சன் டிவிக்கு டஃப் கொடுக்க போகும் விஜய்யின் 'வெற்றி' டிவி.. இணையத்தை கலக்கும் லோகோவின் அதிரடி பின்னணி!

Vetri TV: ஆளும்கட்சியான தவெக சார்பில் வெற்றி டிவி தொடங்க உள்ளதாக தகவல் வெளியாகி உள்ளது. இந்த டிவி தொடர்பாக இணையத்தை கலக்கும் லோகோவின் அதிரடி பின்னணி குறித்து பார்ப்போம்.

விஜய் தவெகவின் 'வெற்றி' டிவி

2026 சட்டப்பேரவை தேர்தல் தமிழக அரசியல் களத்தையே புரட்டிப் போட்டு விட்டது. நடிகர் விஜய்யின் தமிழக வெற்றிக் கழகம் திமுக, அதிமுக என்ற இரு பெரும் திராவிட கட்சிகளை வீழ்த்தி ஆட்சியில் அமர்ந்தது. 108 இடங்களில் தவெக வென்ற நிலையில், திமுக கூட்டணி கட்சிகள் ஆதரவுடன் விஜய் முதல்வராக இருந்து வருகிறார்.

இந்த நிலையில், தவெக தலைவரும், முதல்வருமான விஜய், தனது கட்சியின் கொள்கைகளையும் செய்திகளையும் மக்களிடம் கொண்டு சேர்க்க 'வெற்றி நியூஸ்' (Vetri News) என்ற பெயரில் புதிய சாட்டிலைட் செய்தி சேனல் ஒன்றைத் தொடங்க இருப்பதாக இணையத்தில் செய்திகள் உலா வருகின்றன.

அதாவது ஜூன் 22-ஆம் தேதி விஜய்யின் பிறந்தநாளை முன்னிட்டு இந்த சேனலின் லோகோ வெளியாகலாம் என்றும், ஜூன் 30-க்குள் இதர ஆரம்பகட்டப் பணிகள் தொடங்கப்படலாம் என்றும் சமூக வலைத்தளங்களில் ஒரு தகவல் தீயாகப் பரவி வருகிறது. அத்துடன் 'வெற்றி' என்ற பெயரிலான ஒரு லோகோவும் இணையத்தில் வைரலாகி வருகிறது.

வைரல் லோகோவின் உண்மை பின்னணி என்ன?

தற்போது இணையத்தில் உலா வரும் அந்த லோகோ, கட்சியின் அதிகாரப்பூர்வ லோகோ அல்ல. அது தவெக ரசிகர்களால் பிரத்யேகமாக வடிவமைக்கப்பட்ட ஒரு மாதிரி லோகோ (Fan-made Concept Logo) ஆகும். மேலும், இந்த டிவியின் லான்ச் தேதிகள் குறித்தோ அல்லது லோகோ குறித்தோ தமிழக வெற்றிக் கழகத் தலைமை இதுவரை எந்தவொரு உத்தியோகபூர்வ அறிவிப்பையும் வெளியிடவில்லை என்பது குறிப்பிடத்தக்கது.

ஈக்காட்டுத்தாங்கலில் தயாராகும் ஸ்டுடியோ?

இருப்பினும், முன்பு தமிழ்நாட்டில் பிரபலமாக இருந்த 'எஸ் எஸ் மியூசிக்' (SS Music) சேனலின் லைசென்ஸை தவெக தரப்பினர் வாங்கியுள்ளதாகவும், சென்னை ஈக்காட்டுத்தாங்கலில் புதிய சேனலுக்கான அதிநவீன ஸ்டுடியோ மற்றும் தொழில்நுட்ப அலுவலகப் பணிகள் ரகசியமாக நடந்து வருவதாகவும் நம்பத்தகுந்த வட்டாரங்கள் தெரிவிக்கின்றன. மேலும், இந்த புதிய மீடியா நிறுவனத்திற்கான ஆட்கள் சேர்ப்பு (Hiring) விளம்பரங்களும் டிஜிட்டல் தளங்களில் பரவி வருகின்றன.

சன் டிவிக்கு டஃப் கொடுக்க போகும் வெற்றி டிவி

ஏற்கனவே தமிழ்நாட்டில் உள்ள முன்னணி அரசியல் கட்சிகள் தங்களுக்கெனச் சொந்தமாகத் தொலைக்காட்சி சேனல்களை நடத்தி வரும் நிலையில், தவெக-வின் இந்த புதிய முயற்சி அக்கட்சியின் தொண்டர்களிடையே பெரும் எதிர்பார்ப்பை ஏற்படுத்தியுள்ளது. கட்சியின் அதிகாரப்பூர்வ அறிவிப்பு வெளியான பிறகே இதன் முழுமையான வடிவம் தெரியவரும். இணையத்தில் உலா வரும் தகவல் உண்மையாகி வெற்றி டிவி லான்ச் ஆனால் அது சன் டிவி குழும சேனல்கள் மற்றும் இதர நியூஸ் சேனல்களின் டிஆர்பியை பாதிக்கலாம் என தகவல்கள் கூறுகின்றன. விஜய்க்கும், தவெகவுக்கும் இளைய தலைமுறையினர் மத்தியிலும், பெண்கள் மத்தியிலும் அதிக ஆதரவு நிலவி வருவதே இதற்கு முக்கிய காரணமாக பார்க்கப்படுகிறது.