AR Rahman : இசைக்கருவிகளே யூஸ் பண்ணாம ஏ.ஆர்.ரகுமான் கம்போஸ் செய்த அடிபொலி ஹிட் சாங் பற்றி தெரியுமா?

AR Rahman Song Secret : இசைப்புயல் ஏ.ஆர்.ரகுமான் பல்வேறு ஹிட் பாடல்களை கொடுத்துள்ளார். அதில் அவர் இசைக்கருவிகளே இல்லாமல் உருவாக்கிய ஒரு பாடல் பற்றி இங்கே பார்க்கலாம்.

ஏ.ஆர்.ரகுமான் பாடல் சீக்ரெட்

தமிழ் சினிமாவின் இசை வரலாற்றில் ஏ.ஆர்.ரகுமானுக்கு தனி இடம் உண்டு. இளையராஜாவின் இசை ஆதிக்கம் உச்சத்தில் இருந்த காலகட்டத்தில், இயக்குநர்கள் மணிரத்னம் மற்றும் கே.பாலச்சந்தர் ஆகியோரின் நம்பிக்கையுடன் திரைத்துறைக்குள் அறிமுகமானவர் ரகுமான். தனது முதல் படமான ‘ரோஜா’ மூலமே ரசிகர்களின் கவனத்தை ஈர்த்ததுடன், தேசிய விருதையும் வென்று தனது வருகையை அழுத்தமாக பதிவு செய்தார். ‘ரோஜா’ படத்தில் தொடங்கிய அவரது இசைப் பயணம் பல ஆண்டுகளைக் கடந்து இன்றளவும் தொடர்ந்து வருகிறது.

ராசாத்தி பாடல் ரகசியம்

தமிழ் மட்டுமின்றி இந்தி, தெலுங்கு உள்ளிட்ட பல்வேறு மொழி படங்களிலும் பணியாற்றி வரும் ஏ.ஆர்.ரகுமான், ஒவ்வொரு காலகட்டத்திலும் தனது இசையில் புதுமையான முயற்சிகளை மேற்கொண்டு வருகிறார். அப்படிப்பட்ட அவரது வித்தியாசமான இசை முயற்சிகளில் ஒன்றுதான் ‘திருடா திருடா’ படத்தில் இடம்பெற்ற ‘ராசாத்தி’ பாடல். ‘ரோஜா’ படத்தின் மாபெரும் வெற்றிக்குப் பிறகு மணிரத்னம் - ஏ.ஆர்.ரகுமான் கூட்டணி மீண்டும் இணைந்த இந்தப் படத்தில் பிரசாந்த், ஆனந்த் உள்ளிட்டோர் நடித்திருந்தனர்.

இசைக்கருவிகள் இல்லாமல் உருவான ‘ராசாத்தி’!

‘திருடா திருடா’ படத்தின் பாடல்கள் அனைத்தும் ரசிகர்கள் மத்தியில் நல்ல வரவேற்பைப் பெற்றிருந்தாலும், ‘ராசாத்தி’ பாடலுக்கு தனி ரசிகர்கள் பட்டாளமே உள்ளது. ஷாகுல் ஹமீத்தின் குரலில் ஒலிக்கும் இந்தப் பாடல், அதன் இசை மற்றும் உணர்வுப்பூர்வமான தன்மையால் இன்றளவும் நினைவில் நிற்கிறது. இந்தப் பாடலின் சிறப்பு என்னவென்றால், வழக்கமாக பயன்படுத்தப்படும் இசைக்கருவிகளைத் தவிர்த்து, ‘அகபெல்லா’ எனப்படும் குரல் சார்ந்த கோரஸ் முறையை மையமாக வைத்து இசையமைத்ததாக கூறப்படுகிறது.

ஏ.ஆர்.ரகுமானின் மேஜிக்

அதாவது, இசைக்கருவிகளின் துணையின்றி மனிதக் குரல்களின் அடுக்குகளைப் பயன்படுத்தி பாடலுக்கு இசை வடிவம் கொடுக்கப்பட்டிருந்தது. ஒரு பாடலை உருவாக்குவதற்கு ஏராளமான இசைக்கருவிகள் தேவைப்படும் என்ற வழக்கமான அணுகுமுறைக்கு மாறாக, குரலையே பிரதான இசைக்கருவியாக மாற்றிய இந்த முயற்சி அப்போது கவனம் பெற்றது.

இதன் மூலம் ‘ராசாத்தி’ பாடல், ஏ.ஆர்.ரகுமானின் இசைப் புதுமைகளில் குறிப்பிடத்தக்க ஒன்றாக பார்க்கப்படுகிறது. வழக்கமான இசை வடிவங்களுக்குள் தன்னை கட்டுப்படுத்திக் கொள்ளாமல், ஒவ்வொரு பாடலிலும் புதிய முயற்சிகளை அறிமுகப்படுத்திய ரகுமானின் இசைப் பயணத்திற்கு இந்தப் பாடலும் ஒரு முக்கிய உதாரணமாக அமைந்துள்ளது.