இந்தியாவில் மட்டுமல்லாது, வெளிநாட்டிலும் தனக்கென தனி ரசிகர்கள் பட்டாளத்தை கொண்டவர் அஜித். இவர் நடிப்பில் பொங்கல் பண்டிகையை முன்னிட்டு ஜனவரி 11ஆம் தேதி வெளியான திரைப்படம் 'துணிவு'. மிகப்பெரிய எதிர்பார்ப்புக்கு மத்தியில் வெளியான இந்த படத்தில், அஜித் பேங்க் கொள்ளையராக நடித்திருந்தாலும், ஆக்கப்பூர்வமான கருத்தை தெரிவித்துள்ளதாக ரசிகர்கள் தொடர்ந்து தங்களுடைய பாராட்டுகளை தெரிவித்து வருகின்றனர்.
இந்நிலையில் அஜித் அடுத்ததாக, இயக்குனர் விக்னேஷ் சிவன் இயக்கத்தில் தன்னுடைய 62 ஆவது படத்தை நடிக்க உள்ளார். இந்த திரைப்படம் குறித்த சில அப்டேட் அவ்வப்போது வெளியாகி வரும் நிலையில், இந்த படத்தின் படப்பிடிப்பு பிப்ரவரி மாதம் துவங்க உள்ளதாகவும், தீபாவளியை முன்னிட்டு ரிலீஸ் செய்ய திட்டமிட்டுள்ளதாகவும் கூறப்படுகிறது.
அனிருத் இசையமைக்க, இந்த படத்தை பிரமாண்டமாக தயாரிக்க உள்ளது லைகா நிறுவனம். இதுவரை அஜித் நடித்த படங்களிலேயே அதிக பட்ஜெட்டில் இப்படம் உருவாக உள்ளதாக கூறப்படுகிறது. எனவே இப்படத்தின் மீதான எதிர்பார்ப்புகளும் எகிறியுள்ளன. இந்த வருட பொங்கலை தல பொங்கலாக ரசிகர்கள் கொண்டாடிய நிலையில், தீபாவளியையும் தல தீபாவளியாக கொண்டாட தயாராகி வருகிறார்கள் என்பது குறிப்பிடத்தக்கது.