சென்னைவாசிகள் கவனத்துக்கு..! புறநகர் ரயில் சேவையில் திடீர் மாற்றம்..! நோட் பண்ணிக்கோங்க!

சென்னை புறநகர் ரயில் சேவையில் இன்று மாற்றம் செய்யப்பட்டுள்ளது. இது குறித்த முழு விவரங்களை விரிவாக பார்க்கலாம்.

சென்னை மின்சார ரயில் சேவையில் மாற்றம்

சென்னையில் கடற்கரை‍‍-தாம்பரம்-செங்கல்பட்டு, மூர் மார்க்கெட்-திருவள்ளூர்-அரக்கோணம், மூர் மார்க்கெட்-கும்மிடிப்பூண்டி மற்றும் கடற்கரை‍-வேளச்சேரி ஆகிய இடங்களுக்கு புறநகர் மின்சார ரயில் சேவை இயக்கப்பட்டு வருகிறது. சென்னையின் போக்குவரத்து நெரிசலை சமாளிக்க புறநகர் மின்சார ரயில்கள் கைகொடுத்து வருகின்றன. சென்னையில் மெட்ரோ ரயில்களின் சேவை இருந்தாலும் புறநகர் ரயில்கள் மிகவும் குறைவான கட்டணத்தில் சேவையை வழங்கி வருகின்றன.

புறநகர் ரயில் சேவையில் மாற்றம்

புறநகர் பகுதிகளில் இருந்து சென்னைக்கு வேலைக்கு வருபவர்கள், பள்ளி, கல்லூரி மாணவர்கள் மின்சார ரயில்களால் பயனடைந்து வருகின்றனர். இந்நிலையில், சென்னையில் இன்று புறநகர் ரயில் சேவையில் திடீர் மாற்றம் செய்யப்பட்டுள்ளது. அதாவது சென்னை சென்ட்ரல்-கூடூர் வழித்தடத்தில் உள்ள பொன்னேரி பணிமனையில் இன்று (செப்டம்பர் 7) இரவு 8 மணி முதல் நாளை (செப்டம்பர் 8) அதிகாலை 4 மணி வரை பராமரிப்பு பணி மேற்கொள்ள இருப்பதால் புறநகர் ரயில் சேவையில் மாற்றம் செய்யப்பட்டுள்ளது.

சென்னை கடற்கரை-கும்மிடிப்பூண்டி

சென்னை கடற்கரையில் இருந்து இன்று மாலை 6.45, இரவு 8, 9.20 ஆகிய நேரங்களில் புறப்பட்டு கும்மிடிப்பூண்டி செல்லும் மின்சார ரயில் ரத்து செய்யப்படுகிறது. மறுமார்க்கமாக கும்மிடிப்பூண்டியில் இருந்து இன்று இரவு 7.35, 8.35 ஆகிய நேரங்களில் புறப்பட்டு சென்னை கடற்கரை வரும் மின்சார ரயிலும் ரத்து செய்யப்படுகிறது.

மூர்மார்க்கெட்-கும்மிடிப்பூண்டி

இதேபோல் சென்னை சென்டிரல் மூர்மார்க்கெட்டில் இருந்து இன்று இரவு 7.35, 11.20 ஆகிய நேரங்களில் புறப்பட்டு கும்மிடிப்பூண்டி செல்லும் மின்சார ரயில் ரத்து செய்யப்படுகிறது. மறுமார்க்கமாக கும்மிடிப்பூண்டியில் இருந்து இன்று இரவு 8.15, 9.25, 10.30 ஆகிய மணி நேரங்களில் புறப்பட்டு மூர்மார்க்கெட் செல்லும் மின்சார ரயில்களும் ரத்து செய்யப்பட்டுள்ளன. இதேபோல் சூலூர்பேட்டையில் இருந்து இன்று இரவு 8.35 மணிக்கு புறப்பட்டு மூர்மார்க்கெட் செல்லும் மின்சார ரயில்களும் ரத்து செய்யப்படுகின்றன.

சிறப்பு ரயில்கள் இயக்கம்

புறநகர் ரயில்கள் ரத்து செய்யப்பட்டதால் சில சிறப்பு ரயில்கள் இயக்கப்பய உள்ளன. அதாவது சென்னை கடற்கரையில் இருந்து இன்று மாலை 6.45, இரவு 9.20 மணிக்கு மீஞ்சூருக்கு சிறப்பு ரயில்களும், மீஞ்சூரில் இருந்து இரவு 8.04 மணிக்கு சென்னை கடற்கரைக்கும் சிறப்பு மின்சார ரயில்களும் இயக்கப்பட உள்ளன. மூர்மார்க்கெட்டில் இருந்து இன்று இரவு 7.35 மணிக்கு மீஞ்சூருக்கும், மீஞ்சூரில் இருந்து இரவு 8.44, 9.56 மணிக்கு மூர்மார்க்கெட்டிற்கும் சிறப்பு மின்சார ரெயில்கள் இயக்கப்பட உள்ளன. இதேபோல் சூலூர்பேட்டையில் இருந்து இன்று இரவு 8.35 மணிக்கு கும்மிடிப்பூண்டிக்கு சிறப்பு ரயில் இயக்கப்பட உள்ளதாக தெற்கு ரயில்வே தெரிவித்துள்ளது.