உங்க ஊர்ல வச்சு அடிக்கிறீங்கள்ல.. இப்ப வாங்குங்கடா! இந்திய மண்ணில் ஆஸி.,யால் ஜெயிக்க முடியாது - ரமீஸ் ராஜா

இந்தியாவிற்கு எதிரான டெஸ்ட் தொடருக்கு ஆஸ்திரேலிய அணி சரியாக தயாராகவில்லை என்றும், இந்திய மண்ணில் இந்திய அணியை வீழ்த்துவது சாத்தியமே இல்லை என்றும் பாகிஸ்தான் கிரிக்கெட் வாரிய முன்னாள் தலைவர் ரமீஸ் ராஜா தெரிவித்துள்ளார்.  

இந்தியா - ஆஸ்திரேலியா இடையேயான 4 டெஸ்ட் போட்டிகள் கொண்ட தொடர் நடந்துவருகிறது. இந்திய ஆடுகளங்கள் ஸ்பின்னிற்கு சாதகமாக இருக்கும் என்பதால் நேதன் லயன், அஷ்டான் அகர், டாட் மர்ஃபி, குன்னெமன் ஆகிய 4 ஸ்பின்னர்களுடன் இந்தியாவிற்கு வந்தது ஆஸ்திரேலிய அணி. 

இந்தியாவிற்கு எதிராக நல்ல ஸ்பின்னர்களை இறக்கி நெருக்கடி கொடுக்க வேண்டும், இந்திய ஸ்பின்னர்களை திறம்பட எதிர்கொள்ள வேண்டும் என்ற நோக்கில் தான் இந்தியாவிற்கு வந்தது. ஆனால் அவை இரண்டையுமே அந்த அணி சரியாக செய்யவில்லை. முதல் டெஸ்ட்டில் நேதன் லயன் மற்றும் அறிமுக ஸ்பின்னர் டாட் மர்ஃபி ஆகிய 2 ஸ்பின்னர்களுடன் ஆடியது. அந்த டெஸ்ட்டில் இந்திய அணி இன்னிங்ஸ் மற்றும் 132 ரன்கள் வித்தியாசத்தில் அபார வெற்றி பெற்றது. 

2வது டெஸ்ட்டில் குன்னெமனையும் சேர்த்து 3 ஸ்பின்னர்களுடன் ஆடியது. ஆனால் பேட்டிங்கில் சோபிக்கவில்லை. 2வது டெஸ்ட்டின் 2வது இன்னிங்ஸில் ஒரே செசனில் 9 விக்கெட்டுகளை இழந்து 113 ரன்களுக்கு ஆல் அவுட்டானது. அதில் 7 விக்கெட்டுகளை ஜடேஜாவிடமே இழந்தது. இந்திய ஸ்பின்னர்களை எதிர்கொள்வதிலும் சொதப்பி, இந்திய வீரர்களை ஸ்பின்னை வைத்து கட்டுப்படுத்துவதிலும் சொதப்பி 2 டெஸ்ட்டிலும் தோல்விகளை தழுவியது ஆஸ்திரேலிய அணி.

முதல் 2 டெஸ்ட்டிலும் ஜெயித்து 2-0 என தொடரில் முன்னிலை வகிக்கும் நிலையில், ஆஸ்திரேலிய அணி இந்த தொடரை வெல்லும் வாய்ப்பை இழந்துவிட்டது. இந்திய அணி இந்த தொடரை வெல்வதுடன், இன்னும் ஒரு போட்டியில் ஜெயித்தால் டெஸ்ட் சாம்பியன்ஷிப் புள்ளி பட்டியலில் முதலிடத்தை பிடித்துவிடும். 

ஆஸ்திரேலிய அணி 2 டெஸ்ட்டிலும் படுதோல்வி அடைந்த நிலையில், அதுகுறித்து பேசிய ரமீஸ் ராஜா, பிரிஸ்பேன் மற்றும் பெர்த்தில் துணைக்கண்ட அணிகளுக்கு எதிரான டெஸ்ட் போட்டிகளில் ஆஸ்திரேலிய அணி பெரும்பாலும் வெற்றி பெறும். ஆஸ்திரேலிய அணி இந்தியா டெஸ்ட் தொடருக்கு சரியாக தயாராகவில்லை. இந்தியாவில் இந்திய அணியை டெஸ்ட் தொடரில் வீழ்த்துவது சாத்தியமே இல்லாத விஷயம். ஸ்பின்னிற்கு எதிராக ஆஸ்திரேலிய வீரர்கள் மிகச்சுமாராக பேட்டிங் ஆடினார்கள். ஒரே செசனில் 9 விக்கெட்டுகளை இழந்தனர். ஜடேஜா அபாரமாக பந்துவீசினார் என்று ரமீஸ் ராஜா தெரிவித்தார்.