ஓரங்கப்பட்ட ஷிகர் தவான் ஒரு நாள் போட்டியில் நம்பர் ஒன் இடம்!

ஒரு நாள் போட்டியில் அதிக ரன்கள் எடுத்தவர்கள் பட்டியலில் ஷிகர் தவான் நம்பர் ஒன் இடம் பிடித்துள்ளார்.

இலங்கை அணிக்கு எதிராக நடந்த 3 டி20 போட்டிகள் கொண்ட தொடரிலும், 3 ஒரு நாள் போட்டிகள் கொண்ட தொடரிலும் ஷிகர் தவான் இடம் பெறவில்லை. கடந்த 2010 ஆம் ஆண்டு விசாகப்பட்டினத்தில் நடந்த ஆஸ்திரேலியாவுக்கு எதிரான ஒரு நாள் போட்டியின் மூலம் ஒரு நாள் போட்டியில் ஷிகர் தவான் அறிமுகமானார். தனது 100ஆவது ஒரு நாள் போட்டியில் சதம் அடித்த 9ஆவது வீரர் என்ற பெருமையை பெற்றார். இதுவரை 167 ஒரு நாள் போட்டிகளில் விளையாடியுள்ள ஷிகர் தவான் 6793 ரன்கள் குவித்துள்ளார். இதில் 17 சதங்கள் மற்றும் 39 அரைசதங்கள் அடங்கும் என்பது குறிப்பிடத்தக்கது. ஒரு நாள் போட்டியில் அதிகபட்சமாக 143 ரன்கள் குவித்துள்ளார்.

கடந்த ஆண்டு வங்கதேசத்தில் சுற்றுப்பயணம் மேற்கொண்ட இந்திய அணி 3 ஒரு நாள் போட்டிகள் கொண்ட தொடரிலும், இரண்டு டெஸ்ட் போட்டிகள் கொண்ட தொடரிலும் விளையாடியது. இதில், ஒரு நாள் தொடரை 1-2 என்ற கணக்கில் இழந்த இந்தியா டெஸ்ட் தொடரை 2-0 என்ற கணக்கில் தொடரை கைப்பற்றியது. வங்கதேசத்திற்கு எதிரான 3 ஒரு நாள் போட்டிகள் கொண்ட தொடரில் ஷிகர் தவான் இடம் பெற்றிருந்தார். இதுவே அவரது கடைசி ஒரு நாள் போட்டி. தற்போது இந்தியாவில் சுற்றுப்பயணம் மேற்கொண்டு இலங்கை அணிக்கு எதிரான டி20 தொடரிலும், ஒரு நாள் தொடரிலும் ஷிகர் தவான் இடம் பெறவில்லை.

இந்தியா வரும் ஆஸ்திரேலியா அணிக்கு எதிரான தொடரில் பங்கேற்கும் இந்திய அணி இன்னும் அறிவிக்கப்படவில்லை. இதில், ஷிகர் தவான் இடம் பெறுவாரா என்பது கேள்விக்குறியாக இருந்தாலும், கடந்த 2020 ஆம் ஆண்டு முதல் ஷிகர் தவான் பங்கேற்றுள்ள 33 போட்டிகளில் 1275 ரன்கள் குவித்து முதலிடம் பிடித்துள்ளார்.

ஷிகர் தவான் - 1275 ரன்கள் (33 ஒரு நாள் போட்டி)
ஷ்ரேயாஸ் ஐயர் - 1061 ரன்கள் (25 ஒரு நாள் போட்டி)
கே எல் ராகுல் - 871 ரன்கள் (21 ஒரு நாள் போட்டி)
விராட் கோலி - 862 ரன்கள் (23 ஒரு நாள் போட்டி)
சுப்மன் கில் - 671 ரன்கள் (13 ஒரு நாள் போட்டி)
ரிஷப் பண்ட் - 519 ரன்கள் (13 ஒரு நாள் போட்டி)
ரோகித் சர்மா - 510 ரன்கள் (14 ஒரு நாள் போட்டி)