Vignesh Shivan Birthday Celebration : நடிகை நயன்தாரா தன்னுடைய காதல் கணவர் விக்னேஷ் சிவனின் பிறந்தநாளை துபாயில் கொண்டாடியபோது எடுத்த புகைப்படங்கள் வைரலாகி வருகிறது.
கோலிவுட்டில் லேடி சூப்பர்ஸ்டாராக வலம் வருபவர் நயன்தாரா. இவர் கடந்த 2015-ம் ஆண்டு நானும் ரெளடி தான் படத்தில் நடித்தபோது இயக்குனர் விக்னேஷ் சிவன் மீது காதல் வயப்பட்டார். இதையடுத்து சுமார் 7 ஆண்டுகள் காதலித்த இந்த ஜோடி கடந்த 2022-ம் ஆண்டு திருமணம் செய்துகொண்டது. இவர்களது திருமணம் சென்னையை அடுத்த மகாபலிபுரத்தில் உள்ள பைவ் ஸ்டார் ஹோட்டலில் நடைபெற்றது. இதில் ஏராளமான பிரபலங்களும் கலந்துகொண்டனர்.
விக்னேஷ் சிவன் - நயன்தாரா ஜோடி திருமணமான நான்கே மாதத்தில் இரட்டை குழந்தைகளுக்கு பெற்றோர் ஆகினர். அவர்கள் இருவரும் வாடகைத் தாய் மூலம் அக்குழந்தைகளை பெற்றுக்கொண்டனர். அவர்களுக்கு உயிர், உலக் என பெயரிட்டுள்ளனர். குழந்தை பிறந்த பின்னர் சில மாதங்கள் மட்டும் சினிமாவுக்கு ரெஸ்ட் விட்டிருந்த நயன்தாரா, பின்னர் மீண்டும் சினிமாவில் பிசியானார்.
அதேபோல் இயக்குனர் விக்னேஷ் சிவனும் தன்னுடைய 6-வது படத்தை இயக்கி வருகிறார். அப்படத்திற்கு லவ் இன்சூரன்ஸ் கம்பெனி என பெயரிட்டுள்ளார் விக்னேஷ் சிவன். அப்படத்தில் லவ் டுடே படத்தின் நாயகன் பிரதீப் ரங்கநாதன் ஹீரோவாக நடிக்கிறார். இப்படத்திற்கு அனிருத் இசையமைக்கிறார். இப்படத்தில் பிரதீப்புக்கு ஜோடியாக கீர்த்தி ஷெட்டி நடிக்கிறார். இப்படம் விரைவில் திரைக்கு வர உள்ளது. இப்படத்தை நயன்தாரா தான் தயாரித்து உள்ளார்.
இதையும் படியுங்கள்... பார்ட் 2 இன்னும் பயங்கரமா இருக்கும் - தன்னுடைய மெகா ஹிட் படத்தின் தொடர்ச்சி குறித்து பேசிய மாரிசெல்வராஜ்!
மறுபுறம் நடிகை நயன்தாராவும் பான் இந்தியா அளவில் பிசியான ஹீரோயினாக வலம் வருகிறார். தமிழில் சுந்தர் சி இயக்கத்தில் மூக்குத்தி அம்மன் 2, யோகிபாபு உடன் மண்ணாங்கட்டி போன்ற படங்களை கைவசம் வைத்துள்ள நயன்தாரா, மலையாளத்தில் நிவின் பாலி ஜோடியாக ஒரு படத்தில் நடிக்கிறார். இதுதவிர கன்னடத்தில் யாஷ் நடிப்பில் உருவாகும் டாக்ஸிக் என்கிற பான் இந்தியா படத்திலும் முக்கிய கதாபாத்திரத்தில் நடிக்கிறார் நயன்.
அண்மையில் துபாயில் நடைபெற்ற சைமா விருது நிகழ்ச்சியில் விக்னேஷ் சிவன் - நயன்தாரா இருவரும் விருது வென்றனர். இதில் அன்னப்பூரணி படத்துக்காக சிறந்த நடிகைக்கான விருதை வென்றிருந்தார் நயன்தாரா. அதேபோல் ஜெயிலர் படத்தில் ரத்தமாரே பாடலை எழுதிய விக்னேஷ் சிவனுக்கு சிறந்த பாடலாசிரியர் விருது வழங்கப்பட்டது.
விருது வென்ற கையோடு துபாயில் முகாமிட்டிருந்த நயன்தாரா அங்கு தனது காதல் கணவர் விக்னேஷ் சிவனின் பிறந்தநாளை கொண்டாடி இருக்கிறார். நள்ளிரவில் கேண்டில் லைட் டின்னரோடு விக்னேஷ் சிவனுக்கு முத்தத்தை பரிசாக கொடுத்து தன் அன்பை வெளிப்படுத்தி இருக்கிறார் நயன்தாரா.
விக்னேஷ் சிவன் பிறந்தநாள் கொண்டாட்ட புகைப்படங்களை தன்னுடைய இன்ஸ்டா பக்கத்தில் பதிவிட்டுள்ள நயன்தாரா, பிறந்தநாள் வாழ்த்துக்கள், என்னுடைய காதலை வார்த்தைகளால் விவரிக்க முடியாது. கடவுள் உன்னை ஆசிர்வதிக்கட்டும். என்னுடைய உயிர், உலகம் நீதான் என பதிவிட்டுள்ளார்.
இதையும் படியுங்கள்... பெரியார் சிலைக்கு மாலை அணிவித்து மரியாதை.. த.வெ.க தலைவர் விஜயுடன் "Selfie" எடுத்து மகிழ்ந்த திமுக தொண்டர்கள்!