டெத் ஓவர்களில் கலக்கிய லக்னோ! குஜராத் அதிர்ச்சித் தோல்வி!

ஐபிஎல் 2025 போட்டியில் லக்னோ சூப்பர் ஜெயன்ட்ஸ் அணி, குஜராத் டைட்டன்ஸ் அணியை 33 ரன்கள் வித்தியாசத்தில் வீழ்த்தியது. மிட்செல் மார்ஷின் சதம் மற்றும் சிறப்பான பந்துவீச்சு லக்னோவின் வெற்றிக்கு முக்கிய காரணமாக அமைந்தது.

ஐபிஎல் 2025 தொடரில் இன்று நடைபெற்ற விறுவிறுப்பான லீக் ஆட்டத்தில், லக்னோ சூப்பர் ஜெயன்ட்ஸ் அணி குஜராத் டைட்டன்ஸ் அணியை 33 ரன்கள் வித்தியாசத்தில் வீழ்த்தியது. மிட்செல் மார்ஷின் அதிரடி சதம் மற்றும் சிறப்பான பந்துவீச்சு லக்னோவின் வெற்றிக்கு முக்கிய பங்காற்றியது.

மிட்செல் மார்ஷ் சதம்:

அகமதாபாத்தில் உள்ள நரேந்திர மோடி மைதானத்தில் நடைபெற்ற இப்போட்டியில், டாஸ் வென்ற குஜராத் டைட்டன்ஸ் அணி பந்துவீச முடிவு செய்தது. முதலில் பேட்டிங் செய்த லக்னோ சூப்பர் ஜெயன்ட்ஸ் அணி, மிட்செல் மார்ஷின் அபார சதத்தின் (117 ரன்கள்) உதவியுடன் நிர்ணயிக்கப்பட்ட 20 ஓவர்களில் 235 ரன்கள் குவித்து மலை போன்ற இலக்கை நிர்ணயித்தது. மார்ஷ் மற்றும் நிக்கோலஸ் பூரன் (50 ரன்கள்) ஆகியோர் குஜராத் பந்துவீச்சாளர்களை கடுமையாகத் தாக்கினர்.

குஜராத் பேட்டிங் தடுமாற்றம்:

236 ரன்கள் என்ற கடினமான இலக்குடன் களமிறங்கிய குஜராத் டைட்டன்ஸ் அணி, ஆரம்பம் முதலே விக்கெட்டுகளை இழந்து தடுமாறியது. சுப்மன் கில் மற்றும் ஜோஸ் பட்லர் ஆகியோர் விரைவாக ஆட்டமிழந்தனர். பின்னர் வந்த ஷெர்ஃபேன் ரூதர்போர்ட் மற்றும் ஷாருக்கான் ஆகியோர் நிலைத்து நின்று ஆடினாலும், லக்னோ பந்துவீச்சாளர்களின் துல்லியமான பந்துவீச்சு அவர்களுக்கு பெரிய ரன் பார்ட்னர்ஷிப்களை அமைக்க விடவில்லை.

கடைசி நான்கு ஓவர்களில் லக்னோ பந்துவீச்சாளர்கள் அதிக ரன்களை லீக் செய்யாமல் சீரான இடைவெளியில் விக்கெட் எடுத்தனர். இறுதியில், குஜராத் டைட்டன்ஸ் அணி 20 ஓவர்களில் 202 ரன்கள் மட்டுமே எடுத்து 33 ரன்கள் வித்தியாசத்தில் தோல்வியடைந்தது.

ஆட்ட நாயகன் மார்ஷ்:

லக்னோ தரப்பில் மிட்செல் மார்ஷ் ஆட்டநாயகனாகத் தேர்ந்தெடுக்கப்பட்டார். இந்த வெற்றியின் மூலம் லக்னோ சூப்பர் ஜெயன்ட்ஸ் அணி, ப்ளேஆஃப் வாய்ப்பை இழந்திருந்தாலும், குஜராத் டைட்டன்ஸ் அணியின் முதல் இரண்டு இடங்களுக்கான முயற்சியில் பின்னடைவை ஏற்படுத்தியுள்ளது. இப்போது குஜராத் அணி டாப் 2 இடத்தை உறுதிசெய்ய தங்கள் கடைசி லீக் போட்டியில் சென்னை அணியை வீழ்த்த வேண்டிய கட்டாயத்தில் உள்ளது.