இறுதிச்சுற்றில் கால் வைத்தது கேரளா…

இந்தியன் சூப்பர் லீக் (ஐஎஸ்எல்) கால்பந்து தொடரில் 2-ஆவது அணியாக இறுதிச்சுற்றில் கால் வைத்தது கேரள பிளாஸ்டர்ஸ்.

வரும் 18-ஆம் தேதி கொச்சியில் நடைபெறும் இறுதிச்சுற்றில் கொல்கத்தாவை சந்திக்கிறது கேரளம்.

2-ஆவது அரையிறுதியின் 2-ஆவது சுற்றில் டெல்லி 2-1 என்ற கோல் கணக்கில் வென்றது. இதையடுத்து இரு அணிகளும் தலா ஒரு வெற்றி, இரு கோல்களுடன் சமநிலையில் இருந்தன. இதன்பிறகு இறுதிச்சுற்றுக்கு முன்னேறும் அணியைத் தீர்மானிப்பதற்காக நடைபெற்ற பெனால்டி ஷூட் அவுட்டில் கேரள அணி 3-0 என்ற கோல் கணக்கில் டெல்லியை பந்தாடியது.

தில்லியில் புதன்கிழமை நடைபெற்ற இந்த ஆட்டத்தின் ஆரம்பம் முதலே இரு அணிகளும் அபாரமாக ஆட, விறுவிறுப்பாக நகர்ந்தது. 21-ஆவது நிமிடத்தில் டெல்லி வீரர் ஒருவர் கோல் கம்பத்தை நோக்கி விரட்டிய பந்தை கேரள வீரர் கேடியோ தடுத்தார். ஆனால் அது நேரடியாக டெல்லி வீரர் மார்செலோவிடம் செல்ல அவர், அதை எளிதாக கோலாக்கினார்.

ஆனால் அடுத்த 3-ஆவது நிமிடத்திலேயே டெல்லி அணிக்கு பதிலடி கொடுத்தது கேரளம். ஜோசு கொடுத்த பாஸிஸ் டக்கென்ஸ் கோலடிக்க, இரு அணிகளும் 1-1 என்ற கோல் கணக்கில் சமநிலையில் இருந்தன. 28-ஆவது நிமிடத்தில் கேரள வீரர் மெஹ்தாப் ஹுசைன் மீது காலால் உதைத்ததற்காக டெல்லி வீரர் மிலன் சிங்கிற்கு நடுவர் ரெட் கார்டு கொடுக்க, அவர் வெளியேறினார். இதனால் அந்த அணி 10 வீரர்களுடன் விளையாட வேண்டிய நிலை ஏற்பட்டது.

41-ஆவது நிமிடத்தில் டெல்லியின் கோல் வாய்ப்பை கேரள கோல் கீப்பர் நேன்டி முறியடிக்க, தொடர்ந்து போராடிய டெல்லி அணி முதல் பாதி ஆட்டத்தின் "இஞ்சுரி' நேரத்தில் 2-ஆவது கோலை அடித்தது. இந்த கோலை மார்கஸ் உதவியுடன் ரூபன் அடித்தார்.

பின்னர் நடைபெற்ற 2-ஆவது பாதி ஆட்டத்தில் கோல் எதுவும் விழாத நிலையில் டெல்லி அணி 2-1 என்ற கோல் கணக்கில் வெற்றி கண்டது.

ஆனால் முதல் சுற்று அரையிறுதியில் கேரள அணி 1-0 என்ற கோல் கணக்கில் வெற்றி பெற்றிருந்ததால், இரு சுற்றுகளின் முடிவில் இரு அணிகளும் தலா ஒரு வெற்றி, தலா 2 கோல்களுடன் சமநிலையில் இருந்தன.

இதையடுத்து வெற்றியைத் தீர்மானிக்க கூடுதல் நேரம் வழங்கப்பட்டது. அதிலும் கோல் விழாததால் பெனால்டி ஷூட் அவுட் வாய்ப்பு வழங்கப்பட்டது.

அதில் கேரள அணி தனது 4 வாய்ப்புகளில் மூன்றை கோலாக்கியது. அதேநேரத்தில் டெல்லி வீரர்கள் தங்களின் முதல் இரு வாய்ப்புகளில் பந்தை கோல் கம்பத்துக்கு மேலே தூக்கியடித்தனர்.

3-ஆவது வாய்ப்பில் டெல்லி வீரரின் கோல் முயற்சியை கேரள கோல் கீப்பர் முறியடித்தார். இதனால் கேரளம் 3-0 என்ற கோல் கணக்கில் வெற்றி கண்டு இறுதிச்சுற்றுக்கு முன்னேறியது.