ஜான்வி கபூர் - ஜூனியர் NTR நடிக்கும் படத்தை கிளாப் அடித்து துவங்கி வைத்த ராஜமௌலி! வைரலாகும் போட்டோஸ்!

சமீபத்தில் ஆர் ஆர் ஆர் பட நாயகன், ஜூனியர் என்டிஆர் தன்னுடைய 30 ஆவது படத்தை கொரடலா சிவா இயக்க உள்ளது உறுதி செய்யப்பட்ட நிலையில், இந்த படத்தின் படப்பிடிப்பு இன்று பூஜையுடன் துவங்கியுள்ளது. இதுகுறித்த புகைப்படங்கள் தற்போது சமூக வலைத்தளத்தில் வெளியாகி வைரலாக பார்க்கப்பட்டு வருகிறது.  

இயக்குனர் ராஜமவுலி இயக்கத்தில், கடந்த ஆண்டு வெளியான தேசப்பற்று திரைப்படம் 'ஆர் ஆர் ஆர்'. இப்படத்தில் கொமரம் பீம் என்கிற சுதந்திரப் போராட்ட வீரராக நடித்திருந்தவர் ஜூனியர் என்டிஆர். இந்த படத்தில் ஜூனியர் என்டிஆர் மற்றும் ராம்சரண் இணைந்து நடனமாடிய பாடலான 'நாட்டு நாட்டு' பாடல் உலக அளவில் பிரபலமாகியது. மேலும் சிறந்த ஒரிஜினல் பாடல் என்கிற பிரிவில் ஆஸ்கர் விருதுக்கு தேர்வு செய்யப்பட்ட நிலையில், ஆஸ்கர் விருதையும் பெற்றது.

சமீபத்தில் நடந்த ஆஸ்கர் விருது நிகழ்ச்சியில் இந்த விருதினை, இப்படத்தின் இசையமைப்பாளரான கீரவாணி மற்றும் பாடல் ஆசிரியர் சந்திரபோஸ் ஆகியோர் பெற்றுக்கொண்டனர். சுமார் 14 வருடங்களுக்கு பின் ஏ.ஆர்.ரகுமானுக்கு பின்னர் இந்த விருதினை பெற்றிருந்தார் கீரவாணி. அதே நேரம் தென்னிந்திய மொழி படத்தில் இடம்பெற்ற பாடலுக்கு ஆஸ்கர் விருது கிடைப்பது இதுவே முதல் முறை என்பதால் தென்னிந்திய திரையுலகமே இந்த வெற்றியை கொண்டாடியது.

'ஆர் ஆர் ஆர்' படத்தின் வெற்றிக்குப் பின்னர் ஜூனியர் என்டிஆர் தன்னுடைய 30-வது படத்தை பிரபல இயக்குனர் கொரட்டல சிவா இயக்கத்தில் நடிக்க உள்ளது உறுதியானது. இப்படத்தில் ஜூனியர் என் டி-ஆருக்கு ஜோடியாக பாலிவுட் நடிகையும், மறைந்த நடிகை ஸ்ரீதேவியின் மூத்த மகளுமான ஜான்வி கபூர் நடிக்க உள்ளதும் உறுதி செய்யப்பட்டுள்ளது.

இதைத்தொடர்ந்து, இப்படத்தின் பூஜை ஹைதராபாத்தில் இன்று மிகவும் விமர்சையாக நடைபெற்ற நிலையில்... இதில் பிரபல இயக்குனர் எஸ் எஸ் ராஜமவுலி கலந்துகொண்டு கிளாப் அடித்து படப்பிடிப்பை துவங்கி வைத்தார்.

மேலும் ஜூனியர் என்டிஆர்-யின் 31 வது படத்தை இயக்க உள்ள, கே.ஜி.எஃப் பட இயக்குனர் பிரசாந்த் நீல் இப்படத்தின் பூஜையில் கலந்து கொண்டு சிறப்பித்தார்.

அதுமட்டுமின்றி இயக்குனர் கொரடலா சிவா, ஜூனியர் என்டிஆரின்  30-வது படத்தின் மூலம் டோலிவுட்  கோலிவுட் திரை உலகின் இசையமைப்பாளராக அறிமுகமாக உள்ள அனிருத், இப்படத்தின் ஒளிப்பதிவாளர் ரத்னவேல் ஆகியோரும் கலந்து கொண்டனர்.

தற்போது இந்த படத்தின் பூஜையின் போது எடுக்கப்பட்ட புகைப்படங்கள் சமூக வலைதளங்களில் வைரலாக பார்க்கப்பட்டு வருகிறது. மேலும் இப்படத்தின் பூஜையில் நடிகை ஜான்வி கபூர் பச்சை நிற பட்டுப் புடவையில், அதற்கு மேட்சிங் ஆக ஸ்லீவ் பிளஸ் ஜாக்கெட் அணிந்து ஜிமிக்கி கம்மலுடன் பேரழகியாக வந்திருந்தார்.

மிகப்பெரிய பட்ஜெட்டில் உருவாக உள்ள இந்த படத்தின் படப்பிடிப்பு பணிகள் விரைவில் ஆரம்பமாக உள்ளன. ஆர் ஆர் ஆர் படத்திற்கு பின்னர், உருவாக உள்ள இந்த படத்திற்கு ஜூனியர் என் டி ஆர் மிகப்பெரிய தொகையை சம்பளமாக பெற்றுள்ளதாக கூறப்படுகிறது.