SIR படிவத்தை உடனே சமர்ப்பிக்கலாம்.. உறவினர் பெயர் கட்டாயம் இல்லை.. தேர்தல் அதிகாரி தகவல்

தமிழகத்தில் SIR பணியில், பூர்த்தி செய்த கணக்கீட்டுப் படிவங்களை டிசம்பர் 4ஆம் தேதிக்குள் உடனடியாகச் சமர்ப்பிக்குமாறு தலைமைத் தேர்தல் அதிகாரி வலியுறுத்தியுள்ளார். தவறினால், வரைவு வாக்காளர் பட்டியலில் பெயர் இடம்பெறாது.

தமிழகத்தில் நடைபெற்று வரும் சிறப்பு தீவிர வாக்காளர் பட்டியல் திருத்தப் பணியை வெற்றிகரமாக முடிக்கும் பொருட்டு, கணக்கீட்டுப் படிவங்களைப் பூர்த்தி செய்த வாக்காளர்கள் டிசம்பர் 4ஆம் தேதி வரை காத்திருக்காமல் உடனடியாகச் சமர்ப்பிக்குமாறு தலைமைத் தேர்தல் அதிகாரி அர்ச்சனா பட்நாயக் வலியுறுத்தியுள்ளார்.

இன்று (வியாழக்கிழமை) செய்தியாளர்களைச் சந்தித்த அவர், வாக்காளர் பட்டியல் திருத்தம் தொடர்பான முக்கியத் தகவல்களை வெளியிட்டார்.

தமிழகத்தில் SIR நிலவரம்

இந்தச் சிறப்புத் திருத்தப் பணிக்காக 38 மாவட்டத் தேர்தல் அதிகாரிகள், 234 வாக்காளர் பதிவு அலுவலர்கள், 713 உதவி வாக்காளர் பதிவு அலுவலர்கள், 68,467 வாக்குச்சாவடி நிலை அலுவலர்கள் (BLO) மற்றும் 7,234 மேற்பார்வையாளர்கள் களத்தில் உள்ளனர்.

தமிழ்நாட்டின் மொத்தமுள்ள 6.41 கோடி வாக்காளர்களில், இதுவரை 6.23 கோடி வாக்காளர்களுக்கு கணக்கீட்டுப் படிவங்கள் விநியோகிக்கப்பட்டுள்ளன.

மாவட்டத் தேர்தல் அலுவலர்களால் அதிக எண்ணிக்கையிலான தன்னார்வலர்கள் நியமிக்கப்பட்டு, அனைத்து வாக்குச்சாவடிகளிலும் உதவி மையங்கள் அமைக்கப்பட்டுள்ளன.

வாக்காளர்களுக்கு முக்கிய அறிவிப்புகள்

கணக்கீட்டுப் படிவங்களைப் பெற்றுக்கொண்ட வாக்காளர்கள், கடைசி நேர நெருக்கடியைத் தவிர்க்க, வரும் டிசம்பர் 4, 2025 வரை காத்திருக்காமல், பூர்த்தி செய்த படிவங்களை உடனடியாக வாக்குச்சாவடி நிலை அலுவலரிடம் அல்லது உதவி மையத்தில் சமர்ப்பிக்க வேண்டும் என்று அவர் கேட்டுக்கொண்டார்.

2002/2005 வாக்காளர் பட்டியலில் ஒரு வாக்காளர் தனது பெயரையோ அல்லது உறவினரின் பெயரையோ கண்டறிய இயலாத நிலையில், டிசம்பர் 4, 2025-க்குள் படிவத்தை ஒப்படைத்தால், அவரது பெயர் டிசம்பர் 9, 2025 அன்று வெளியிடப்படவுள்ள வரைவு வாக்காளர் பட்டியலில் இடம்பெறும்.

டிசம்பர் 4, 2025-க்குள் படிவத்தைச் சமர்ப்பிக்காத வாக்காளர்களின் பெயர்கள் வரைவுப் பட்டியலில் இடம்பெறாது. மேலும், மூன்று முறை வீடு தேடிச் சென்றும் படிவம் வழங்க முடியாத வாக்காளர்களின் பெயர்களும் வரைவுப் பட்டியலில் இடம்பெறாது.

அரசியல் கட்சிகளின் பங்கு

அங்கீகரிக்கப்பட்ட அனைத்து அரசியல் கட்சிகளைச் சேர்ந்த 2,44,685 வாக்குச்சாவடி நிலை முகவர்கள் இந்தப் பணியில் ஈடுபட்டுள்ளனர்.

தேர்தல் ஆணையத்தின் வழிகாட்டுதலின்படி, 12 அங்கீகரிக்கப்பட்ட அரசியல் கட்சிகளின் ஒவ்வொரு வாக்குச்சாவடி நிலை முகவரும், ஒரு நாளைக்கு 50 கணக்கீட்டுப் படிவங்களுக்கு மிகாமல், உறுதிமொழியுடன் தொடர்புடைய வாக்குச்சாவடி நிலை அலுவலர்களிடம் சமர்ப்பிக்க அனுமதிக்கப்பட்டுள்ளனர்.

டிசம்பர் 9, 2025 அன்று வரைவு வாக்காளர் பட்டியல் வெளியாகும். வரைவுப் பட்டியலில் பெயர் இல்லாதவர்கள், பெயர் சேர்க்க, நீக்க அல்லது ஆட்சேபனை தெரிவிக்க டிசம்பர் 9, 2025 முதல் ஜனவரி 8, 2026 வரை படிவம் 6-ஐப் பயன்படுத்தி விண்ணப்பிக்கலாம்.

டிசம்பர் 9, 2025 முதல் ஜனவரி 31, 2026 வரை, விண்ணப்பித்த வாக்காளர்களின் தகுதியை ஆய்வு செய்த பிறகு, தேவைப்பட்டால் அறிவிப்புகள் வெளியிடப்பட்டு விசாரணை நடத்தப்படும். அனைத்துக் கோரிக்கைகளும் பரிசீலிக்கப்பட்ட பிறகு, இறுதி வாக்காளர் பட்டியல் பிப்ரவரி 7, 2026 அன்று வெளியிடப்படும்.

வாக்காளர்கள் தங்களுக்கு வழங்கப்பட்ட படிவங்களைப் பூர்த்தி செய்து, சம்பந்தப்பட்ட அலுவலரிடம் மீண்டும் சமர்ப்பிப்பதில் முழு ஒத்துழைப்பை வழங்கி, இந்தக் குடியாட்சிச் செயல்பாட்டில் தங்கள் பங்களிப்பினை அளிக்குமாறு தலைமைத் தேர்தல் அதிகாரி அர்ச்சனா பட்நாயக் கேட்டுக் கொண்டார்.