The Paradise Day 1 Box Office : ‘தி பாரடைஸ்’ பாக்ஸ் ஆபிஸில் கலெக்‌ஷன் அள்ளியதா? காத்துவாங்கியதா? முதல் நாள் வசூல் நிலவரம் இதோ

The Paradise Day 1 Box Office : ஸ்ரீகாந்த் ஓடேலா இயக்கத்தில் நானி நடித்த தி பாரடைஸ் திரைப்படம் தியேட்டர்களில் கலவையான விமர்சனங்களை பெற்று வரும் நிலையில், அதன் முதல் நாள் வசூல் நிலவரம் எப்படி இருக்கு என்பதை பார்க்கலாம்.

தி பாரடைஸ் படத்தின் முதல் நாள் வசூல்

நடிகர் நானி இதுவரை நடித்த படங்களில் இருந்து முற்றிலும் மாறுபட்ட வகையில், முழுக்க முழுக்க மாஸ் ஆக்‌ஷன் கதாபாத்திரத்தில் நடித்துள்ள திரைப்படம் ‘தி பாரடைஸ்’. ‘தசரா’ படத்தின் மூலம் இணைந்த இயக்குநர் ஸ்ரீகாந்த் ஓடேலா - நானி கூட்டணி மீண்டும் இந்தப் படத்தில் கைகோர்த்துள்ளது. வியாழக்கிழமை உலகம் முழுவதும் வெளியான இப்படத்திற்கு முதல் நாளிலேயே மிகப்பெரிய அளவில் வரவேற்பு கிடைத்துள்ளதாக தகவல்கள் வெளியாகியுள்ளன.

‘தி பாரடைஸ்’ படத்தில் நானிக்கு ஜோடியாக கயாடு லோஹர் நடித்துள்ளார். இவர்களுடன் மோகன் பாபு, சம்பூர்ணேஷ் பாபு, பாலிவுட் நடிகர் ராகவ், சோனாலி குல்கர்னி, ஈஸ்வரி ராவ் உள்ளிட்ட பல முன்னணி நடிகர்கள் முக்கிய கதாபாத்திரங்களில் நடித்துள்ளனர். சுதாகர் செருக்குரி தயாரித்துள்ள இந்தப் படம், வெளியீட்டுக்கு முன்பே அட்வான்ஸ் புக்கிங்கில் கவனம் ஈர்த்தது.

முதல் நாளே ரூ.74.90 கோடி வசூல்?

படத்தின் முதல் நாள் வசூல் குறித்த தகவல்கள் தற்போது வெளியாகி ரசிகர்களை ஆச்சரியப்படுத்தியுள்ளன. உலகளவில் ‘தி பாரடைஸ்’ திரைப்படம் முதல் நாளில் மட்டும் சுமார் ரூ.74.90 கோடி வசூல் செய்துள்ளதாக கூறப்படுகிறது. இதில் இந்தியாவில் ரூ.54.90 கோடி வசூலித்துள்ளதாக சாக்னில்க் தரவுகள் தெரிவிக்கின்றன.

வெளிநாட்டு சந்தையிலும் நானியின் படத்திற்கு நல்ல வரவேற்பு கிடைத்துள்ளது. அட்வான்ஸ் புக்கிங் மற்றும் முதல் நாள் வசூலை சேர்த்து ஓவர்சீஸ் மார்க்கெட்டில் சுமார் ரூ.20 கோடி வசூல் கிடைத்துள்ளதாக கூறப்படுகிறது. இதன் மூலம் நானியின் திரையுலக பயணத்தில் இதுவரை இல்லாத அளவுக்கு மிகப்பெரிய ஓப்பனிங்கை ‘தி பாரடைஸ்’ பதிவு செய்துள்ளதாக தகவல்கள் தெரிவிக்கின்றன.

