SRH vs GT: டாஸ் ரிப்போர்ட்.. சன்ரைசர்ஸ் - டைட்டன்ஸ் 2 அணிகளுமே செம கெத்துதான்..! இன்னுமா அவரைலாம் தூக்கல?

குஜராத் டைட்டன்ஸுக்கு  எதிரான போட்டியில் டாஸ் வென்ற சன்ரைசர்ஸ் ஹைதராபாத் அணி ஃபீல்டிங்கை தேர்வு செய்தது.  

ஐபிஎல் 15வது சீசன் விறுவிறுப்பாக நடந்துவரும் நிலையில், இந்த சீசனில் புதிதாக களமிறங்கியுள்ள குஜராத் டைட்டன்ஸ் அணி ஹர்திக் பாண்டியாவின் கேப்டன்சியில் அபாரமாக விளையாடிவருகிறது. ஆடிய 3 போட்டிகளிலும் அபார வெற்றி பெற்ற குஜராத் டைட்டன்ஸ் அணி, வெற்றிப்பயணத்தை தொடரும் முனைப்பில் களமிறங்கியுள்ளது.

முதல் 2 போட்டிகளில் தோற்று, 3வது போட்டியில் வெற்றி பெற்ற சன்ரைசர்ஸ் அணியும் வெற்றியை தொடரும் முனைப்பில் களமிறங்கியுள்ளது. 

ஹர்திக் பாண்டியா தலைமையிலான குஜராத் டைட்டன்ஸும், கேன் வில்லியம்சன் தலைமையிலான சன்ரைசர்ஸ் ஹைதராபாத்தும் மோதும் போட்டி மும்பை டிஒய்.பாட்டீல் மைதானத்தில் நடக்கிறது. டாஸ் வென்ற சன்ரைசர்ஸ் ஹைதராபாத் கேப்டன் கேன் வில்லியம்சன் ஃபீல்டிங்கை தேர்வு செய்துள்ளார்.

இரு அணிகளுமே ஆடும் லெவனில் எந்த மாற்றமும் செய்யவில்லை. கடந்த போட்டியில் ஆடிய அதே ஆடும் லெவன் காம்பினேஷனுடன் தான் களமிறங்கியுள்ளன.

சன்ரைசர்ஸ் ஹைதராபாத் அணி:

அபிஷேக் ஷர்மா, கேன் வில்லியம்சன் (கேப்டன்), ராகுல் திரிபாதி, எய்டன் மார்க்ரம், நிகோலஸ் பூரன், ஷஷான்க் சிங், வாஷிங்டன் சுந்தர், புவனேஷ்வர் குமார், மார்கோ யான்சென், டி.நடராஜன், உம்ரான் மாலிக்.

குஜராத் டைட்டன்ஸ் அணி:

ஷுப்மன் கில், மேத்யூ வேட் (விக்கெட் கீப்பர்), சாய் சுதர்சன், ஹர்திக் பாண்டியா (கேப்டன்), டேவிட் மில்லர், ராகுல் டெவாட்டியா, அபினவ் மனோகர், ரஷீத் கான், லாக்கி ஃபெர்குசன், முகமது ஷமி, தர்ஷன் நால்கண்டே.

2 அணிகளிலுமே ஒன்றிரண்டு வீரர்கள் பெரிதாக சோபிக்காத நிலையிலும், அவர்களுக்கு தொடர் வாய்ப்பளிக்கும் விதமாக அணியில் எந்த மாற்றமும் செய்யாமல் களமிறங்கியுள்ளன. சன்ரைசர்ஸில் உம்ரான் மாலிக் மற்றும் குஜராத் டைட்டன்ஸில் அபினவ் மனோகர், மேத்யூ வேட் ஆகியோருக்கு மீண்டும் வாய்ப்பு கிடைத்துள்ளது.