Pakistan vs Bangladesh:வங்கதேசத்தை துரத்தி அடித்த பாகிஸ்தான் – புள்ளிப்பட்டியலில் 5ஆவது இடத்திற்கு முன்னேற்றம்

வங்கதேசத்திற்கு எதிரான 31 ஆவது லீக் போட்டியில் பாகிஸ்தான் 7 விக்கெட் வித்தியாசத்தில் வெற்றி பெற்று புள்ளிப்பட்டியலில் 5ஆவது இடத்திற்கு முன்னேறியுள்ளது.

பாகிஸ்தான் மற்றும் வங்கதேசம் அணிகளுக்கு இடையிலான 31ஆவது லீக் போட்டி கொல்கத்தா ஈடன் கார்டன் மைதானத்தில் நடந்தது. இதில், டாஸ் வென்று முதலில் பேட்டிங் செய்த வங்கதேச அணி 204 ரன்களுக்கு அனைத்து விக்கெட்டுகளையும் இழந்தது. இதில், அதிகபட்சமாக மஹ்முதுல்லா 56 ரன்கள் சேர்த்து ஆட்டமிழந்தார். லிட்டன் ஹாஸ் 45 ரன்களும், ஷாகிப் அல் ஹசன் 43 ரன்களும் சேர்த்தனர்.

பின்னர் எளிய இலக்கை துரத்திய பாகிஸ்தான் அணியில் தொடக்க வீரர்கள் அப்துல்லா ஷபீக் மற்றும் ஃபகர் ஜமான் இருவரும் அதிரடியாக விளையாடி ரன்கள் குவித்தனர். இந்த ஜோடி முதல் விக்கெட்டிற்கு 128 ரன்கள் குவித்தது. இதில் அப்துல்லா ஷபீக் 69 பந்துகளில் 9 பவுண்டரி, 2 சிக்ஸர்கள் உள்பட 68 ரன்கள் குவித்து ஆட்டமிழந்தார். அதன் பிறகு வந்த கேப்டன் பாபர் அசாம் 9 ரன்களில் வெளியேற, ஃபகர் ஜமான் 74 பந்துகளில் 3 பவுண்டரி, 7 சிக்ஸர்கள் உள்பட 81 ரன்கள் குவித்து ஆட்டமிழந்தார்.

இதையடுத்து விக்கெட் கீப்பர் முகமது ரிஸ்வான் மற்றும் இப்திகார் அகமது இருவரும் கடைசி நின்று விளையாடி பாகிஸ்தான் அணியை வெற்றி பெறச் செய்தனர். இறுதியாக பாகிஸ்தான் 32.3 ஓவர்களில் 3 விக்கெட் இழப்பிற்கு 205 ரன்கள் எடுத்து 7 விக்கெட் வித்தியாசத்தில் வெற்றி பெற்றது. இந்த வெற்றியின் மூலமாக பாகிஸ்தான் புள்ளிப்பட்டியலில் 5 ஆவது இடத்திற்கு முன்னேறியுள்ளது. அதுமட்டுமின்றி வங்கதேச அணி விளையாடிய 7 போட்டிகளில் 6ல் தோல்வி அடைந்து உலகக் கோப்பை தொடரிலிருந்து முதல் அணியாக வெளியாகியது.