ஈரோடு ஸ்பெஷல் பச்சை புளி ரசம்...நாக்கு ருசிக்க ஒரு பிடி பிடிக்கலாம்

ரசம் ஆரோக்கியமான உணவு ,எளிமையான உணவு தான் என்றாலும் அனைவருக்கும் இதை சுவையாக வைக்க தெரியாது. மசாலா அளவு சரியாக தெரியாததால் சுவை மாறிப் போகும். ஆனால் ஈரோடு பச்சை புளி ரசம், மசாலாவே இல்லாமல் செய்வதால் அந்த கவலையே நமக்கு வேண்டாம். இனி அனைவருமே சுவையான ரசம் செய்யலாம். 

பச்சை புளி ரசம் என்பது ஈரோடு மற்றும் கொங்கு நாட்டில் பரவலாக செய்யப்படும் ஒரு சிறப்பான உணவு ஆகும். இது உடலுக்கு குளிர்ச்சி அளிக்கும், மசாலா போடாததால் மிகவும் ஆரோக்கியமானது. நேச்சுரல் சுவை, ஈஸியா செய்வது தான் இந்த ரசத்தின் ஸ்பெஷலே. வாங்க எப்படி செய்வது என தெரிந்து கொள்ளலாம்.

தேவையான பொருட்கள்:

பச்சை புளி (Raw Tamarind)    - சிறிய எலுமிச்சை அளவு
தண்ணீர் -  2 கப்
பச்சைமிளகாய் - 2 (நீளமாக வெட்டியது)
சின்ன வெங்காயம்     - 5-6 (அரைத்தது)
தக்காளி - 1 (நறுக்கியது)
கருவேப்பிலை -  சிறிது
கொத்தமல்லி -  சிறிதளவு
உப்பு -  தேவையான அளவு
பெருங்காயத்தூள்    - 1/4  டீஸ்பூன்

தாளிக்க தேவையானவை:

கடுகு - 1/2  டீஸ்பூன்
வெந்தயம் - 1/4  டீஸ்பூன்
சுக்கு பொடி  - 1/4  டீஸ்பூன்
காய்ந்த மிளகாய் -  2
நல்லெண்ணெய் - 1 டேபிள் ஸ்பூன்

செய்முறை: 

- புளியை நீரில் கரைத்து சாறு எடுக்க பச்சை புளியை சிறிது நீரில் (1/2 கப்) நன்றாக பிசைந்து, சாறு எடுத்து கொள்ளவும். இதை ஒரு பாத்திரத்தில் 2 கப் தண்ணீர் சேர்த்து கலந்து வைத்துக்கொள்ளவும்.
- ஒரு பாத்திரத்தில் புளி நீர், பச்சைமிளகாய், வெங்காயம், தக்காளி, உப்பு, பெருங்காயத்தூள், மற்றும் கருவேப்பிலை சேர்க்கவும். இதை மிதமான தீயில் 5-7 நிமிடம் கொதிக்க விடவும். புளியின் கசப்பு நீங்கி, சுவை ஒன்றாக கலந்து வரும்.
- தாளிக்க ஒரு சிறிய வாணலியில் நல்லெண்ணெய் ஊற்றி, கடுகு, வெந்தயம், காய்ந்த மிளகாய், சுக்கு பொடி சேர்த்து தாளிக்கவும். இதை பச்சை புளி ரசத்தில் சேர்த்து கிளறவும். இறுதியாக நறுக்கிய கொத்தமல்லி சேர்த்து அடுப்பை அணைக்கவும்.

வெள்ளை சாதத்துடன்  சிறிது நெய் சேர்த்து சாப்பிட்டால் அருமையாக இருக்கும். தோசை, இடியப்பத்திற்கும் இதை தொட்டுக் கொண்டால் வித்தியாசமான சுவை கிடைக்கும்.  நாட்டு வைத்திய குணம் உள்ளதால் இது ஜீரண சக்தியை அதிகரிக்கும், வயிற்றை சுகமாக வைக்கும்.

புளியின் புளிப்பு சுவையை குறைக்க  கொதிக்கும் போது சிறிது உப்பு அதிகரிக்கலாம். விரும்பினால் பச்சை மிளகாய் எண்ணிக்கையை மாற்றலாம். காரத்திற்கேற்ப அளவைக் கூட்டலாம். இயற்கையான சுவை கிடைக்க  நல்லெண்ணெய் பயன்படுத்தவும். சிறிது சீரகம் சேர்த்தால்  இது நல்ல வாசனையையும், ஜீரண சக்தியையும் அதிகரிக்கும்.

இது கொங்கு நாட்டின் பழைய பாட்டிகளின் ரெசிபி. மசாலா இல்லாமல், மிக எளிய சுவையில் புளியின் இயற்கை சுவை மாறாமல் செய்வது. வீட்டில் சட்டென தயார் செய்து அனைவரின் பாராட்டுக்களையும் பெற்று விடலாம்.