AUS vs WI: சொற்ப ரன்களுக்கு வெஸ்ட் இண்டீஸை சுருட்டி முதல் இன்னிங்ஸிலேயே வெற்றியை உறுதி செய்த ஆஸ்திரேலியா

2வது டெஸ்ட்டின் முதல் இன்னிங்ஸில் 511 ரன்களை குவித்த ஆஸ்திரேலிய அணி, வெஸ்ட் இண்டீஸை 214 ரன்களுக்கு சுருட்டி, முதல் இன்னிங்ஸ் முடிவிலேயே வெற்றியை உறுதி செய்துவிட்டது.  

ஆஸ்திரேலியா - வெஸ்ட் இண்டீஸ் இடையேயான 2 டெஸ்ட் போட்டிகள் கொண்ட தொடரின் முதல் டெஸ்ட்டில் 164 ரன்கள் வித்தியாசத்தில் ஆஸ்திரேலிய அணி அபார வெற்றி பெற்று 1-0 என தொடரில் முன்னிலை வகிக்கும் நிலையில், 2வது டெஸ்ட் போட்டி அடிலெய்டில் நடந்துவருகிறது.

இந்த போட்டி பகலிரவு டெஸ்ட் போட்டியாக நடக்கிறது. காயம் காரணமாக ஆஸ்திரேலிய டெஸ்ட் கேப்டன் பாட் கம்மின்ஸ் இந்த போட்டியில் ஆடவில்லை. அதனால் நான்கரை ஆண்டுகளுக்கு பிறகு ஸ்டீவ் ஸ்மித் மீண்டும் இந்த போட்டியில் ஆஸ்திரேலிய அணியின் கேப்டனாக செயல்படுகிறார். இந்த போட்டியில் டாஸ் வென்ற ஆஸ்திரேலிய அணி முதலில் பேட்டிங் ஆடியது.

ஆஸ்திரேலிய அணி:

டேவிட் வார்னர், உஸ்மான் கவாஜா, மார்னஸ் லபுஷேன், ஸ்டீவ் ஸ்மித் (கேப்டன்), டிராவிஸ் ஹெட், கேமரூன் க்ரீன், அலெக்ஸ் கேரி (விக்கெட் கீப்பர்), மைக்கேல் நெசெர், மிட்செல் ஸ்டார்க், நேதன் லயன், ஸ்காட் போலந்த்.

வெஸ்ட் இண்டீஸ் அணி:

கிரைக் பிராத்வெயிட் (கேப்டன்), சந்தர்பால், ஷமர் ப்ரூக்ஸ், ஜெர்மைன் பிளாக்வுட், டெவான் தாமஸ், ஜேசன் ஹோல்டர், ஜோஷுவா ட சில்வா (விக்கெட் கீப்பர்), ரோஸ்டான் சேஸ், அல்ஸாரி ஜோசஃப், ஆண்டர்சன் ஃபிலிப், மார்குயினோ மைண்ட்லி.

முதலில் பேட்டிங் ஆடிய ஆஸ்திரேலிய அணியின் தொடக்க வீரர் டேவிட் வார்னர் 21 ரன்களுக்கு ஆட்டமிழந்து ஏமாற்றமளித்தார். மற்றொரு தொடக்க வீரரான உஸ்மான் கவாஜா அரைசதம் அடித்து 62 ரன்களுக்கு ஆட்டமிழந்தார். இந்த போட்டியில் கேப்டன்சியை ஏற்ற ஸ்டீவ் ஸ்மித் டக் அவுட்டாகி ஏமாற்றமளித்தார். லபுஷேன் - ஹெட் ஆகிய இருவரும் அபாரமாக பேட்டிங் ஆடி இருவருமே சதமடித்தனர். 4வது விக்கெட்டுக்கு லபுஷேன் - ஹெட் ஜோடி 297 ரன்களை குவித்தது. 

லபுஷேன் 163 ரன்களுக்கும், டிராவிஸ் ஹெட் 175 ரன்களுக்கும் ஆட்டமிழந்து இருவருமே இரட்டை சதத்தை தவறவிட்டனர். 7 விக்கெட் இழப்பிற்கு 511 ரன்களை குவித்த ஆஸ்திரேலிய அணி முதல் இன்னிங்ஸை டிக்ளேர் செய்தது.

இதையடுத்து முதல் இன்னிங்ஸை ஆடிய வெஸ்ட் இண்டீஸ் அணியின் தொடக்க வீரர் பிராத்வெயிட் (19), ஷமர் ப்ரூக்ஸ்(8), ஜெர்மைன் பிளாக்வுட் (3) ஆகியோர் ஏமாற்றமளித்தனர். 47 ரன்கள் அடித்து நம்பிக்கையளித்த சந்தர்பாலும் ரன் அவுட்டாகி வெளியேறினார். ஆண்டர்சன் ஃபிலிப் 43 ரன்கள் அடித்தார். பின்வரிசையில் ரோஸ்டான் சேஸ் 34 ரன்களும், ஜோஷுவா ட சில்வா 23 ரன்களும் அடித்தனர். வெஸ்ட் இண்டீஸ் அணியில் எந்த வீரரும் பெரிய இன்னிங்ஸ் ஆடவில்லை. அனைவருமே சொற்ப ரன்களுக்கு ஆட்டமிழக்க, 214 ரன்களுக்கு வெஸ்ட் இண்டீஸ் அணி ஆல் அவுட்டானது.

ஆஸ்திரேலிய அணி சார்பில் நேதன் லயன் 3 விக்கெட்டுகளும், மைக்கேல் நெசெர் மற்றும் மிட்செல் ஸ்டார்க் ஆகிய இருவரும் 2 விக்கெட்டுகளும் வீழ்த்தினர். முதல் இன்னிங்ஸ் முடிவில் 297 ரன்கள் முன்னிலை பெற்றிருப்பதால் இந்த டெஸ்ட்டில் ஆஸ்திரேலியா வெற்றி பெறுவது உறுதி.