வெறும் 30 நிமிட நடைபயிற்சி போதும்! இதய நோய்க்கு மொத்தமாக குட்பை சொல்லுங்க

உலகில் அதிக மரணத்தை ஏற்படுத்தும் நோய்களில் இதய நோய் முதன்மையானது. நவீன வாழ்க்கை முறையில் உட்கார்ந்தே பணிபுரிவதால் இந்நோயின் தாக்கம் அதிகரித்துள்ளது.

நவீன வாழ்க்கை முறையில் பெரும்பாலானோர் அலுவலக மேசை, வீட்டு சோபா என உட்கார்ந்தே நேரத்தைச் செலவிடுகின்றனர். இந்த உடல் செயல்பாடு இல்லாதது நம் உடலுக்குப் பெரும் கேடு விளைவிக்கிறது. கொலம்பியா பல்கலைக்கழகத்தின் இர்விங் மருத்துவ மையத்தின் ஆய்வாளர்கள், தினமும் 30 நிமிடங்கள் நடைப்பயிற்சி மேற்கொள்வது இதய நோய் அபாயத்தைக் குறைக்கும் என்று கண்டறிந்துள்ளனர்.

ஆய்வு என்ன சொல்கிறது?

7,985 பெரியவர்கள் பங்கேற்ற இந்த ஆய்வில், அவர்களின் அன்றாட நடவடிக்கைகள், உட்கார்ந்திருக்கும் நேரம் மற்றும் உடற்பயிற்சி அளவு ஆகியவை கண்காணிக்கப்பட்டன. தினமும் 10 மணி நேரத்திற்கும் மேல் உட்கார்ந்திருப்பவர்களுக்கு இதய நோய் அபாயம் அதிகம். தினமும் 30 நிமிடங்கள் நடைப்பயிற்சி செய்பவர்களுக்கு இந்த அபாயம் 61% குறைவாக உள்ளது.

ஆய்வின் தலைமை ஆய்வாளர் கீத் டயஸ், "அதிக உடற்பயிற்சி தேவையில்லை, சிறிது நேரம் நடைப்பயிற்சி செய்தாலே போதுமானது. நீண்ட நேரம் உட்கார்ந்து வேலை செய்பவர்கள் ஒவ்வொரு மணி நேரத்திற்கும் ஒரு முறை எழுந்து நிற்க வேண்டும் அல்லது நடக்க வேண்டும்" என்று கூறினார்.

ஏன் இப்படி நடக்கிறது?

நீண்ட நேரம் உட்கார்ந்திருப்பது இரத்த ஓட்டத்தைக் குறைக்கிறது, வளர்சிதை மாற்றத்தைக் குறைக்கிறது மற்றும் உடலில் வீக்கத்தை அதிகரிக்கிறது. இவை அனைத்தும் இதயத்தில் கூடுதல் அழுத்தத்தை ஏற்படுத்தி, இதய நோய் அபாயத்தை அதிகரிக்கின்றன. தினமும் சிறிது நேரம் நடைப்பயிற்சி செய்வது இந்தப் பிரச்சினையைக் கட்டுப்படுத்த உதவும்.

என்ன செய்ய வேண்டும்?

அலுவலகத்திலோ வீட்டிலோ நீண்ட நேரம் உட்கார்ந்திருப்பது நல்லதல்ல. ஆனால் அதற்காக கடினமான உடற்பயிற்சி செய்ய வேண்டியதில்லை. சில எளிய மாற்றங்கள் மூலம் நம் ஆரோக்கியத்தைப் பாதுகாக்கலாம்.

* லிஃப்டுக்குப் பதிலாக படிகளில் ஏறுங்கள்.

* அருகிலுள்ள இடங்களுக்கு நடந்து செல்லுங்கள்.

* தொலைபேசியில் பேசும்போது நடந்து கொண்டே பேசுங்கள்.

* நீண்ட நேரம் கணினி முன் உட்கார்ந்து வேலை செய்யும்போது, ஒவ்வொரு மணி நேரத்திற்கும் 5-10 நிமிடங்கள் எழுந்து நடக்கவும்.