராத்தி மொக்கு போன்ற பொருட்களை அளவுக்கு அதிகமாக சேர்த்தால் பிரியாணியின் சுவை மாறலாம்.
மசாலா பொடியை பிரியாணி சமைக்கும்போது வெங்காயம், தக்காளி, இஞ்சி-பூண்டு விழுது வதங்கிய பிறகு சேர்த்தால் நன்றாக மணக்கும்.
மசாலா பொடியை அதிகமாக சேர்ப்பதை விட, சரியான அளவில் சேர்ப்பதே பிரியாணியின் சுவையை சமநிலைப்படுத்தும்.
சிறிய அளவில் தயாரித்து 1- 2 மாதங்களுக்குள் பயன்படுத்தினால் நறுமணம் சிறப்பாக இருக்கும். நீண்ட நாட்கள் சேமிக்க வேண்டுமெனில் குளிர்சாதனப் பெட்டியில் காற்றுப்புகாத டப்பாவில் வைக்கலாம்.
குறிப்பு: இது வீட்டில் தயாரிக்கும் பொதுவான பிரியாணி மசாலா கலவை. சென்னை, ஆம்பூர், திண்டுக்கல், ஹைதராபாத் போன்ற பிரியாணி வகைகளுக்கு ஏற்ப மசாலா கலவையின் அளவுகளும் சுவையும் மாறுபடும்.
