PSL 2023: 2வது எலிமினேட்டரில் பெஷாவர் அணியை வீழ்த்தி லாகூர் காலண்டர்ஸ் ஃபைனலுக்கு தகுதி

பாகிஸ்தான் சூப்பர் லீக் 2வது எலிமினேட்டரில் பெஷாவர் ஸால்மி அணியை 4 விக்கெட் வித்தியாசத்தில் வீழ்த்தி வெற்றி பெற்ற லாகூர் காலண்டர்ஸ் அணி ஃபைனலுக்கு தகுதிபெற்றது. இன்று நடக்கும் ஃபைனலில் முல்தான் சுல்தான்ஸ் - லாகூர் காலண்டர்ஸ் அணிகள் மோதுகின்றன.  

பாகிஸ்தான் சூப்பர் லீக் தொடர் இறுதிக்கட்டத்தை எட்டியுள்ளது. முல்தான் சுல்தான்ஸ், லாகூர் காலண்டர்ஸ், பெஷாவர் ஸால்மி மற்றும் இஸ்லாமாபாத் யுனைடெட் அணிகள் தகுதிச்சுற்றுக்கு முன்னேறின.

முதல் தகுதிப்போட்டியில் லாகூர் காலண்டர்ஸை வீழ்த்தி முல்தான் சுல்தான்ஸ் அணி நேரடியாக ஃபைனலுக்கு முன்னேறியது. முதல் எலிமினேட்டரில் இஸ்லாமாபாத் யுனைடெட் அணியை வீழ்த்தி வெற்றி பெற்ற பெஷாவர் ஸால்மியும், தகுதிப்போட்டியில் தோற்ற லாகூர் காலண்டர்ஸும் 2வது எலிமினேட்டரில் மோதின. 

ஃபைனலுக்கு தகுதிபெறுவதற்கான 2வது எலிமினேட்டர் போட்டியில் டாஸ் வென்ற பெஷாவர் ஸால்மி அணி பேட்டிங்கை தேர்வு செய்தது.

பெஷாவர் ஸால்மி அணி: 

சயிம் அயுப், பாபர் அசாம் (கேப்டன்), டாம் கோலர் காட்மோர், முகமது ஹாரிஸ், பானுகா ராஜபக்சா, ஹசீபுல்லா கான் (விக்கெட் கீப்பர்), ஆமிர் ஜமால், அஸ்மதுல்லா ஓமர்ஸாய், வஹாப் ரியாஸ், முஜீபுர் ரஹ்மான், சல்மான் இர்ஷத்.

லாகூர் காலண்டர்ஸ் அணி: 

மிர்ஸா தாஹிர் பைக், ஃபகர் ஜமான், அப்துல்லா ஷாஃபிக், சாம் பில்லிங்ஸ் (விக்கெட் கீப்பர்), ஆசன் பட்டி, சிக்கந்தர் ராஸா, டேவிட் வீஸ், ரஷீத் கான், ஷாஹீன் அஃப்ரிடி (கேப்டன்), ஹாரிஸ் ராஃப், ஜமான் கான்.

முதலில் பேட்டிங் ஆடிய பெஷாவர் ஸால்மி அணியின் தொடக்க வீரர் சயிம் அயுப் 9 ரன்களுக்கு ஆட்டமிழந்து ஏமாற்றமளித்தார். மற்றொரு தொடக்க வீரரும் கேப்டனுமான பாபர் அசாமும், முகமது ஹாரிஸும் இணைந்து சிறப்பாக பேட்டிங் ஆடி 2வது விக்கெட்டுக்கு 89 ரன்களை சேர்த்தனர். பாபர் அசாம் 42 ரன்களுக்கு ஆட்டமிழந்தார்.அதிரடியாக ஆடி அரைசதம் அடித்த முகமது ஹாரிஸ் 54 பந்தில் 11 பவுண்டரிகள் மற்றும் 2 சிக்ஸர்களுடன் 85 ரன்களை குவிக்க, 20 ஓவரில் 171 ரன்கள் அடித்தது பெஷாவர் ஸால்மி அணி.

172 ரன்கள் என்ற இலக்கை விரட்டிய லாகூர் காலண்டர்ஸ் அணியின் தொடக்க வீரர் ஃபகர் ஜமான் 6 ரன்னுக்கு ஆட்டமிழந்து ஏமாற்றமளித்தாலும், மற்றொரு தொடக்க வீரரான மிர்சா தாஹிர் சிறப்பாக ஆடி அரைசதம் அடித்து 54 ரன்கள் விளாசினார். அதன்பின்னர் பின்வரிசையில் சாம் பில்லிங்ஸ்(28) மற்றும் சிக்கந்தர் ராஸா(23) ஆகிய இருவரும் சிறு பங்களிப்பு செய்ய, கேப்டன் ஷாஹீன் அஃப்ரிடி, 4 பந்தில் ஒரு பவுண்டரி, ஒரு சிக்ஸருடன் 11 ரன்கள் அடித்து லாகூர் அணியை வெற்றி பெற செய்தார்.

2வது எலிமினேட்டரில் பெஷாவர் ஸால்மியை 4 விக்கெட் வித்தியாசத்தில் வீழ்த்தி வெற்றி பெற்ற லாகூர் காலண்டர்ஸ் அணி ஃபைனலுக்கு முன்னேறியது. இன்று நடக்கும் ஃபைனலில் முல்தான் சுல்தான்ஸ் - லாகூர் காலண்டர்ஸ் அணிகள் மோதுகின்றன.