healthy rice varieties: அரிசி உணவு சாப்பிட்டாலும் ஆரோக்கியமா இருக்கணுமா? இந்த 5 வகை அரிசிகளை பயன்படுத்துங்க

அரிசி உணவுகள் அதிகம் சாப்பிடுவதால் கார்போஹைட்ரேட்களின் அளவு அதிகரித்து, டயபடிக்சிஸ் போன்ற நோய்கள் வரும் என சொல்லப்படுகிறது. இவற்றை தடுக்க ஆரோக்கியம் தரும், பாரம்பரிய இந்த 5 வகையான அரிசி வகைகளை உணவாக எடுத்துக் கொள்ளுங்கள்.

மாப்பிள்ளை சம்பா :

அக்காலத்தில் புதிதாக திருமணமான மாப்பிள்ளைகள், சல்லிக்கட்டு போன்ற வீர விளையாட்டுகளில் பங்கேற்பதற்கு முன்பு, இந்த அரிசியில் செய்யப்பட்ட உணவை உட்கொண்டால் உடல் வலிமையும், சக்தியும் பெறும் என்ற நம்பிக்கை இருந்தது. அதனாலேயே இது "மாப்பிள்ளை சம்பா" என்று அழைக்கப்பட்டது. மாப்பிள்ளை சம்பா அரிசியில் நார்ச்சத்து, இரும்புச்சத்து, துத்தநாகம், மெக்னீசியம் போன்ற அத்தியாவசிய தாதுக்கள் நிறைந்துள்ளன. மேலும், இதில் வைட்டமின் பி காம்ப்ளக்ஸ் சத்துக்களும் காணப்படுகின்றன.

ஆரோக்கிய நன்மைகள்: இந்த அரிசியில் உள்ள கார்போஹைடிரேட்டுகள் மெதுவாக செரிமானம் ஆவதால், நீண்ட நேரத்திற்கு ஆற்றலை வழங்குகிறது. இது உடல் சோர்வைப் போக்கி, உடல் வலிமையை அதிகரிக்கிறது. இதில் உள்ள மெக்னீசியம் மற்றும் கால்சியம் சத்துக்கள் எலும்புகளை பலப்படுத்த உதவுகின்றன. இதன் குறைந்த கிளைசெமிக் குறியீடு (Low Glycemic Index) இரத்த சர்க்கரை அளவை சீராக வைத்திருக்க உதவுகிறது.

கருப்பு கவுனி :

இதன் தனித்துவமான அடர் கருப்பு நிறம் காரணமாக "கருப்பு கவுனி" என்று அழைக்கப்படுகிறது. கருப்பு கவுனி அரிசி ஒரு "சூப்பர்ஃபுட்" என்றே சொல்லலாம். இதில் ஆந்தோசயனின் (Anthocyanin) என்ற சக்திவாய்ந்த ஆன்டிஆக்ஸிடன்ட் நிறைந்துள்ளது. மேலும், நார்ச்சத்து, புரதம், இரும்புச்சத்து, வைட்டமின் ஈ போன்ற சத்துக்களும் இதில் உள்ளன.

ஆரோக்கிய நன்மைகள்:ஆந்தோசயனின் புற்றுநோய் செல்களின் வளர்ச்சியை தடுப்பதில் முக்கிய பங்காற்றுகிறது. இதில் உள்ள நார்ச்சத்து கொழுப்பின் அளவைக் குறைத்து, இதய ஆரோக்கியத்தை மேம்படுத்துகிறது. மேலும், செரிமான மண்டலத்தை சீராக இயங்க வைக்கிறது.

காட்டுயானம் :

இந்த நெல் ரகம் மிகவும் உயரமாகவும், வலுவாகவும் வளரும் தன்மையுடையது என்பதால் "காட்டுயானம்" என்று அழைக்கப்படுகிறது. பண்டைய காலத்தில் காட்டு யானைகள் இந்த நெற்பயிர்களை சேதப்படுத்த முடியாது என்று சொல்லப்படுகிறது. காட்டுயானம் அரிசியில் நார்ச்சத்து, புரதம், துத்தநாகம், இரும்புச்சத்து, கால்சியம் போன்ற சத்துக்கள் அதிகமாக உள்ளன.

ஆரோக்கிய நன்மைகள்: இதில் உள்ள ஆன்டிஆக்ஸிடன்ட்கள் மற்றும் தாதுக்கள் நோய் எதிர்ப்பு சக்தியை அதிகரிக்க உதவுகின்றன. இதன் குறைந்த கிளைசெமிக் குறியீடு இரத்த சர்க்கரை அளவை சீராக பராமரிக்க உதவுகிறது. காட்டுயானம் அரிசியை தொடர்ந்து உட்கொள்வதன் மூலம் இதய நோய் அபாயம் குறைகிறது. மேலும், இதில் உள்ள பினாலிக் சேர்மங்கள் (Phenolic compounds) புற்றுநோய் செல்களின் வளர்ச்சியை தடுக்க உதவுகின்றன.

பூங்கார் :

பூங்கார் அரிசி பார்ப்பதற்கு சற்று இளஞ்சிவப்பு நிறத்தில் பூங்கார் பூவை ஒத்திருக்கும் என்பதால் இப்பெயர் பெற்றது. பூங்கார் அரிசியில் இரும்புச்சத்து, துத்தநாகம், மெக்னீசியம், வைட்டமின் பி, ஆன்டிஆக்ஸிடன்ட்கள் நிறைந்துள்ளன.

ஆரோக்கிய நன்மைகள்: இந்த அரிசி பெண்களின் ஆரோக்கியத்திற்கு மிகவும் உகந்தது. கருவுற்ற தாய்மார்கள் மற்றும் பாலூட்டும் தாய்மார்களுக்கு சிறந்த ஊட்டச்சத்தை அளிக்கிறது. பிரசவத்திற்குப் பிந்தைய உடல்நலப் பிரச்சனைகளை சமாளிக்க உதவுகிறது. கருப்பை சுருக்கங்களை சீராக்கி, சீரான மாதவிடாய்க்கு உதவுகிறது. இதில், இரும்புச்சத்து நிறைந்துள்ளதால் இரத்த சோகைக்கு மிகவும் நல்லது.

சீரக சம்பா :

சீரக சம்பா அரிசி, அதன் சிறிய அளவு மற்றும் சீரகத்தின் வாசனையை ஒத்த மணம் காரணமாக இப்பெயர் பெற்றது. சீரக சம்பா அரிசியில் நார்ச்சத்து, செலினியம், வைட்டமின் பி1 (தியாமின்) போன்ற சத்துக்கள் உள்ளன.

ஆரோக்கிய நன்மைகள்:இதில் உள்ள நார்ச்சத்து செரிமானத்தை மேம்படுத்தி, மலச்சிக்கலை தடுக்கிறது. மேலும், கொழுப்பின் அளவைக் கட்டுக்குள் வைத்திருக்க உதவுகிறது. இதில் உள்ள வைட்டமின் பி1 நரம்பு மண்டலத்தின் சீரான செயல்பாட்டிற்கு அத்தியாவசியமானது. செலினியம் புற்றுநோய் செல்களின் வளர்ச்சியை தடுப்பதில் முக்கிய பங்காற்றுகிறது. இதன் கிளைசெமிக் குறியீடு சற்று குறைவாக இருப்பதால், நீரிழிவு நோயாளிகளுக்கு மிதமாக உட்கொள்ளலாம்.