வாரிசு படத்தை இங்கிலாந்தில் வெளியிடும் நிறுவனம், அப்படத்திற்கான டிக்கெட் முன்பதிவை ஒரு மாதத்திற்கு முன் தொடங்க இருப்பதாக அறிவித்து உள்ளது.
விஜய் நடித்துள்ள வாரிசு திரைப்படம் பொங்கல் பண்டிகைக்கு ரிலீசாக உள்ளது. வம்சி இயக்கியுள்ள இப்படத்தை தில் ராஜு தயாரித்துள்ளார். இப்படத்தில் விஜய்க்கு ஜோடியாக ராஷ்மிகா மந்தனா நடித்திருக்கிறார். மிகப்பெரிய நட்சத்திர பட்டாளமே நடித்துள்ள இப்படத்திற்கு தமன் இசையமைத்துள்ளார். அவரது இசையில் இதுவரை இரண்டு பாடல்கள் வெளியாகி உள்ளன.
இதில் முதலில் வெளியான ரஞ்சிதமே பாடலை விஜய் பாடியிருந்தார். அதேபோல் கடந்த வாரம் வெளிவந்த தீ தளபதி என்கிற பாடலை நடிகர் சிம்பு பாடியது மட்டுமின்றி அதற்காக உருவாக்கப்பட்ட புரோமோ வீடியோவில் நடனமாடியும் அசத்தி இருந்தார். இவ்வாறு இப்படம் குறித்த அப்டேட்டுகள் ஒருபக்கம் வந்தாலும், படத்தின் ரிலீஸ் பணிகளும் மறுபுறம் ஜோராக நடந்து வருகிறது.
இதையும் படியுங்கள்... கமலின் அடுத்த படம் டிராப் ஆனது? உலகநாயகனுக்காக 2 ஆண்டுகள் காத்திருந்த இயக்குனருக்கு கல்தா..!
அஜித்தின் துணிவு படத்துக்கு போட்டியாக வாரிசு படம் ரிலீஸ் ஆவதால், வசூலில் யார் வெற்றிவாகை சூடப்போவது என்கிற எதிர்பார்ப்பும் இருந்து வருகிறது. பெரும்பாலும் இந்த இரண்டு படங்களுக்கும் சமமான அளவில் திரையரங்குகள் ஒதுக்கப்பட வாய்ப்புள்ளதாக கூறப்படுகிறது. இந்நிலையில், வாரிசு படத்தின் முன்பதிவு எப்போது தொடங்கும் என்பது குறித்த அறிவிப்பு வெளியாகி உள்ளது.
அதன்படி வாரிசு படத்தை இங்கிலாந்தில் வெளியிடும் நிறுவனம், அப்படத்திற்கான டிக்கெட் முன்பதிவை ஒரு மாதத்திற்கு முன், அதாவது அடுத்த வாரம் தொடங்க இருப்பதாக அறிவித்து உள்ளது. ஜேம்ஸ் கேமரூன் இயக்கத்தில் அடுத்த வாரம் வெளியாக உள்ள அவதார் 2 படத்தின் முன்பதிவு கடந்த மாதமே தொடங்கப்பட்டது. தற்போது அதே பார்முலாவை பின்பற்றி இங்கிலாந்தில் மட்டும் வாரிசு படத்திற்கான டிக்கெட் முன்பதிவு ஒரு மாதத்திற்கு முன்னரே தொடங்கப்பட உள்ளது குறிப்பிடத்தக்கது.
இதையும் படியுங்கள்... கூகுளில் அதிகம் தேடப்பட்ட டாப் 10 தமிழ் படங்கள் : வலிமையை பின்னுக்கு தள்ளிய லவ் டுடே - முதலிடம் யாருக்கு?