Ramayana Trailer : நாடு முழுக்க ஆவலுடன் எதிர்பார்த்த 'ராமாயணம்' படத்தின் ட்ரெய்லர் வெளியாகிவிட்டது. 4 நிமிடம் 10 விநாடிகள் ஓடும் இந்த ட்ரெய்லரில், என்னென்ன இருக்கிறது என்பதை பார்க்கலாம்.
நிதேஷ் திவாரி இயக்கத்தில் உருவாகும் 'ராமாயணம்' படத்தின் முதல் ட்ரெய்லரை படக்குழு வெளியிட்டுள்ளது. இதில் ரன்பீர் கபூர் ஸ்ரீராமனாகவும், கன்னட ஸ்டார் யஷ் ராவணனாகவும், சாய் பல்லவி சீதையாகவும் நடிக்கின்றனர். நமித் மல்ஹோத்ராவின் DNEG, பிரைம் ஃபோகஸ் ஸ்டுடியோஸுடன் இணைந்து யஷும் இந்தப் படத்தைத் தயாரிக்கிறார். ஜூலை 30 அன்று அதிகாலை 4:15 மணிக்கு பிரம்ம முகூர்த்தத்தில் இந்த ட்ரெய்லரை வெளியிட்டனர். வழக்கமாக டிரெய்லர்கள் மாலையில் தான் வெளியிடப்படும், ஆனால் அதிகாலையில் வெளியிடப்பட்ட முதல் ட்ரெய்லர் என்கிற பெருமையை இது பெற்றுள்ளது.
ட்ரெய்லரை ராவணன் கதாபாத்திரத்தை அறிமுகப்படுத்தியே தொடங்குகிறார்கள். 'கர்ஜிக்கும் அரக்க மன்னனாக' யஷ் மிரட்டுகிறார். லங்கா நகரம், புஷ்பக விமானம், ராவணனின் ஆட்சி போன்ற காட்சிகள் விஷுவல் ட்ரீட்டாக அமைந்துள்ளன. அதன்பிறகு, ஸ்ரீராமனாக ரன்பீர் கபூர் குதிரையேற்றம் செய்வதும், சீதையுடனான காட்சிகளும் அழகாக இருக்கின்றன. சீதையாக வரும் சாய் பல்லவியின் இயல்பான அழகும், அமைதியான நடிப்பும் கவனத்தை ஈர்க்கிறது. குறிப்பாக, அவரது டயலாக்கை ரசிகர்கள் பாராட்டுகிறார்கள்.
ஸ்ரீராமர்-சீதை திருமணம், கைகேயியின் முடிவால் அவர்கள் வனவாசம் செல்வது, தசரத மகாராஜாவின் தவிப்பு போன்ற உணர்ச்சிகரமான காட்சிகள் ட்ரெய்லரில் கவர்கின்றன. லட்சுமணனாக ரவி துபே, கைகேயியாக லாரா தத்தா, தசரதனாக அருண் கோவிலும் நடித்துள்ளனர். ஏ.ஆர். ரஹ்மான் மற்றும் ஹான்ஸ் ஜிம்மர் கூட்டணியின் பின்னணி இசை, ட்ரெய்லரின் மிகப்பெரிய பலமாக அமைந்துள்ளது. படத்தின் பிரம்மாண்டம் ட்ரெய்லரிலேயே கண்கூடாக தெரிகிறது.
இந்த 4 நிமிட ட்ரெய்லரில் படத்தின் முக்கிய அம்சங்களை காட்டிவிட்டனர். கதை எல்லோருக்கும் தெரிந்திருந்தாலும், விஷுவல் எஃபெக்ட்ஸ் எப்படி இருக்கும் என்பதற்கு இது ஒரு சாம்பிள். மேலும், ராவணன் கதாபாத்திரத்திற்கு அதிக முக்கியத்துவம் கொடுத்திருப்பது ட்ரெய்லரில் தெரிகிறது. ஆனால் இறுதியில், ராமன் கையால் ராவணன் அழிவது உறுதி. சோனி பிக்சர்ஸ் இந்தப் படத்தை உலகளவில் வெளியிடுகிறது. சமீபத்தில் அமெரிக்காவின் 'சான் டியாகோ காமிக்-கான் 2026' நிகழ்வில் படத்தின் சிறப்பு காட்சிகளை திரையிட்டனர். 'ராமாயணம்: பார்ட்-1' இந்த ஆண்டு தீபாவளிக்கு, நவம்பர் 5ந் தேதி அன்று வெளியாகிறது. ராமாயணம் படத்திற்காக நடிகை சாய் பல்லவிக்கு ரூ.15 கோடி சம்பளமாக வழங்கப்பட்டு உள்ளதாக தகவல்கள் தெரிவிக்கின்றன. இதுவே அவரின் கெரியரில் அவர் வாங்கிய அதிகபட்ச சம்பளம் ஆகும்.