இதற்கு முன்பு நானி நடிப்பில் வெளியான ‘ஹிட் 3’ திரைப்படம் முதல் நாளில் சுமார் ரூ.40 கோடி வசூல் செய்ததே சாதனையாக இருந்தது. அந்த சாதனையை பாரடைஸ் முறியடித்துள்ளது. இதுதவிர ‘சரிபோதா சனிவாரம்’ ரூ.25 கோடியும், நானி - ஸ்ரீகாந்த் ஓடேலா கூட்டணியில் உருவான ‘தசரா’ திரைப்படம் ரூ.38 கோடியும் முதல் நாள் வசூலாக பெற்றிருந்தன.

படத்திற்கு கலவையான விமர்சனங்கள்

வசூலில் மிகப்பெரிய தொடக்கத்தை பெற்றிருந்தாலும், ‘தி பாரடைஸ்’ திரைப்படத்திற்கு விமர்சனங்கள் கலவையாகவே இருக்கின்றன. படத்தின் ஆக்‌ஷன் காட்சிகள், நானியின் மாறுபட்ட நடிப்பு, ரா மற்றும் ரஸ்டிக் மேக்கிங், பின்னணி இசை ஆகியவை ரசிகர்கள் மத்தியில் பாராட்டுகளை பெற்று வருகின்றன.

தெலங்கானா பின்னணியில் உருவாகியுள்ள இப்படத்தில் நானி தனது கதாபாத்திரத்தை மிகவும் தீவிரமாக வெளிப்படுத்தியுள்ளதாக ரசிகர்கள் கருத்து தெரிவித்து வருகின்றனர். குறிப்பாக கேசிஆரை நினைவுபடுத்தும் வகையில் அமைந்துள்ள ஒரு கதாபாத்திரமும் படத்தின் ஹாட் டாப்பிக் ஆக மாறியுள்ளது.

அதே நேரத்தில், கதையில் போதிய தெளிவு இல்லை, திரைக்கதை இன்னும் சிறப்பாக அமைந்திருக்கலாம், சில காட்சிகளில் உணர்வுபூர்வமான இணைப்பு குறைவாக உள்ளது போன்ற விமர்சனங்களும் சமூக வலைதளங்களில் பதிவாகி வருகின்றன. படத்தைப் பற்றிய ட்ரோல்களும் ஒரு பக்கம் அதிகரித்துள்ளன.

ரூ.150 கோடி பட்ஜெட்.. ரூ.200 கோடி வசூல் இலக்கு

‘தி பாரடைஸ்’ படத்தின் தயாரிப்பு மற்றும் புரமோஷன் செலவுகள் உட்பட மொத்த பட்ஜெட் சுமார் ரூ.150 கோடி என கூறப்படுகிறது. படத்தின் தியேட்டர் அல்லாத உரிமைகள் மூலமாகவே ரூ.80 முதல் ரூ.100 கோடி வரை வியாபாரம் நடைபெற்றுள்ளதாக தகவல்கள் தெரிவிக்கின்றன.

நெட்ஃபிளிக்ஸ் ஓடிடி உரிமை சுமார் ரூ.50 கோடிக்கும், ஆடியோ உரிமை ரூ.15 கோடிக்கும் விற்பனையாகியுள்ளதாக கூறப்படுகிறது. இதுதவிர, சாட்டிலைட் உரிமமும் நல்ல தொகைக்கு விற்பனை செய்யப்பட்டுள்ளதாக தகவல் வெளியாகியுள்ளது. தியேட்டர் உரிமையை பொறுத்தவரை, மொத்தமாக சுமார் ரூ.96 கோடிக்கு விற்பனை செய்யப்பட்டுள்ளதாக கூறப்படுகிறது.

முதல் நாளில் கிடைத்துள்ள இந்த வேகத்தை அடுத்தடுத்த நாட்களிலும் படம் தக்க வைத்துக்கொள்ளுமா என்பதே தற்போது ரசிகர்கள் மற்றும் திரையுலகினர் மத்தியில் எதிர்பார்ப்பாக உள்ளது. குறிப்பாக கலவையான விமர்சனங்களுக்கு மத்தியிலும் வார இறுதி வசூல் எப்படி அமைகிறது என்பதை பொறுத்தே ‘தி பாரடைஸ்’ படத்தின் அடுத்தகட்ட பாக்ஸ் ஆபிஸ் பயணம் அமையும்.