பிரியங்கா நல்காரி, ஹீரோயினாக நடித்து வந்த 'சீதா ராமன்' தொடரில் இருந்து, சமீபத்தில் விலகிய நிலையில், தற்போது புதிய சீரியலில் நடிக்க உள்ளதாக தகவல் வெளியாகியுள்ளது.
சன் டிவி தொலைக்காட்சியில் சுமார் 4 வருடங்களுக்கு மேல் வெற்றிகரமாக ஒளிபரப்பாகி வந்த 'ரோஜா' சீரியல் மூலம் ஒட்டு மொத்த இல்லத்தரசிகள் மனதையும் கொள்ளைகொண்டவர் பிரியங்கா நல்காரி. இந்த தொடர் கடந்த ஆண்டு நிறைவடைந்தது. எனவே மீண்டும் சன் டிவியில் ஒளிபரப்பாகும் புதிய சீரியலில் தான் இவர் நடிப்பார் என ரசிகர்கள் எதிர்பார்த்தனர்.
ஆனால் யாரும் எதிர்பாராத விதமாக ஜீ தமிழ் தொலைக்காட்சிக்கு தாவிய பிரியங்கா, 'சீதா ராமன்' என்கிற தொடரில் கதாநாயகியாக நடிக்க துவங்கினார். ஒரு பெண்ணின் அழகு என்பவது அவள் முகத்தில் இல்லை அகத்தில் தான் உள்ளது என்பதை மாமியாருக்கு எடுத்துரைக்கும் விதமாக இந்த சீரியலில் கதைக்களம் அமைத்திருந்தது.
இந்த சீரியல் துவங்கிய சில நாட்களிலேயே ரசிகர்கள் மத்தியில் நல்ல வரவேற்பை பெற்று ஒளிபரப்பாகி வந்த நிலையில், பிரியங்கா திடீர் என தன்னுடைய நீண்ட நாள் காதலரை திருமணம் செய்து கொண்டதால் கணவரின் விருப்பத்திற்கு ஏற்ப, சீரியலில் இருந்து விலகி.. குடும்பம், குழந்தை என வாழ உள்ளதாக தெரிவித்து இந்த சீரியலில் இருந்து அதிரடியாக விலகினார். இவர் விலகியதால், தற்போது இந்த சீரியலில், மிகமிக அவசரம் உள்ளிட்ட சில படங்களில் நடித்துள்ள நடிகை ப்ரியங்கா நடித்து வருகிறார்.
இதை தொடர்ந்து திடீர் என மீண்டும் சீரியலில் நடிக்க உள்ளதை பிரியங்கா உறுதி செய்துள்ளார். அதாவது ஜீ தமிழில் ஒளிபரப்பாக இருக்கும், புதிய தொடரான நல தமயந்தி என்ற தொடரில் தான் பிரியங்கா நடிக்க உள்ளாராம். இந்த சீரியலின் பூஜையின் போது எடுக்கப்பட்ட புகைப்படம் வெளியாகி வைரலாகி வருகிறது.
இந்த தொடரில், ஹீரோவாக சமீபத்தில் விஜய் டிவி தொடரான 'கண்ணே கலைமானே' சீரியலில் இருந்து விலகிய, நடன இயக்குனர் நந்தா நடிக்க உள்ளதாக கூறப்படுகிறது. விரைவில் இந்த சீரியல் குறித்த அறிவிப்பு வெளியாகும் என எதிர்பார்க்கப்படுகிறது.
சேனலை கிளிக் செய்து பின்தொடரவும்