Google ஆன்லைன் பண மோசடிகளைத் தடுக்க கூகுள் புதிய பாதுகாப்பு அம்சத்தை அறிமுகப்படுத்தியுள்ளது. தெரியாத நபருடன் பேசும்போது வங்கி செயலியைத் திறந்தால் எச்சரிக்கை விடுக்கும்.
Google வங்கிக் கணக்கில் உள்ள பணத்தைப் பாதுகாக்க கூகுளின் புதிய 'செக்மேட்'
இந்தியாவில் ஆன்லைன் பண மோசடிகள் மற்றும் போலி அழைப்புகள் (Scam Calls) நாளுக்கு நாள் அதிகரித்து வருகின்றன. வாடிக்கையாளர் சேவை மையத்தில் இருந்து பேசுவதாகக் கூறி, பொதுமக்களை ஏமாற்றி பணத்தைக் கொள்ளையடிக்கும் சம்பவங்கள் சர்வசாதாரணமாகிவிட்டன. இதற்கு ஒரு முற்றுப்புள்ளி வைக்கும் வகையில், கூகுள் நிறுவனம் ஆண்ட்ராய்டு போன்களில் ஒரு புதிய பாதுகாப்பு அம்சத்தை அறிமுகப்படுத்தியுள்ளது. இது மோசடி நடக்கும் அந்த நொடியிலேயே பயனர்களை எச்சரித்து பாதுகாக்கும் வகையில் வடிவமைக்கப்பட்டுள்ளது.
25
மோசடியை முறியடிக்கும் புதிய தொழில்நுட்பம்
பொதுவாக மோசடி செய்பவர்கள், அவசரம் என்று கூறி நம்மை பதற்றமடையச் செய்து, போனில் பேசிக்கொண்டே வங்கி செயலியைத் (Banking App) திறக்க வைப்பார்கள் அல்லது 'ஸ்கிரீன் ஷேரிங்' (Screen Sharing) செய்யச் சொல்வார்கள். கூகுளின் இந்தப் புதிய அம்சம், சரியாக இந்தத் தருணத்தில் குறுக்கிட்டு, பயனர்களைக் காப்பாற்றுகிறது. நீங்கள் ஒரு அறிமுகமில்லாத எண்ணிலிருந்து (Unknown Number) வரும் அழைப்பில் பேசிக்கொண்டிருக்கும்போது, கூகுள் பே (Google Pay) அல்லது பேடிஎம் (Paytm) போன்ற வங்கிச் செயலிகளைத் திறந்தால், உடனடியாக உங்கள் திரையில் ஒரு எச்சரிக்கை செய்தி தோன்றும்.
35
எச்சரிக்கை மணி எப்படி ஒலிக்கும்?
இந்த பாதுகாப்பு அம்சம் இரண்டு விஷயங்கள் ஒரே நேரத்தில் நடக்கும்போது செயல்படத் தொடங்கும்:
1. உங்கள் தொடர்புகளில் (Contacts) இல்லாத புதிய எண்ணுடன் நீங்கள் பேசிக்கொண்டிருக்க வேண்டும்.
2. அந்த அழைப்பின் போதே நீங்கள் பணப் பரிவர்த்தனை செயலியைத் திறக்க வேண்டும்.
உடனே, "இது ஆபத்தானதாக இருக்கலாம்" என்ற எச்சரிக்கைச் செய்தி திரையில் தோன்றும். அழைப்பைத் துண்டிக்கவோ அல்லது ஸ்கிரீன் ஷேரிங்கை நிறுத்தவோ எளிய ஆப்ஷன்கள் அதில் இருக்கும்.
கூகுள் இத்துடன் நின்றுவிடவில்லை. அந்த எச்சரிக்கையையும் மீறி பயனர் தொடர்ந்து செயல்பட முயன்றால், ஆண்ட்ராய்டு அமைப்பு தானாகவே 30 நொடிகள் தாமதத்தை (Delay) ஏற்படுத்தும். இந்த தாமதம் எதற்காக என்றால், அவசரத்தில் அல்லது பயத்தில் இருக்கும் பயனர், நிதானித்துச் சிந்திக்கவும், மோசடியில் சிக்காமல் தப்பிக்கவும் ஒரு வாய்ப்பை வழங்குவதற்காகவே என்று கூகுள் தெரிவித்துள்ளது.
55
எந்தெந்த போன்களில் இது கிடைக்கும்?
இந்த புதிய பாதுகாப்பு வசதி ஆண்ட்ராய்டு 11 (Android 11) மற்றும் அதற்கு மேற்பட்ட மென்பொருளில் இயங்கும் அனைத்து ஸ்மார்ட்போன்களிலும் கிடைக்கும். நிதி மோசடிகளால் அதிகம் பாதிக்கப்படும் நாடுகளில் ஒன்றான இந்தியாவில், இந்த வசதி ஏற்கனவே பயன்பாட்டிற்கு வரத் தொடங்கிவிட்டது. கூகுள் பே, பேடிஎம் மற்றும் நவி (Navi) உள்ளிட்ட பல்வேறு முக்கிய செயலிகளுடன் இணைந்து கூகுள் இதைச் செயல்படுத்தி வருகிறது.
பிரிட்டனில் கிடைத்த வெற்றி
முன்னதாக பிரிட்டனில் (UK) இந்த வசதி சோதனை செய்யப்பட்டபோது, ஆயிரக்கணக்கான பயனர்கள் பணத்தை இழப்பதற்கு முன்பே சந்தேகத்திற்கிடமான அழைப்புகளைத் துண்டித்து தப்பியதாகக் கூகுள் கூறுகிறது. அந்த வெற்றியைத் தொடர்ந்து, தற்போது இந்தியாவிலும் பிரேசிலிலும் இந்த பைலட் திட்டம் விரிவுபடுத்தப்பட்டுள்ளது. தொழில்நுட்ப ஹேக்கிங்கை விட, மனிதர்களின் மனநிலையை மாற்றி ஏமாற்றும் மோசடிகளைத் தடுக்கவே இந்த புதிய வசதி பெரிதும் உதவும்.
