OTT : ரியல் சீரியல் கில்லரின் கதை... ஓடிடியில் ஒளிந்திருக்கும் தரமான தமிழ் படம் - மிஸ் பண்ணாம பாருங்க

OTT Crime Thriller : ஓடிடி தளங்களில் ஒரு நல்ல க்ரைம் த்ரில்லர் திரைப்படத்தைத் தேடுகிறீர்களா? அப்படியானால், இந்தப் படம் உங்களுக்குச் சிறந்த தேர்வாக இருக்கும். அது என்ன படம் என்பதை பார்க்கலாம்.

OTT Crime Thriller

ஓடிடி தளங்களில் பல்வேறு ஜானர்களில் திரைப்படங்களும் வெப் சீரிஸ்களும் வெளியாகி வந்தாலும், சஸ்பென்ஸ், க்ரைம், ஹாரர் மற்றும் த்ரில்லர் கதைகளுக்கு ரசிகர்கள் மத்தியில் தனி வரவேற்பு இருந்து வருகிறது. குறிப்பாக, நிஜ சம்பவங்களை மையமாகக் கொண்டு உருவாகும் க்ரைம் த்ரில்லர் படங்கள் பார்வையாளர்களின் கவனத்தை வெகுவாக ஈர்த்து வருகின்றன. அந்த வரிசையில், உண்மைச் சம்பவத்தின் பின்னணியில் உருவாகியுள்ள திரைப்படம்தான் ‘ஸ்டீபன்’.

நிஜ சம்பவத்தை மையமாகக் கொண்ட கதை

கேரளாவில் கடந்த 2021ஆம் ஆண்டு நடைபெற்றதாகக் கூறப்படும் கொடூரமான குற்றச் சம்பவத்தை மையமாக வைத்து இப்படத்தின் கதை உருவாக்கப்பட்டுள்ளது. திரைப்பட வாய்ப்புகளைப் பெற்றுத் தருவதாகக் கூறி அப்பாவிப் பெண்களை குறிவைத்ததாகக் கூறப்படும் தொடர் கொலைகாரன் ஸ்டீபன் ஜபராஜைச் சுற்றியே படத்தின் கதை நகர்கிறது. அடுத்தடுத்து நிகழும் கொலைகள், அவற்றின் பின்னணியில் இருக்கும் மர்மங்கள், குற்றவாளியின் செயல்பாடுகள் மற்றும் போலீஸ் விசாரணை என படம் தொடங்கியதிலிருந்து பரபரப்பான திருப்பங்களுடன் நகர்கிறது.

யூகிக்க முடியாத திருப்பங்கள்

இந்தப் படத்தின் முக்கியமான பலமே அதன் சஸ்பென்ஸ் மற்றும் எதிர்பாராத திருப்பங்கள்தான். கதையில் அடுத்து என்ன நடக்கப் போகிறது என்பதை பார்வையாளர்களால் எளிதில் கணிக்க முடியாத வகையில் திரைக்கதை அமைக்கப்பட்டுள்ளதாக கூறப்படுகிறது. குற்றவாளி போலீசாரிடம் சிக்குவதற்கு முன்பாகவே காவல் நிலையத்தில் சரணடைவது, பின்னர் நீதிமன்றத்தில் குற்றத்தை ஒப்புக்கொள்வது போன்ற சம்பவங்கள் கதைக்கு மேலும் பரபரப்பை ஏற்படுத்துகின்றன.

ஆனால், அந்தக் கொலைகளுக்குப் பின்னால் இருந்த காரணம் என்ன? ஸ்டீபனின் கடந்த கால வாழ்க்கையில் என்ன நடந்தது? போலீஸ் விசாரணையில் வெளிச்சத்துக்கு வந்த அதிர்ச்சிகரமான தகவல்கள் என்ன? என்பதுதான் படத்தின் முக்கியமான கேள்விகளாக அமைகின்றன.

மிரட்டும் நடிப்பில் கோமதி சங்கர்

‘ஸ்டீபன்’ திரைப்படத்தை மிதுன் பாலாஜி எழுதி இயக்கியுள்ளார். மனநிலை பாதிக்கப்பட்ட தொடர் கொலைகாரன் கதாபாத்திரத்தில் கோமதி சங்கர் நடித்துள்ளார். அவரது நடிப்பு படத்தின் முக்கியமான பேசுபொருளாக அமைந்துள்ளதாக ரசிகர்கள் மத்தியில் கருத்துகள் வெளியாகியுள்ளன. அவருடன் மைக்கேல் தங்கதுரை, ஸ்மிருதி வெங்கட், குபேரன், விஜயஸ்ரீ, அமர ரமேஷ் உள்ளிட்ட பலரும் முக்கிய கதாபாத்திரங்களில் நடித்துள்ளனர்.

நெட்பிளிக்ஸ் ஓடிடியில் பார்க்கலாம்

இந்தப் படத்தின் டிஜிட்டல் உரிமையை பிரபல ஸ்ட்ரீமிங் நிறுவனமான நெட்பிளிக்ஸ் கைப்பற்றியுள்ளது. கடந்த ஆண்டு டிசம்பர் 5ஆம் தேதி முதல் இப்படம் ஓடிடியில் ஸ்ட்ரீமிங் செய்யப்பட்டு வருகிறது. தமிழ் மட்டுமின்றி தெலுங்கு, இந்தி, மலையாளம் மற்றும் ஆங்கிலம் உள்ளிட்ட மொழிகளிலும் படத்தைப் பார்க்க முடியும் எனத் தெரிவிக்கப்பட்டுள்ளது. நிஜக் குற்றச் சம்பவங்களின் பின்னணியில் உருவாகும் பரபரப்பான கதைகளை விரும்புபவர்களுக்கு ‘ஸ்டீபன்’ ஒரு சுவாரஸ்யமான க்ரைம் த்ரில்லர் அனுபவமாக இருக்கக்கூடும்.