ஐஸ்வர்யா இயக்க உள்ள கிரிக்கெட் சம்பந்தப்பட்ட படத்தில் நடிகர் ரஜினிகாந்த் சிறப்பு தோற்றத்தில் நடிக்க உள்ளதாக அறிவிப்பு வெளியாகி உள்ளது.
தமிழ் திரையுலகில் சூப்பர்ஸ்டாராக வலம் வருபவர் ரஜினிகாந்த். அவர் நடிப்பில் தற்போது ஜெயிலர் திரைப்படம் தயாராகி வருகிறது. நெல்சன் இயக்கும் இப்படத்தில் ரஜினிகாந்துக்கு ஜோடியாக ரம்யா கிருஷ்ணன் நடிக்கிறார். அனிருத் இசையமைக்கும் இப்படத்தை சன் பிக்சர்ஸ் நிறுவனம் பிரம்மாண்டமாக தயாரித்து வருகிறது. இதுவரை இப்படத்தின் 50 சதவீத ஷூட்டிங் நிறைவடைந்துள்ளது.
ஜெயிலர் படத்தை தொடர்ந்து ரஜினி நடிக்க உள்ள அடுத்த இரண்டு படங்களையும் லைகா நிறுவனம் தான் தயாரிக்க உள்ளது என்கிற அறிவிப்பு கடந்த சில தினங்களுக்கு முன் வெளியானது. அதில் ஒரு படத்தை சிபி சக்ரவர்த்தியும் மற்றொரு படத்தை ரஜினியின் மகள் ஐஸ்வர்யாவும் இயக்க உள்ளார் என்றும் கூறப்பட்டு வந்தது.
இதையும் படியுங்கள்... 2022-ல் அதிக பிளாக்பஸ்டர் ஹிட் யாருக்கு? முதலிடத்தில் கோலிவுட்... பரிதாப நிலையில் பாலிவுட் - முழு பட்டியல் இதோ
இந்நிலையில், அதனை உறுதிப்படுத்தும் விதமாக அப்படத்தின் டைட்டில் உடன் கூடிய பர்ஸ்ட் லுக் போஸ்டர் வெளியாகி உள்ளது. அதன்படி இப்படத்திற்கு லால் சலாம் என பெயரிடப்பட்டு உள்ளதாகவும், இப்படத்தில் நடிகர் ரஜினிகாந்த் சிறப்பு தோற்றத்தில் நடிக்க உள்ளதாகவும் அந்த போஸ்டரில் குறிப்பிட்டுள்ளனர். இதன்மூலம் ஐஸ்வர்யா இயக்கத்தில் முதன்முறையாக ரஜினி நடிக்க உள்ளது உறுதியாகி இருக்கிறது.
மேலும் இப்படம் கிரிக்கெட் சம்மந்தப்பட்ட கதைக்களத்தை கொண்டதாம். அதனால் இப்படத்தில் கிரிக்கெட் நன்கு ஆடத்தெரிந்த நடிகர்களான விக்ராந்த் மற்றும் விஷ்ணு விஷால் ஆகியோரை முதன்மை கதாபாத்திரத்தில் நடிக்க வைக்க ஒப்பந்தம் செய்துள்ளனர். கூடுதல் சிறப்பாக இப்படத்திற்கு ஏ.ஆர்.ரகுமான் இசையமைக்க உள்ளதாகவும், இப்படத்தை 2023-ம் ஆண்டு திரையரங்குகளில் ரிலீஸ் செய்ய உள்ளதாகவும் அந்த போஸ்டரில் குறிப்பிட்டு உள்ளனர்.
இதையும் படியுங்கள்... அடுத்த ‘ஆலுமா டோலுமா’ ரெடி... துணிவு படத்துக்காக அனிருத் பாடிய மாஸ் பாடலின் அப்டேட் வந்தாச்சு