PSL 2023: மேத்யூ வேடின் மந்தமான பேட்டிங்கால் கராச்சி அணிக்கு பின்னடைவு! ஈசானுல்லா மீண்டும் பவுலிங்கில் அசத்தல்

பாகிஸ்தான் சூப்பர் லீக்கில் முல்தான் சுல்தான்ஸுக்கு எதிரான போட்டியில் தாஹிர் அதிரடியாக பேட்டிங் ஆடியும், மேத்யூ வேடின் மந்தமான பேட்டிங்கால் 20 ஓவரில் 167 ரன்கள் மட்டுமே அடித்த கராச்சி கிங்ஸ் அணி, 168 ரன்கள் என்ற சவாலான இலக்கை முல்தான் சுல்தான்ஸுக்கு நிர்ணயித்துள்ளது.  

பாகிஸ்தான் சூப்பர் லீக் தொடர் விறுவிறுப்பாக நடந்துவருகிறது. இன்று கராச்சியில் நடந்துவரும் போட்டியில் கராச்சி கிங்ஸும் முல்தான் சுல்தான்ஸும் ஆடிவருகின்றன. இந்த போட்டியில் டாஸ் வென்ற முல்தான் சுல்தான்ஸ் அணி ஃபீல்டிங்கை தேர்வு செய்தது.

முல்தான் சுல்தான்ஸ் அணி:

ஷான் மசூத், முகமது ரிஸ்வான் (கேப்டன், விக்கெட் கீப்பர்), ரைலீ ரூசோ, டேவிட் மில்லர், குஷ்தில் ஷா, கார்லஸ் பிராத்வெயிட், அன்வர் அலி, அகீல் ஹுசைன், உசாமா மிர், அப்பாஸ் அஃப்ரிடி, ஈசானுல்லா.

கராச்சி கிங்ஸ் அணி:

மேத்யூ வேட் (விக்கெட் கீப்பர்), ஜேம்ஸ் வின்ஸ், டயாப் தாஹிர், ஷோயப் மாலிக், இமாத் வாசிம் (கேப்டன்), பென் கட்டிங், இர்ஃபான் கான், ஆமீர் யாமின், முகமது மூசா, டப்ரைஸ் ஷம்ஸி, அகிஃப் ஜாவேத்.

முதலில் பேட்டிங் ஆடிய கராச்சி கிங்ஸ் அணியின் தொடக்க வீரர் மேத்யூ வேட் மந்தமாக பேட்டிங் ஆடினார். அதிரடியாக ஆடிய மற்றொரு தொடக்க வீரர் ஜேம்ஸ் வின்ஸ் 12 பந்தில் 27 ரன்கள் அடித்து ஆட்டமிழந்தார். 3ம் வரிசையில் இறங்கிய தாஹிர் அதிரடியாக ஆடி அரைசதம் அடித்தார். பொறுப்புடன் பேட்டிங் ஆடிய தாஹிர் 46 பந்தில் 65 ரன்கள் அடித்தார். ஆனால் தொடக்க வீரர் மேத்யூவேட் படுமந்தமாக பேட்டிங் ஆடி 47 பந்தில் 46 ரன்கள் மட்டுமே அடித்ததால், கராச்சி கிங்ஸ் அணி 20 ஓவரில் 167 ரன்கள் மட்டுமே அடித்தது.

8 ஓவர்கள் பேட்டிங் ஆடி மேத்யூ வேட் 46 ரன்கள் மட்டுமே அடித்தது கராச்சி கிங்ஸ் அணிக்கு பெரும் பின்னடைவாக அமைந்தது. அவர் மட்டும் அடித்து ஆடியிருந்தால் இன்னும் அதிகமான ஸ்கோர் அடித்திருக்கலாம். இந்த சீசனில் அபாரமாக பந்துவீசி வரும் முல்தான் சுல்தான்ஸ் ஃபாஸ்ட் பவுலர் ஈசானுல்லா இந்த போட்டியில் அபாரமாக பந்துவீசி 4 ஓவரில் 22 ரன்கள் மட்டுமே விட்டுக்கொடுத்து 2 விக்கெட்டையும் வீழ்த்தினார். 168 ரன்கள் என்ற இலக்கை முல்தான் சுல்தான்ஸ் அணி விரட்டிவருகிறது.