ஆரக்கிள் நிறுவனத்திற்கு என்னாச்சு? ஏஐ (AI) ஆசையில் வந்த வினை! 30,000 பேரின் வேலைக்கு வேட்டு!

Oracle நிதி நெருக்கடி காரணமாக 30,000 ஊழியர்களைப் பணிநீக்கம் செய்ய ஆரக்கிள் முடிவு? அமெரிக்க வங்கிகள் கடன் தர மறுத்ததால் ஏற்பட்ட சிக்கல் பற்றிய முழு விவரம்.

Oracle ஆரக்கிள் நிறுவனத்திற்கு நேர்ந்த திடீர் சோதனைகள்

தொழில்நுட்ப உலகில் முன்னணி நிறுவனமான ஆரக்கிள் (Oracle), மற்றொரு பெரிய பணிநீக்க நடவடிக்கையை மேற்கொள்ள உள்ளதாகத் தகவல்கள் வெளியாகியுள்ளன. 2025 ஆம் ஆண்டின் இறுதியில் சுமார் 10,000 ஊழியர்களைப் பணிநீக்கம் செய்ததைத் தொடர்ந்து, தற்போது மீண்டும் 20,000 முதல் 30,000 ஊழியர்கள் வரை வேலையை இழக்கும் அபாயம் ஏற்பட்டுள்ளது. சிஐஓ (CIO) மற்றும் டிடி கோவன் (TD Cowen) முதலீட்டு வங்கி வெளியிட்டுள்ள அறிக்கையின்படி, ஆரக்கிள் நிறுவனம் கடும் நிதி நெருக்கடியைச் சந்தித்து வருவதாகக் கூறப்படுகிறது.

அமெரிக்க வங்கிகள் நிதியுதவியை நிறுத்தியது ஏன்?

ஆரக்கிள் நிறுவனம் தனது செயற்கை நுண்ணறிவு (AI) டேட்டா சென்டர் விரிவாக்கத் திட்டங்களுக்காக அமெரிக்க வங்கிகளிடம் கடன் கோரியிருந்தது. ஆனால், கடனைத் திருப்பிச் செலுத்தும் திறன் குறித்து சந்தேகம் எழுந்ததால், பல அமெரிக்க வங்கிகள் மற்றும் முதலீட்டாளர்கள் நிதியளிக்க மறுத்துவிட்டனர். இதனால், ஆரக்கிள் நிறுவனம் மாற்று வழிகளைத் தேட வேண்டிய கட்டாயத்திற்குத் தள்ளப்பட்டுள்ளது.

பணிநீக்கம் மூலம் நிதி திரட்டத் திட்டம்

இந்த மாபெரும் பணிநீக்க நடவடிக்கை மூலம் சுமார் 8 முதல் 10 பில்லியன் டாலர் வரை பணத்தை மிச்சப்படுத்த ஆரக்கிள் திட்டமிட்டுள்ளது. ஊழியர்களைக் குறைப்பது மட்டுமின்றி, சில வணிகப் பிரிவுகளையும் விற்க நிறுவனம் பரிசீலித்து வருகிறது. குறிப்பாக, 2022 இல் 28.3 பில்லியன் டாலருக்கு வாங்கப்பட்ட 'செர்னர்' (Cerner) என்ற மருத்துவ மென்பொருள் நிறுவனத்தையும் விற்க வாய்ப்புள்ளதாகத் தெரிகிறது.

ஆசிய வங்கிகளின் உதவி மற்றும் வட்டி உயர்வு

அமெரிக்க வங்கிகள் கைவிட்ட நிலையில், சில ஆசிய வங்கிகள் ஆரக்கிள் நிறுவனத்திற்குக் கடன் கொடுக்க முன்வந்துள்ளன. இருப்பினும், இதற்கான வட்டி விகிதம் மிக அதிகமாக உள்ளது. செப்டம்பர் மாதத்திற்குப் பிறகு கடன் வழங்கிய நிறுவனங்கள், முந்தைய வட்டி விகிதத்தை விட இரண்டு மடங்கு அதிக வட்டியை வசூலிப்பதாகக் கூறப்படுகிறது. இது நிறுவனத்திற்கு கூடுதல் நிதிச் சுமையை ஏற்படுத்தியுள்ளது.

வாடிக்கையாளர்களிடம் புதிய நிபந்தனைகள்

நிதிப் பற்றாக்குறையைச் சமாளிக்க ஆரக்கிள் புதிய உத்திகளைக் கையாளத் தொடங்கியுள்ளது. புதிய வாடிக்கையாளர்களிடம் 40 சதவீத முன்பணம் (Upfront Deposit) கேட்கப்படுகிறது. மேலும், "பிரிங் யுவர் ஓன் சிப்" (Bring Your Own Chip - BYOC) என்ற முறையையும் அறிமுகப்படுத்த உள்ளது. இதன் மூலம் வாடிக்கையாளர்கள் தங்கள் சொந்த ஹார்டுவேர்களைப் பயன்படுத்திக்கொள்ளலாம், இது ஆரக்கிளின் செலவைக் குறைக்க உதவும்.

விரிவாக்கத் திட்டங்களில் தேக்கம்

ஆரக்கிள் நிறுவனத்தின் உள்கட்டமைப்புத் திட்டங்களுக்கு (Infrastructure Commitments) சுமார் 156 பில்லியன் டாலர் தேவைப்படுவதாகக் கணிக்கப்பட்டுள்ளது. ஆனால், போதிய நிதி கிடைக்காததால் அமெரிக்காவில் டேட்டா சென்டர் அமைக்கும் பணிகள் தாமதமாகி வருகின்றன. தனியார் டேட்டா சென்டர் ஆபரேட்டர்களும் நிதி இல்லாமல் கட்டுமானப் பணிகளைத் தொடர முடியாமல் திணறி வருகின்றனர்.