Rare snake spotted: பார்க்க ஒல்லி... ஆனால் புல்லட் வேகம்; 150 ஆண்டுகளுக்கு பிறகு தென்பட்ட அரிய மணல் பாம்பு!

Afro-Asian sand snake spotted: குஜராத்தின் கட்ச் பகுதியில் உள்ள காலா துங்கர் அருகே வனத்துறையினரின் வழக்கமான ரோந்துப் பணியின் போது, 'ஷோகாரி சாண்ட் ரேசர்' (Schokari Sand Racer) என்றழைக்கப்படும் அரிய ஆப்ரோ-ஆசிய மணல் பாம்பு தென்பட்டுள்ளது.

150 ஆண்டுகளுக்கு பிறகு தென்பட்ட அரிய வகை மணல் பாம்பு

19-ம் நூற்றாண்டில் கட்ச் பகுதியில் கடைசியாக அதிகாரப்பூர்வமாகப் பதிவு செய்யப்பட்ட அரிய வகை பாம்பு ஒன்று, தற்போது மீண்டும் அதே பகுதியில் உயிருடன் தென்பட்டுள்ளது. குஜராத்தின் வறண்ட நிலப்பரப்பில் மறைந்திருக்கும் அறியப்படாத வனவிலங்கு பல்லுயிர்த்தன்மையை இந்த அபூர்வக் காட்சி வெளிப்படுத்தியுள்ளது.

குஜராத் மாநிலம் கட்ச் பகுதியில் வனத்துறையினர் மேற்கொண்ட வழக்கமான ரோந்துப் பணியின்போது இந்த அசாதாரணக் கண்டுபிடிப்பு நிகழ்ந்துள்ளது. கடந்த 150 ஆண்டுகளுக்கும் மேலாக இப்பகுதியில் உறுதியாகப் பதிவு செய்யப்படாத ஓர் அரிய பாம்பு இனம் தற்போது கண்டறியப்பட்டுள்ளது.

'ஷோகாரி சாண்ட் ரேசர்' (Schokari Sand Racer) என்று அழைக்கப்படும் இந்த ஆப்ரோ-ஆசிய மணல் பாம்பு (Afro-Asian sand snake), புஜ் நகருக்கு அருகிலுள்ள காலா துங்கர் (Kala Dungar) பகுதியில் அண்மையில் தென்பட்டது. இதன் மூலம் 19-ம் நூற்றாண்டு வரலாற்றுப் பதிவு ஒன்று மீண்டும் புதுப்பிக்கப்பட்டுள்ளது.

எதிர்பாராத சந்திப்பு

செப்.6 அன்று மாலை, புஜ் வடக்கு வனச்சரகத்தைச் சேர்ந்த 32 வயதான வனச்சரக அலுவலர் ஜெயேஷ் துமதியா (Jayesh Dumadiya) தனது குழுவினருடன் ரோந்துப் பணியை முடித்துத் திரும்பிக் கொண்டிருந்தபோது இந்தக் கண்டுபிடிப்பு நிகழ்ந்தது. இரவு சுமார் 7:30 மணியளவில், சாலையில் சென்ற ஒரு பொதுவான 'பிளாக்-ஹெட்டட் ராயல்' (black-headed royal snake) பாம்பைப் பார்த்து வாகனத்தை நிறுத்தினர். குழுவினர் அதனைப் பாதுகாப்பாக மீட்க முயன்றபோது, எதிர்பாராதவிதமாக சாலையில் மற்றொரு பாம்பு ஊர்ந்து வந்தது.

சமீபத்தில் தான் கட்ச் பகுதிக்கு இடமாற்றம் செய்யப்பட்ட துமதியா, வழக்கத்திற்கு மாறாகத் தெரிந்த அந்தப் பாம்பை உடனடியாகத் தனது கைபேசியில் புகைப்படமாகவும் வீடியோவாகவும் பதிவு செய்தார். பின்னர் அப்பதிவுகளை வனவிலங்கு மற்றும் பாம்பு வல்லுநர்களுக்கு ஆய்வுக்காக அனுப்பினார். ஆய்வின் முடிவில், அது இந்தியாவில் மிக அரிதாகவே தென்படக் கூடிய, ஒல்லியான மற்றும் அதிவேகமாக நகரும் தன்மைகொண்ட ஆப்ரோ-ஆசிய மணல் பாம்பு என்பது உறுதி செய்யப்பட்டது.

1872-க்குப் பிறகு முதல் உறுதிப்படுத்தப்பட்ட பதிவு

இந்தக் கண்டுபிடிப்பின் முக்கியத்துவமே இதன் நீண்ட வரலாற்றுப் பின்னணிதான். செக் நாட்டை சேர்ந்த இயற்கை ஆர்வலரான பெர்டினாண்ட் ஸ்டோலிக்ஸ்கா (Ferdinand Stoliczka), 1871 மற்றும் 1872-ம் ஆண்டுகளில் கட்ச் பகுதியில் கள ஆய்வு மேற்கொண்டபோது இந்த வகைப் பாம்புகளைச் சேகரித்து அறிவியல் ஆவணங்களில் முதன்முதலில் பதிவு செய்தார்.

வறண்ட மற்றும் பாலைவன சூழலுக்கு ஏற்பத் தகவமைத்துக் கொள்ளும் இந்த ஆப்ரோ-ஆசிய மணல் பாம்புகள், இந்தியாவில் பிரதானமாக ராஜஸ்தான் மற்றும் குஜராத்தின் சில பகுதிகளில் மட்டுமே காணப்படுகின்றன. இது குறைந்த நச்சுத்தன்மை (mildly venomous) கொண்டது; மனிதர்களுக்குப் பெரிய அளவில் ஆபத்தை ஏற்படுத்தாது. பல்லிகள், எலிகள் போன்ற சிறிய உயிரினங்களை மட்டுமே இவை உணவாக உட்கொள்கின்றன.

1872-ஆம் ஆண்டுக்குப் பிறகு ஒருசில முறை இவை தென்பட்டதாகக் கூறப்பட்டாலும், அவை எதுவும் அதிகாரப்பூர்வமாக உறுதி செய்யப்படவில்லை. எனவே, 150 ஆண்டுகளுக்கும் முந்தைய வரலாற்று ஆவணத்தை நவீன கால கட்ச் பகுதியுடன் மீண்டும் இணைக்கும் முக்கிய ஆவணமாக இக்கண்டுபிடிப்பு விளங்குகிறது.

கட்ச் பகுதியின் செழுமையான வனவிலங்கு வளம்

வெளியில் இருந்து பார்ப்பதற்கு வறண்ட, பாழ் நிலம் போலத் தோன்றினாலும், கட்ச் பகுதியின் பாலைவனங்களும் முட்புதர் காடுகளும் இதுவரை அதிகம் ஆராயப்படாத பல அரிய உயிரினங்களுக்குப் புகலிடமாக விளங்குவதை இந்த நிகழ்வு மீண்டும் நிரூபித்துள்ளது.தற்போது இந்த அரிய பதிவை முழுமையாக ஆவணப்படுத்தி, புகழ்பெற்ற அறிவியல் இதழ்களில் கட்டுரையாக வெளியிட வனத்துறை அதிகாரிகள் திட்டமிட்டு வருகின்றனர். இது கட்ச் பகுதியின் இயற்கை வரலாற்றுப் பக்கங்களில் ஒரு புதிய அத்தியாயமாக அமையும் என எதிர்பார்க்கப்படுகிறது.