"நானும் விஜய் ரசிகன் தான்" ஆனா அரசியல் என்பது வேறு - போஸ் வெங்கட் அதிரடி!

Director Bose Venkat : இயக்குனர் மற்றும் நடிகர் போஸ் வெங்கட், தான் நடிகர் விஜய்க்கு எப்போதுமே ரசிகன் என்று கூறி சில சர்ச்சைகளுக்கு முற்றுப்புள்ளி வைத்துள்ளார்.

Bose Venkat

கோலிவுட் திரை உலகை பொறுத்தவரை சுமார் 200 கோடி ரூபாய் வரை சம்பளம் பெறும் டாப் நடிகராக வலம் வந்து கொண்டிருக்கிறார் தளபதி விஜய். இந்த சூழலில் கடந்த சில ஆண்டுகளாகவே விரைவில் அவர் அரசியல்களில் இறங்க உள்ளதாக தகவல்கள் வெளியாகி வந்த நிலையில், இந்த ஆண்டு தொடக்கத்தில் அது உறுதி செய்யப்பட்டது. தளபதி விஜய் தன்னுடைய தமிழக வெற்றிக்கழகம் கட்சியின் அதிகாரப்பூர்வ அறிவிப்பை வெளியிட்டார். அதனை தொடர்ந்து கட்சியின் கொடியும் பாடலும் வெளியான நிலையில், கடந்த அக்டோபர் மாதம் 27ஆம் தேதி விழுப்புரம் மாவட்டம் விக்கிரவாண்டில் உள்ள ஒரு இடத்தில் தளபதி விஜயின் அரசியல் கட்சியினுடைய முதல் மாநில மாநாடு நடைபெற்றது.

TVK Vijay

அந்த மாநாடு முடிந்து சரியாக ஒரு மாத காலமாக ஆகபோகிறது என்றாலும் கூட, இன்றளவும் அந்த மாநாட்டில் தளபதி விஜய் பேசிய பல விஷயங்கள் பரபரப்பை தொடர்ச்சியாக ஏற்படுத்தி வருகிறது. அதிலும் குறிப்பாக திராவிட முன்னேற்ற கழகம் குறித்து அவர் நேரடியாக வைத்த தாக்குதல்கள் பெரும் அதிர்வலைகளை தமிழக அரசியலில் ஏற்படுத்தியது என்றால் அது மிகையல்ல. இந்த சூழலில் பிரபல இயக்குனரும், நடிகரும், திராவிட முன்னேற்ற கழகத்தில் இணைந்து செயல்பட்டு வருபவருமான போஸ் வெங்கட் பல மேடைகளில் தளபதி விஜயை மறைமுகமாக தாக்கி பேசியிருந்தார். குறிப்பாக கங்குவா திரைப்படத்தின் இசை வெளியீட்டு விழாவில் நடிகர் விஜய் குறித்து அவர் பேசியிருந்தது குறிப்பிடத்தக்கது.

Kangua Audio Launch

"ஒரு தலைவன் என்பவன் தன்னை நம்பி இருக்கும் நபர்கள் அனைவருக்கும் அனைத்தையும் முதலில் கொடுத்து விட வேண்டும். குறிப்பாக படிப்பை கொடுத்து விட வேண்டும், ஒரு தலைவன் தனது தொண்டனை முட்டாளாக வைத்திருக்க கூடாது. அந்த வகையில் சூர்யா அரசியல் களத்துக்கு வருவதற்கு மிகச் சரியான நபர், அவர் வரவேண்டும் என்று கூறி நடிகர் விஜயை பெரிய அளவில் தாக்கி வெங்கட் பேசியது பெரும் அதிர்வலைகளை ஏற்படுத்தியது. இதனை அடுத்து தளபதி விஜயின் ரசிகர்கள் பெரிய அளவில் இணைய வழியாக போஸ் வெங்கட்டை சரமாரியாக ட்ரோல் செய்து வந்ததும் அனைவரும் அறிந்ததே.

Vijay

இந்த சூழலில் ஒரு தனியார் நிறுவனத்திற்கு அளித்த பேட்டியில் பேசிய போஸ் வெங்கட் "நான் இன்று சாலையில் நடந்து சென்று கொண்டிருக்கும் பொழுது, ஒரு இளைஞன் என்னை பார்த்து முறைத்தான். அவன் ஒரு விஜய் ரசிகனாக இருப்பான் என்று நினைக்கிறேன். ஒரு உணவகத்திற்கு சாப்பிட சென்றிருந்தேன், வெகு நேரமாக என்னை ஒரு இளைஞன் முறைத்துக் கொண்டே இருந்தார். அருகில் சென்றேன், நீங்கள் விஜய் ரசிகரா என்று கேட்டதும் என்னை பார்த்து சிரித்து விட்டார்". 

"நான் பிறரை விட விஜய்க்கு மிகப்பெரிய ரசிகன், அவருடைய படத்தை முதல் நாள் முதல் ஷோ பார்க்க எப்பவுமே தவறியதில்லை. ஆனால் அரசியல் களம் என்பது வேறு, 70 ஆண்டுகளாக மக்களுக்கு பல்வேறு விஷயங்களை கொடுத்த ஒரு விஷயம் தான் திராவிடம். அதுதான் திராவிட முன்னேற்ற கழகம், அதைப் பற்றிய விமர்சனம் வைப்பது மிகவும் தவறு. தனி நபரை நீங்கள் எப்படி வேண்டுமானாலும் விமர்சனம் செய்யலாம். அது அவரவருடைய விருப்பம், ஆனால் ஒரு மிகப்பெரிய ஆற்றலை குறை சொல்வது தவறு. ஆகவே எனக்கும் விஜய்க்கும் அரசியல் ரீதியாக கருத்து வேறுபாடுகள் இருக்கிறது. ஆனால் எப்பொழுதுமே அவரை ஒரு நடிகனாக நான் ரசித்துக்கொண்டே தான் இருப்பேன்" என்று கூறி இருக்கிறார்.