ஒரே ராகத்தில் இளையராஜா அடித்த ‘சிக்ஸர்கள்’! இசைஞானி நிகழ்த்திய இசை மாயாஜாலம் இதுதான்!

இசைஞானி இளையராஜா, மோகனம், கீரவாணி, நடபைரவி போன்ற ராகங்களை சாமானியர்களும் ரசிக்கும் வகையில் பாடல்களாக மாற்றியதை இக்கட்டுரை விவரிக்கிறது. ஒரே ராகத்தில் பல உணர்வுகளை வெளிப்படுத்தி அவர் நிகழ்த்திய இசை மாயாஜாலத்தை இது விளக்குகிறது.

இசை அரசரின் நடத்திய அரசாங்கம்

திரையிசை உலகில் ராகங்களையும் மக்களையும் இணைக்கும் ஒரு மகா மந்திரவாதியாகத் திகழ்பவர் இசைஞானி இளையராஜா. ஒரு ராகத்தை அதன் தூய்மை குறையாமல், அதே சமயம் சாமானியனும் கொண்டாடும் வகையில் மாற்றுவது ராஜாவின் தனித்துவமான பாணி. குறிப்பாக மோகனம், கீரவாணி, நடபைரவி ஆகிய ராகங்களில் அவர் நிகழ்த்திய சாதனைகள் ஒரு நீண்ட இசை வரலாறாகும்.

மோகனப் புன்னகையில் ஒரு ராஜாங்கம்

வெறும் ஐந்து ஸ்வரங்களை (ஸ ரி க ப த ஸ) மட்டுமே கொண்ட 'ஔடவ' ராகமான மோகனம், கேட்பவருக்கு உடனடி மகிழ்ச்சியைத் தரக்கூடியது என்றால் அது மிகையல்ல. இந்த ராகத்தில் இளையராஜா அடித்த சிக்ஸர்கள் ஒவ்வொன்றும் ஒரு ரகம். 'கண்மணியே காதல் என்பது' போன்ற பாடல்களில் மெல்லிசையாய் வருடியவர், 'அக்னி நட்சத்திரம்' படத்தின் 'நின்னுகோரி வர்ணம்' பாடலில் அதே மோகனத்தை நவீன தாளக்கட்டுகளோடு மோதவிட்டு இளைஞர்களை ஆட வைத்தார். செவ்வியல் இசை ரசிகர்களுக்கு 'பூவில் வண்டு கூடும்' ஒரு வரப்பிரசாதம் என்றால், கிராமிய ரசிகர்களுக்கு 'வந்ததே குங்குமம்' ஒரு கொண்டாட்டம். வேறு வேறு மாதிரி தெரிந்தாலும் இந்த எல்லா பாடல்களும் ஒரே ராகம்.

கீரவாணியில் ஒரு சுவை விருந்து

கீரவாணி ராகத்தை இளையராஜா கையாண்ட விதம், ஒரு தேர்ந்த சமையல்காரர் ஒரே மாவைக் கொண்டு விதவிதமான பதார்த்தங்களை உருவாக்குவதற்கு ஒப்பானது. ஒரே விதமான மாவில்  பல்வேறு தோசைகள் செய்வதை போல அது இருக்கும். 'சின்ன மணிக் குயிலே' போன்ற மெல்லிசைப் பாடல்களிலும் சரி, 'நிலா அது வானத்து மேலே' போன்ற அதிரடி ஹிட்களிலும் சரி, கீரவாணியின் ஆன்மா துல்லியமாக தெரியும். குறிப்பாக 'ஜானி' படத்தில் வரும் 'காற்றில் எந்தன் கீதம்' பாடல், ஒரு மழை காலத்து ஏகாந்தத்தை இந்த ராகத்தின் வழியாகக் கடத்தியிருக்கும் விதமே ஒரு இசை மாயாஜாலம்தான். இசைபற்றி தெரியாதவர்களுக்கே ஒரே பாட்டில் பாடம் நடத்திய பெரும் இவருக்கு உண்டு. சின்ன மணிக்குயில் பாட்டு உருகியவர்களே, நிலா அது வானத்து மேலே பாட்டுக்கும் குத்தாட்டம் போட்டு இருப்பார்கள். அவர்களையே காற்றில் எந்தன் கீதத்தில் மெய்மறக்க செய்திருப்பார் இசை சக்கரவர்த்தி.

நடபைரவியின் வசீகரப் பயணம்

இளையராஜா மேற்கத்திய இசையை கையாண்ட விதமே பிரமிப்பாக இருக்கும். துள்ளல் இசையை ராகத்துக்குள் அடக்கிய ஆளுமை இளையராஜா மட்டுமே என்றால் அது மிகையல்ல. மேற்கத்திய இசையில் 'மைனர் ஸ்கேல்' என்று போற்றப்படும் நடபைரவி, ராஜாவின் கையில் இரவு நேரத்து வசீகர ராகமாக மாறியது. 'என் இனிய பொன் நிலாவே' மற்றும் 'பனி விழும் இரவு' போன்ற பாடல்கள் இன்றும் தேன் சொட்டும் மெட்டுகளாக இருப்பதற்குக் காரணம், அந்த ராகத்தின் நுணுக்கங்களை அவர் பயன்படுத்திய விதம் தான். தமிழ் வார்த்தைகளை மேற்கத்திய இசைக்குள் கொண்டுவந்து அதனை அப்படியே ரசிக்க வைத்திருப்பார் இசைஞாசனி.  'நாடோடித் தென்றல்' படத்தில் வரும் 'மணியே மணிக்குயிலே' பாடல், இந்த ராகத்தின் வேகத்தையும் அழகையும் ஒரு காட்டாற்றைப் போலத் திரையில் பாய விட்டிருக்கும்.

இசை மாயாஜாலம் ரசிகர்களைத் தாலாட்டிக்கொண்டே இருக்கும்

மனநிலையை சந்தோஷமாக வைத்திருக்க இசையும் பாடல்களும் உதவும் என்பதை கிராமத்து பாரம மக்களுக்கு சொல்லி கொடுத்ததுடன் அதனை அப்படியே அள்ளிக்கொடுத்த பெருமை இசைஞானி இளயராஜாவையே சேரும்.  இசையைஇளையராஜா ஒரு ராகத்தை அணுகும்போது அதன் இலக்கணத்தை மீறாமல், ஆனால் கற்பனைச் சிறகுகளை விரித்து எல்லைகளைக் கடப்பவர். ஒரே ராகத்தில் இத்தனை நூறு பாடல்களைக் கொடுத்தும், ஒவ்வொன்றும் ஒன்றிலிருந்து ஒன்று மாறுபட்டு நிற்பதே ராஜாவின் மாபெரும் வெற்றி. இந்த இசை மாயாஜாலம் காலங்கள் கடந்தும் ரசிகர்களைத் தாலாட்டிக்கொண்டே இருக்கும்.