Divya Saasha : தெறி பேபி திவ்யா சாஷாவா இது? ஹீரோயின்போல் மாறிய முதல்வர் விஜய் மகள் - வைரலாகும் போட்டோஸ்

CM Vijay Daughter Divya Saasha : முதல்வர் விஜய்யின் மகள் திவ்யா சாஷா தன்னுடைய அண்ணன் இயக்கிய சிக்மா படம் பார்க்க தியேட்டர் வந்தபோது எடுக்கப்பட்ட புகைப்படங்கள் இணையத்தில் வைரலாகிறது.

சிக்மா படம் பார்க்க வந்த விஜய் மகள்

தமிழ்நாடு முதலமைச்சர் விஜய்க்கும் அவரது மனைவி சங்கீதாவுக்கும் திருமணமாகி 25 ஆண்டுகளுக்கு மேல் ஆகிவிட்டது. இந்த ஜோடிக்கு ஜேசன் சஞ்சய் என்கிற மகனும், திவ்யா சாஷா என்கிற மகளும் உள்ளனர். இதில் ஜேசன் சஞ்சய், தற்போது தமிழ் சினிமாவில் இயக்குநராக அறிமுகமாகிவிட்டார். அவர் இயக்கிய சிக்மா திரைப்படம் திரையரங்குகளில் வெளியாகி ஓடிக் கொண்டிருக்கிறது. மறுபுறம் விஜய்யின் மகள் திவ்யா சாஷா என்ன செய்கிறார் என்பது சஸ்பென்ஸாகவே இருந்து வருகின்றது.

வைரலாகும் திவ்யா சாஷா போட்டோஸ்

நீண்ட நாட்களாக சென்னை பக்கம் தலைகாட்டாமல் இருந்த திவ்யா நேற்று தன்னுடைய அண்ணன் ஜேசன் சஞ்சய் இயக்கிய சிக்மா படத்தின் முதல் காட்சியை காண சென்னையில் உள்ள கமலா தியேட்டர் வந்திருந்தார். தன் அம்மா சங்கீதா உடன் திவ்யா சாஷா வந்திருந்தபோது எடுத்த புகைப்படங்களும், வீடியோக்களும் இணையத்தில் செம வைரலாகி வருகின்றன. முதல்வரின் மகள் என்கிற பந்தா இல்லாமல், மிகவும் எளிமையாக வந்து திவ்யா சாஷா சிக்மா படத்தை பார்த்து சென்றது அனைவரது கவனத்தையும் ஈர்த்துள்ளது.

கல்வியில் அதிக கவனம்

இதையடுத்து திவ்யா சாஷா குறித்து சமூக வலைதளங்களில் பலரும் தகவல்களைத் தேடி வருகின்றனர். 2005ஆம் ஆண்டு பிறந்த திவ்யா சாஷா, சிறுவயது முதலே கல்விக்கு முக்கியத்துவம் கொடுத்து வருகிறார். சென்னையில் உள்ள AISC பள்ளியில் தனது பள்ளிப்படிப்பை அவர் முடித்துள்ளார். கல்வியுடன் சேர்த்து விளையாட்டிலும் திவ்யாவுக்கு ஆர்வம் இருந்து வந்துள்ளது. குறிப்பாக பேட்மிண்டன் விளையாட்டில் திறமையை வெளிப்படுத்திய அவர், பள்ளி அளவிலான போட்டிகளிலும் பங்கேற்றுள்ளார்.

‘தெறி’ மூலம் சினிமா அறிமுகம்

விஜய்யின் மகள் என்ற அடையாளத்துடன் மட்டும் இல்லாமல், சிறுவயதிலேயே திரையிலும் திவ்யா சாஷா தோன்றியுள்ளார். அட்லீ இயக்கத்தில் விஜய் நடித்த ‘தெறி’ திரைப்படம் 2016ஆம் ஆண்டு வெளியானது. படத்தின் கிளைமாக்ஸில் விஜய்யின் மகளாக திவ்யா சாஷா சிறிய கதாபாத்திரத்தில் நடித்திருந்தார். அந்தக் காட்சிகள் வெளியானபோது விஜய் ரசிகர்கள் மத்தியில் அவரது தோற்றம் கவனம் பெற்றது. அதன்பின்னர் எந்த படத்திலும் திவ்யா நடிக்கவில்லை. தற்போது வரை அவர் படிப்பில் தான் கவனம் செலுத்தி வருகிறார்.

சினிமாவில் ஹீரோயினாக வருவாரா?

விஜய் முன்னணி நடிகராகவும், அவரது மகன் ஜேசன் சஞ்சய் திரைப்பட இயக்கத்தில் ஆர்வம் காட்டி வருபவராகவும் இருக்கும் நிலையில், திவ்யா சாஷாவின் எதிர்காலம் சினிமாவை நோக்கி நகருமா என்ற கேள்வி தொடர்ந்து இருந்து வருகிறது. ஆனால் தற்போது திவ்யா சாஷா தனது உயர்கல்வியில் கவனம் செலுத்தி வருகிறார். லண்டனில் தங்கி படித்து வரும் திவ்யா சாஷா, எதிர்காலத்தில் முழுநேரமாக சினிமாவில் நடிக்க வருவாரா என்பது இதுவரை உறுதி செய்யப்படவில்லை.