SRH vs GT: குஜராத் டைட்டன்ஸுக்கு முதல் தோல்வியை பரிசளித்த சன்ரைசர்ஸ் ஹைதராபாத்
சுருக்கம்
குஜராத் டைட்டன்ஸுக்கு எதிரான போட்டியில் சன்ரைசர்ஸ் ஹைதராபாத் அணி 8 விக்கெட் வித்தியாசத்தில் அபார வெற்றி பெற்றது.
ஐபிஎல் 15வது சீசனின் இன்றைய போட்டியில் சன்ரைசர்ஸ் ஹைதராபாத்தும் குஜராத் டைட்டன்ஸும் மோதின. மும்பை டி.ஒய்.பாட்டீல் மைதானத்தில் நடந்த இந்த போட்டியில் டாஸ் வென்ற சன்ரைசர்ஸ் கேப்டன் கேன் வில்லியம்சன் ஃபீல்டிங்கை தேர்வு செய்தார்.
சன்ரைசர்ஸ் ஹைதராபாத் அணி:
அபிஷேக் ஷர்மா, கேன் வில்லியம்சன் (கேப்டன்), ராகுல் திரிபாதி, எய்டன் மார்க்ரம், நிகோலஸ் பூரன், ஷஷான்க் சிங், வாஷிங்டன் சுந்தர், புவனேஷ்வர் குமார், மார்கோ யான்சென், டி.நடராஜன், உம்ரான் மாலிக்.
குஜராத் டைட்டன்ஸ் அணி:
ஷுப்மன் கில், மேத்யூ வேட் (விக்கெட் கீப்பர்), சாய் சுதர்சன், ஹர்திக் பாண்டியா (கேப்டன்), டேவிட் மில்லர், ராகுல் டெவாட்டியா, அபினவ் மனோகர், ரஷீத் கான், லாக்கி ஃபெர்குசன், முகமது ஷமி, தர்ஷன் நால்கண்டே.
முதலில் பேட்டிங் ஆடிய குஜராத் டைட்டன்ஸ் அணியின் தொடக்க வீரர்கள் ஷுப்மன் கில் (7) மற்றும் மேத்யூ வேட் (19) ஆகிய இருவரும் சொற்ப ரன்களில் ஆட்டமிழந்து வெளியேறினர். சாய் சுதர்சன் 11 ரன்னிலும், மந்தமாக ஆடிய டேவிட் மில்லர் 15 ரன்னிலும் ஆட்டமிழந்தனர். குஜராத் அணி வீரர்கள் சீரான இடைவெளியில் அடுத்தடுத்து ஆட்டமிழந்ததால் நெருக்கடி ஏற்பட்டது. அதை சமாளித்து அருமையாக பேட்டிங் ஆடினார் ஹர்திக் பாண்டியா. அவருடன் இணைந்து அபினவ் மனோகரும் சிறப்பாக பேட்டிங் ஆடினார். 21 பந்தில் 35 ரன்கள் அடித்து அபினவ் மனோகர் ஆட்டமிழக்க, 42 பந்தில் அரைசதம் அடித்தார் ஹர்திக் பாண்டியா. ஹர்திக் பாண்டியாவின் பொறுப்பான அரைசதம் மற்றும் அபினவ் மனோகரின் பொறுப்பான பேட்டிங்கால் 20 ஓவரில் 162 ரன்கள் அடித்தது குஜராத் டைட்டன்ஸ்.
163 ரன்கள் என்ற சவாலான இலக்கை விரட்டிய சன்ரைசர்ஸ் ஹைதராபாத் அணியின் தொடக்க வீரர்கள் கேன் வில்லியம்சன் மற்றும் அபிஷேக் ஷர்மா ஆகிய இருவரும் இணைந்து நல்ல தொடக்கத்தை அமைத்து கொடுத்தனர். முதல் விக்கெட்டுக்கு 64 ரன்கள் சேர்த்தனர். அபிஷேக் ஷர்மா 42 ரன்களுக்கு ஆட்டமிழக்க, அரைசதம் அடித்த வில்லியம்சன், 57 ரன்களுக்கு ஆட்டமிழந்தார். ராகுல் திரிபாதி 17 ரன்களுக்கு ரிட்டயர்ட் ஹர்ட் ஆனார். அதிரடியாக ஆடிய நிகோலஸ் பூரன் 18 பந்தில் 2 பவுண்டரிகள் மற்றும் 2 சிக்ஸர்களுடன் 34 ரன்கள் அடித்தார். அவரது அதிரடியால் கடைசி ஓவரின் முதல் பந்தில் இலக்கை எட்டி 8 விக்கெட் வித்தியாசத்தில் அபார வெற்றி பெற்றது சன்ரைசர்ஸ் ஹைதராபாத் அணி.
இந்த சீசனில் தொடர்ச்சியாக 3 வெற்றிகளை பதிவு செய்த குஜராத் அணியை முதல் முறையாக வீழ்த்தியுள்ளது சன்ரைசர்ஸ்.