7,80,000 ஆண்டுகளுக்கு பிறகு மாறிய பூமியின் காந்த சக்தி: சாட்டிலைட்டுகளுக்கு பேராபத்து? நாசா சொல்லும் அதிர்ச்சி உண்மை!

பூமியின் காந்தப்புலம் கடந்த 200 ஆண்டுகளில் 9% வரை பலவீனமடைந்துள்ளதாலும், வட காந்த துருவம் சைபீரியாவை நோக்கி வேகமாக நகர்வதாலும் காந்த துருவ மாற்றம் ஏற்கனவே தொடங்கிவிட்டதோ என்ற அச்சம் எழுந்துள்ளது.

காந்த துருவங்கள் தலைகீழாக மாறும்போது என்ன நடக்கும்?

இன்றைய உலகின் மிகப்பெரிய அச்சுறுத்தலாகப் புவி வெப்பமயமாதல் மற்றும் பருவநிலை மாற்றம் உருவெடுத்துள்ளது. இதற்குக் மனிதர்களின் செயல்பாடுகளே முதன்மைக் காரணம் என்பதை நாம் அறிவோம். இருப்பினும், சில ஆய்வாளர்கள் இதனைப் பூமியில் சில ஆயிரம் முதல் லட்சக்கணக்கான ஆண்டுகளுக்கு ஒருமுறை நடக்கும் ‘காந்த துருவ மாற்றத்துடன்’ தொடர்புபடுத்துகின்றனர். பூமியின் வடக்கு மற்றும் தெற்கு காந்த துருவங்கள் தங்களுக்குள் இடத்தை மாற்றிக்கொள்ளும் நிகழ்வின் போது, பூமியின் பாதுகாப்பாக விளங்கும் காந்தப்புலம் (Magnetic Field) பெருமளவில் பலவீனமடைகிறது. கடந்த 200 ஆண்டுகளில் பூமியின் காந்தப்புலம் சுமார் 9 % பலவீனமடைந்துள்ளது.

இது துருவ மாற்றம் விரைவுபடுத்தப்படுவதற்கான அறிகுறியாக இருக்கலாம் என்று விஞ்ஞானிகள் கருதுகின்றனர். காந்தப்புலம் பலவீனமடைவதால் விண்வெளியில் இருந்து வரும் 'சூரியக் கதிர்கள்' மற்றும் 'காஸ்மிக் கதிர்கள்' (Cosmic Rays) பூமியின் வளிமண்டலத்திற்குள் எளிதாக ஊடுருவக்கூடும். ஆய்வாளர் ஜேக்கப் ஸ்வென்ஸ்மார்க் உள்ளிட்ட விஞ்ஞானிகளின் ஆய்வுகளின்படி, இந்தக் கதிர்கள் வளிமண்டலத்தில் ஐயோனியாக்கத்தை (Ionisation) அதிகரித்து, மேகங்களின் அமைப்பிலும் பருவநிலையிலும் மாற்றங்களை ஏற்படுத்தக்கூடும். மேலும், இது மனிதர்களின் டி.என்.ஏ -வையும் பாதிக்கக்கூடிய 2-ம் நிலை கதிர்வீச்சுகளை உருவாக்கும் திறன் கொண்டது.

மனித இனம் அழியுமா - அறிவியல் உண்மைகள் என்ன?

நாசாவின் (NASA) கூற்றுப்படி, கடந்த காலத்தில் நடந்த காந்த துருவ மாற்றங்கள் எப்போதுமே உயிரினங்களின் மொத்த அழிவிற்கோ அல்லது பெரிய இயற்பியல் பேரழிவுகளுக்கோ வழிவகுத்ததில்லை. படிம ஆதாரங்களும் காந்த துருவ மாற்றத்திற்கும் உயிரின அழிவிற்கும் எந்தவிதமான தொடர்பும் இல்லை என்பதைத் தெளிவுபடுத்துகின்றன. இருப்பினும், காந்தப்புலம் பலவீனமாக இருக்கும் இடைப்பட்ட காலத்தில், சூரியத் துகள்களின் கதிர்வீச்சு காரணமாக பூமிக்கு சில நடைமுறைச் சிக்கல்கள் வரக்கூடும்:

செயற்கைக்கோள் தொடர்புகள் துண்டிக்கப்படுவது, மின்சார விநியோகக் கட்டமைப்புகள் (Power Grids) பாதிக்கப்படுவது, விமானப் போக்குவரத்து மற்றும் ஜி.பி.எஸ் (GPS) அமைப்புகள் சீர்குலைவது.

துருவ மாற்றம் நடக்க எவ்வளவு காலம் ஆகும்?

காந்த துருவ மாற்றம் என்பது ஒரே இரவில் நடக்கும் திடீர் நிகழ்வு அல்ல. முழுமையான மாற்றம் நடப்பதற்கு 2,000 முதல் 10,000 ஆண்டுகள் வரை ஆகலாம். இந்த மாற்றத்தின் போது, பூமியில் ஒரே ஒரு வட துருவம் மற்றும் தென் துருவத்திற்குப் பதிலாக, ஆங்காங்கே பலவீனமான பல சிறிய காந்த துருவங்கள் உருவாகி, பின்னர் மீண்டும் நிலைபெறும். இதை துல்லியமாக கணிப்பது சாத்தியமில்லை. வரலாற்றின் படி, ஒவ்வொரு 2,00,000 முதல் 3,00,000 ஆண்டுகளுக்கு ஒருமுறை காந்த மாற்றம் நடந்துள்ளது. ஆனால், கடைசியாகப் பூமி சந்தித்த மாபெரும் காந்த துருவ மாற்றம் சுமார் 7,80,000 ஆண்டுகளுக்கு முன்பு நடந்துள்ளது. நீண்ட இடைவெளிக்குப் பிறகும், அடுத்த மாற்றம் எப்போது நடக்கும் என்பதை யாராலும் உறுதியாகக் கூற முடியாது.

காந்த துருவ மாற்றம் ஏற்கனவே தொடங்கிவிட்டதா?

துருவங்கள் தங்களின் இடத்தை மாற்றத் தொடங்கிவிட்டன என்பதற்கான சில அறிகுறிகள் தென்படுகின்றன. கடந்த 150–200 ஆண்டுகளில் பூமியின் காந்த சக்தி 9% வரை குறைந்துள்ளது. வட காந்த துருவம் கனடாவின் வடபகுதியில் இருந்து சைபீரியாவை நோக்கி ஆண்டுக்கு 50–60 கி.மீ வேகத்தில் நகர்ந்து வருகிறது. தென்னமெரிக்கா மற்றும் தெற்கு அட்லாண்டிக் பெருங்கடலுக்கு மேலே காந்தப்புலம் பலவீனமடைந்துள்ள பகுதி விரிவடைந்து வருகிறது. பூமியின் காந்த துருவ மாற்றம் ஏற்கனவே தொடங்கயிருந்தாலும் கூட, அதனால் மனித இனத்திற்கு பேரழிவோ அல்லது உயிரினங்கள் மொத்தமாக அழிவதோ ஏற்படாது என்பதை அறிவியல் ஆதாரங்கள் உறுதியாகத் தெரிவிக்கின்றன.